Read Ninia Yali NEHEMIA 4 Bible Online

NEHEMIA 4 - Ninia Yali bible

NEHEMIA 4

¹Ap homi en uruk kwit de, ‘Ap homi Yahudi on en o kota fak lehet anyo leko wakoho duruk,’ ulug urukmu at Sanbalat en holfagdeg de olok en ahummu ahe lahabagdeg horogap-nenepuk katfag.

²Airoho holfagdeg de at ori on mel ne it tentara Samaria on mel inil hanim aren uruk kwit de, “It ap homi Yahudi on en de yabuk ai ebe senggeroho duk fug alereg famen duruk ale ai esauk kahep a? O kota fam fak lehet oho latfag on meiyal-esebag ma mundoho siag atfag on aire iren nikangge leko wa alereg a? It enendaman boruk kwit de, ‘Niren wam di angge su angge TUHAN obahet folug og-utuk kwit, elehet aire nukoho misiham mundoho wahuk,’ ulug boruk kwit duruk a? O kota fam fak lehet oho latfag on meiyaloho embesebag on aire iren helep wiroho fak lehet wa alereg ulug a? Mun eleg,” ulug ebag.

³Ai ebagma at Tobia ebe Sanbalat aluluk unduhuk wereg lit mel ebag, “Iren fak lehet witfag on aire mene olomene en higitdoho moluluk duk aleroho witfag ai hakiek!” ulug ebag.

⁴Airoho uruk kwit enele en horogap nenepukmu re an den somban diroho irihik, “Allah nenakni, iren de nit maben deg boruk kwit enele en horogap-nenepuk on ai it enonggwareg enele en horogap-nenepuk on ai enobam sombandoho amag ulug debesein. Ne, it enangge etma mundoho ap del-dalug it enebe mel mundoho sabu hetdoho feleleng-eneplug de ap amu on enobam etma feseik lowag.

⁵Iren de nit fak lehet wauk kahe on su fahet enendaman seramap nenobahalug horogap nenepuk anggere iren siag ale nenobam uruk on ai Haren apelehapdoho fesouk fug, ne iren kwasikdoho duruk on etma maben deg bouk fug, nakni,” ulug somban irihik.

⁶It enele airoho uruk kweleg de kalolorebeselug de niren fak lehet anyo wauk katuhuk. Wauk kwit de ap homi niron etmano mun enomamneroho neg wauk katuhuk ai fam de fak lehet anyo wil-wil de bulfene debeik laharuhuk.

⁷Airoho deberuhuk men de it ap homi fomane en de, ‘Ap homi Israel on omano re o Yerusalem fak lehet anyo folo-folo mundoho elehap duruk kwit foreg kwe etmano mundoho dopnorusa,’ ulug urukmu hun Sanbalat mel, Tobia mel, it ap Amon enap omano mel, Asdod enap mel, Arab enap mel en holswareg deg enahummu enolok atswa.

⁸Airoho atswareg de it enebe abirangge en de naleg-haleg ukwag ulug de nit ap homi Yerusalem on nenowatul ulug enele matswa.

⁹Ai fam de niren somban Allah fam uruk kwit de o kota Yerusalem anyo nukoho et hup anggo et kahaleg lit neg welatuhuk.

¹⁰Famen de ap homi Yahudi on en de hunu suni diroho uruk katswa: “Elehet meiyaleg de mundoho hum deg famen oe, ebe leheruk on fahet nenomamne eleg aha o kota su elehet de niren wehe ha fug alereg elehet diroho re niren wurehe ha fug alereg oe” ulug suni uswa.

¹¹Nit elehet airoho wauk wereg ma ap nit ninim neneseleireg on omano en weim abug uruk kwit de, it wongdoho elehet waukmu nit salik lalug de enaluluk kwe yambeg ulug enebe enowaruhuk. Ne, niren airoho duhuk ai fam de elehet ai foma minggiroho lin-esahup, ulug uruk katswa.

¹²Airoho uswa famen de ap homi Yahudi on nit nenaselei[7] enap etmano horogma etma welatswa on en de, ‘Iren weim abug airoho uruk,’ ulug hweag-nesa waharuk kwit neg welatswa.

¹³Ai fam de an den ap homi enebe mundoho fam karog mel, sehen mel, fit mel, sumbut-esauihik. Sumbut-esauihikdeg de fak lehet owan ahundip duruk fug kwe etmano kahaleg welamag ulug enunggul unuk domog yohwandoho feserihik.

¹⁴Airoho feserihik famen de it ap homi etmano enakol wereg ma esauihikdeg de it nim it enowesi kaindeg welatswa on etmano mundoho mel fam hweag-esauk kwit de, “Ap nit ninim neneselei on etma fam henakol welam fug! Nenakni TUHAN mun along wereg lit nik ale neg duruk on anyo fam ebereg lamek. Ebereg wereg lit de hiren henori mel, henomaliki mel, henohwesi mel, henobam wirig mel, del-enebuhup en henamururoho yabiyug,” ulug hweag-esauihik.

¹⁵Airoho hweag-esauihik mu re it ap homi foma en uruk kwit de, ‘Ap homi Israel on de hiren enowaruhuk ulug weim abug uruk kahep on etma mundoho holswareg wereg,’ ulug hweag-esausa ma holswareg iren uruk kwit de, niren enowaruhuk ulug uruhuk on etmano Allah en elehap debesi, ulug furebeswa. Ma re niren elehet anyo nikangge andomma waul ulug senetuhuk.

¹⁶Airoho hweag-esauihik famen de eta li em de an nautsi enebe minggiroho fomane neg elehet wauk kweleg, fomane re enasing wandoho sehen mel, fit mel seneko re dog bei angge mel seneko selei on kwik wam ale ulug yenal kahaleg welatswa. Airoho deg ma re it ap homi melal-enepuk katswa on etmano en de it ap homi elehet wauk on etmano fahet,

¹⁷niren let-hesauk kamuhuk ulug uswareg de let-esauk katswa. Airoho duruk kweleg it ap elehet wauk katswa on anyo en de enenggik fomabil de sehen mel fit mel seneg lit de enenggik hwarean neg helep omano leheruk katswa.

¹⁸Ne, it ap helep wutuk katswa on oho re enenggarog bahaluk fam kwelabeg lit wutuk katswa. Ne, it ap neneselei on nenowarukoho aik wahesa ulug eneg aleroho ele uruk angge fahet de bohweap trompet de an naluluk neg welatsi.

¹⁹Airoho wereg ma re an den ap homi mundoho mel, it enowesi kaindeg mel, it melal-enepuk on mel, fam hweag-esauk kwit de, “Elehet fak lehet aure waling-waling mun yatdoho wauk kahe au fam de nit nenebe da meiyaleg deg lamuhuk ai.

²⁰Anggere airoho weregman bohweap ele urukmu henesanggo holug halug de henebe nit nenakit suma folo-folo kabog-dik manu. Nenakni Allah en de nit nenobahet weim yabuhu en deg,” ulug hweag-esauihik.

²¹Airoho hweag-esauihik mu likia sekandoho elehet fam wilip atlug de o hubet indip duruk angge wil-wil lauk men neg de bohol fam sohwalanggen enam atugem kwik waharuk katuhuk. Ne, it ap foma minggiroho re fak lehet anyo wauk kweleg, it fomane re nenaselei on kwik waharuk kam no ulug fit enenggikmu seneko yenal kahaleg welatswa.

²²Elehet fak lehet ai wauk li em de, ap wauk katswa on enebe mel, let-esauk katswa on mel, mundoho re o Yerusalem neg nohoruk kamul ulug hweag-esauihik mu re suma neg nohoruk katuhuk. Airoho nohoruk kwit de hupanggo re o kota Yerusalem anyo kahaleg welatuhuk, ne nukoho re fak lehet anyo leko wauk katuhuk.

²³Airoho wauk kwit de an nebe nim an nori nebe ambi on nim, nautsi tentara mel, nebe kahal-nusug welatswa on mel, de nenesum yabuk duruk kwit wan-duruk katuhuk on de wan-dulug nukoho en angge hup anggo wandeg lit welatuhuk. Airoho deg lit dog angge nenenggikmu[8] seneko neg wereg lit, nenepe hebeloho neg wereg lit kahaleg latuhuk.