Read Ninia Yali NEHEMIA 6 Bible Online

NEHEMIA 6 - Ninia Yali bible

NEHEMIA 6

¹Ap nit nenaselei on, hun Sanbalat mel, Tobia mel, Gesyem mel, nenaselei on amu on mel en enesanggo holduk men de, ‘It ap homi Israel on en de fak lehet anyo mundoho leko wauk, anggwe yendeg on etmano mundoho dopnoruruk uswa,’ ulug urukmu holswa. Airoho holswa famen de nit eta li em o kota fam etma sokole wereg on omano sok ebe mel owan wiruk fug kweleg famen de airoho uswa.

²Airoho holswareg de it hun Sanbalat mel, Gesyem mel de, o sili eke o Lembah Ono fam etma wereg on fam wene misig seberoho kabog-dul en ma o, ulug ap yonggo angge an nakit mondorik wahausa. Famen de iren ehesa on aire an nebe alemat nabukoho ehesa ulug an noluk atsi.

³Ai fam de an den it fam wene onggo diroho mondotihik, “An den yabuk mun leho on duruk kahimu re an wahi ha fug alereg. Ne, an nebe hit nim ambi amul en ulug waharuk men de yabuk su hesama leiyareglam alereg,” ulug nele mondotihik.

⁴Airoho irihikmen de iren enenggik ohwanam wene airoho neg mondorik wahausa ma an den oho nele onggo atam irihik aleroho neg monde ferihik.

⁵Airoho dirihikmen de enenggik foap angge fam de at Sanbalat aut yabuk apma duruk on eke wahasireg de lisu baleg ahunggwa fam kwelabeg eleg angge[12] og-nirik wahasi.

⁶Ne, lisu baleg ai fam de ele diroho ulug baleg latsi, “It ap homi enunggul unuk enap horog kwe suma wereg on en enele en walug uruk kwit, hat mel, ne it ap homi Yahudi on mundoho mel en de weim abug uruhupdeg de o kota fak lehet ai leko wauk kahep ale ai fahet uruk ulug an Gesyem en oho demdoho isi. Ne, aren eke uruk kwit de hat de ap homi Yehuda on enobahet honggwareg en raja welatmin ulug leho fahat-dauk kwit,

⁷ap nabi en hat o Yerusalem fam etma raja welamag ulug unduhuk nobahayek ulug uruk kahen ale fahet mel isi. Mu re wene enele en ulug-walug aire at raja esanggoma oho aik lahu lit deg. Anggere wene ai fahet nit nenele seberoho maruhuk en ma,” ulug baloho mondorik wahasi angge deg latsi.

⁸Airoho deg latsi famen de an den wene onggo monde foruk kwit de, “Wene hun haren ehen on etma re we obahatman, we hele en werahapdoho ehen,” ulug mondotihik.

⁹Ai irihik men de iren nit yabuk duruk kahe on ai heila reboukwag ulug de nenakolap kwelapuk katswa. Airoho duruk en de an den somban uruk kwit de, “Nakni Allah nenda hambuge nobahain!” ulug somban irihik.

¹⁰Li eta li em de an nebe at Semaya hun Delaya amloho, ne at Mehetabeel omba anyo, at ebe an nakit wam fug alereg en de at obam lauihik. Lauihik mu aren an nobam uruk kwit de, “Ap en hat howarukoho duruk angge re, o yoho hup su fam howatlusa anereg, angge re, nit biren de o TUHAN Obam wirigmu herag aik lauldeg de, niren sok abirangge kelog dul,” ulug hweag-nitsi.

¹¹Airoho isi famen de an den onggo hweag-utuk kwit de, “An de ap we obahatman heiye lauk nahun fug. An de ap we on deg lahimu, ne an nebe warahi ha alereg ma re o TUHAN Obam wirigmu etma kwihi ha fug alereg. Anggere eleg an de nerim!” ulug hweag-itihik.

¹²Airoho hweag-itihikdeg en wene anyo fahet keroho dihi ha alereg ulug wal-fal hauihikdeg de, an den boruk kwit de an mingming-napuk on aure Allah en eheikma re fug, aure at Tobia mel Sanbalat mel en ehesama. Iren de at Semaya au fam wene airoho ik lakin ulug onggo enenggik apmane og-erehesama ulug noluk atsi.

¹³Iren boruk kwit de an nakol atlug iren dul ulug uswa ale ai muko duruk fam an siag dimisi bousa. Ne, an siag duruk ai fam de iren eiyale aha man ulug an nunuk siaho folug airoho disi on ulug ap homi en dindilduk kamuhup, bousareg duswa.

¹⁴Airoho duswa famen de an den somban uruk kwit de, “Nakni Allah, it ap Tobia mel, Sanbalat mel en duruk ale ai fahet ebet hakin. It enebe fam unggum fesein! Ne, at hwe on nabi wereg on unuk Noaja ai mel, ne it nabi fomane mel en an nendama nakolap kwelapuk on etma mel fam unggum fesein,” ulug somban irihik.

¹⁵Fak lehet anyo leko wauk men neg de nukoho 52 en fam wauhukdeg de tanggal 25 bigalem niren wenaharuk on de unuk Elul ai fam mun fotogdoho wauhuk.

¹⁶Airoho wauhukmu re it ap enunggul unuk enap horog kwe etma welatswa on en, airoho duruhuk ale anyo fahet holswareg de, ‘Elehet aire Allah en let-enepuk kweleg wausa ulug’ it mundoho en enoluk atsi mu re, it enenggali atsi.

¹⁷Anyo airoho duruk kweleg de it ap Yahudi on enowesi melal-enepuk on etmano fomane en de at Tobia nim surat bal-bal atuk katswa.

¹⁸At Tobia ebe re hun Arah amloho Sekhanya anyo eyamal deg ma atlug de ap Yahudi on humdoho en at Tobia inim seberuruk katswa. Ai en eke at Yohanan, hun Tobia amloho anyo en de hun Berekhya amloho Mesulam anyo ahaloho ai hwelasimu atlug de inim seberuruk katswa.

¹⁹Ne, at Tobia en de surat hundig-handig an nendama nakolap kwelaboho ulug balduk neg katsi famen de, it ap homi Yahudi on melal-enepuk enap etman de an nil hanim at Tobia en fano ale duruk on etmano dindilduk neg katswa. Ai en an den nele uruk ale omano re iren at Tobia fam hunduko lauk katswa.