Read Ninia Yali NEHEMIA 5 Bible Online

NEHEMIA 5 - Ninia Yali bible

NEHEMIA 5

¹Airoho deg lit yabuk duruk katuhuk deg en li eke fam de ap homi Yahudi on enebe humdoho ap mel, homi mel en de ap homi it enunggul unuk on fahet enenda firig ale uruk katswa.

²Iren de at eke en de, “An nomaliki hum deg ma gandum nalug nenoluk wereg on fahet eke nim nenenda,” uruk katswa.

³Ne, it eke en uruk kwit de, “An de nit nenebe warahe ha no ulug nangginik ahan de neyabuk mel, nahan anggur yabuk mel, nenobam mel, fam uang gandum hundutuk kwit nit nenangge etma ap enobam og-isihi.” Eheg uruk katswa.

⁴Ne, it eke en uruk kwit de, “Nit de at raja en neneyabuk mel, nenahan anggur yabuk mel fahet kwenang onggo pajak diroho foruk kamuhup ulug nenobam fesi on etmano foruk on ulug ap enobam niren fobik obalma og-esahuk en ulug heng-enepuhuk.

⁵Nit de Yahudi nenap a? Yahudi nenap neg. Ne, nit nenomaliki re it ap homi Yahudi on foma enomaliki etma hag fug no? It oho airoho. Famen de niren nit nenomaliki etma ap homi enamingming angge on amag ulug embeseruk kahe. Eta neg fug nit nenahwelani famen oho re ap enamingming angge on amag ulug onggo bal-enepuhuk. Aire nit neneyabuk mel, nenahan anggur yabuk mel de ap en uang og-nesowag ulug hweag-esauhukdeg amu ale eke duk fug alereg en duruhuk,” uruk katswa.

⁶Airoho urukmu nesanggo holdihikdeg an mun nolok atihikdeg de,

⁷ an den keroho dimin ulug dirihik. Airoho dirihikdeg de an den it ap enowesi kaindeg omano mel, ap homi melal-enepuk on etmano mel fam uruk kwit de, “Hiren de it hit henori on fam henomamne hasimeg sebel-enusug welahep!” ulug hweag-esauihik. Airoho hweag-esalug de an den wene ai fahet keroho duhuk ulug de ap homi enebe abirangge mel wene nenele misig seberoho marukoho kabog-duruhuk.

⁸Kabog duruhuk deg an den hweag-esauk kwit de, “Ap homi Yahudi on enebe it ap enunggul unuk bohon fam onggo bal-dauk katswa on etmano niren nenemururoho loloho wilip-enepuhuk. Famen de ketia re hiroho Yahudi henap famen de hiren de it enebe onggo hun-enebukoho henomamne fam hweag-esauk kahep!” ulug hweag-esauihik. Airoho hweag-esauihik mu re it ap homi melal-enepuk on etmano en enele we dem misig oho eke uswa fug.

⁹Ai en de an den eke uruk kwit de, “Hit de Allah fam henenda henakol bolug wereg fam de it ap homi nit nenaselei on enakni Tuhan hag on oho eke wereg fug on etman nit mabenapdoho nenobaharuk ale fahet eke koloreg lam fug on de hiren duruk kahep ale ai fam de mun siag ale duruk kahep ai.

¹⁰Ne, nit de an nonggwareg en mel, ne it nori en mel, it ninim hundig on en mel de nenangge uang mel, gandum mel it ap homi fam iren obalma fobik og-nesahup en ulug og-esauhuk. Famen de niren nikangge nenonggwareg obalma og-nesakiek ulug heng-enepuk kahe fug.

¹¹Aireg halug de hiren oho it ap homi enobam henangge uang halug oho, gandum halug oho, ne anggur ane ite e zaitun ahalue halug it fam henombaleg angge[9] wereg on etma mundoho elehap diek. It enangge eneyabuk mel, enahan anggur yabuk mel, enahan zaitun yabuk mel, enobam wirig mel, etma hiren it enonggwareg fam og-esakiek!” ulug hweag-esauihik.

¹²Airoho hweag-esauihik mu it ap homi melal-enepuk on etmano en uruk kwit de, “Haren komo-nenebehen on aire niren higitdoho neg dul. Niren de it enobam onggo eke og-nesakiek ulug heng uk fug angge abirangge it enobam og-esaul,” ulug hweag-nutswa. Airoho uswa ma an den it ap imam mel, ap homi melal-enepuk on mel etmano wol-enepihikdeg de it ap enele airoho duhuk ulug uswa on etmano en de it imam etmano inil hanim etman, ‘Niren ehe on aire dik-demdoho duhuk en ehe’ ulug hombuk balukwag ulug hweag-esauihik.

¹³Airoho hweag-esauihikdeg an den sum on nombahaluk[10] anyo nonggoldihik deg lilduk kwit de diroho irihik, “Ap eke en ele sali isi ale dipdoho duruk eleg on aire diroho at Allah en ebe lil-esauk karuhu. Ne, lil-esalug de ap ai angge, mel obam mel Allah en mundoho wahumu re ap ebe mun enggik eleg on welaruhu!” ulug hweag-esauihik. Airoho hweag-esauihik mu re ap homi wene kabog-durukmu kabogdeg welatswa on anyo en de, “Demdoho” ulug uk hag de, “Amin” uswareg TUHAN mot-duruk katswa. Ai fam de it ap homi melal-enepuk on anyo en de enele sali uswa hagdoho dipdoho neg dil lausa.

¹⁴Ne, an nebe re nunggul unuk gubernur inatihikdeg weregman neg de tahun nesanggo en dirihik. Aire at Raja Artahsasta ebe raja inatsi on tahun 20 on wereg kweleg inatsireg de tahun 32 on huli wereg li eta fam welatihik. Ne, airoho wereg latihik li em etare an den nim ne an nori en nim de ap enunggul unuk gubernur wereg lit onggo hwelauk aleroho hwealuk katihik fug.

¹⁵It ap gubernur an inam fug li em welatswa on etman de ap homi holduk on en, nukoho misig[11] fam at gubernur nauk on mel ne anggur mel fahet de uang perak on 40 en og-nesakiek ulug heng-enepukmu re ap homi enobam anggin welatsi. Famen de an den Allah fam nakol boruk kwit de airoho duruk katihik fug.

¹⁶An de yabuk fak lehet leko wauk on anyo fahet ebet-ebet duruk kwit, ne it namingming angge mundoho oho re an ninim seberoho yabuk elehet leko wauk on ai fam duruk katswa famen de, an yabuk duruk katihik on onggo ulug kwenang dorangge oho eke hwelauihik fug.

¹⁷Aireg famen de ap homi Yahudi on enebe 150 en mel, ap enowesi kaindeg mel an neitogdoho siburu esag-enepuk katihik. Ne, etare it ap enunggul unuk amu on nit horogdoho wereg on nambogdoho waharuk katswa on etmat de fug.

¹⁸Nukoho hundig-hundig de an nonggwareg en na uang on fam onggo balug, sapi misig nim, domba sei on folfalik en mel, suwe ayam de humdoho inim esag-enepuk katihik. Ne, etma airoho duruk kwit en de, nukoho num en welatlug de nangge anggur ahaik elegam no ulug hwenanggoho foruk katihik. Airoho duruk katihik famen de, it ap homi en duk ale mun anggin humdeg ma re, an den nebe gubernur welahi on fahet onggo og-nemek ulug heng-enepuk katihik fug.

¹⁹Airoho duruk kwit de, ‘Nakni Allah, an den di ale su ale ap homi enunggul unuk au fahet enepuk kahi ale etma ebet halug de, an nobam fanoapdoho nobaharuk kamin ulug heng-hapuk kahi,’ ulug heng irihik.