Read Ninia Yali NEHEMIA 8 Bible Online

NEHEMIA 8 - Ninia Yali bible

NEHEMIA 8

¹It ap homi Israel on enobam kota welatfag kwe etmano domog kwik latfag weregman de bigalem iren wenaharuk katfag on de sabit on enam debag ma tanggal 1 fam enebe abirangge o Yerusalem elehet fak lehet unuk de Pintu Gerbang Air ulug soalfag ma olohotma etma kabog-debag. Kabog debagma re at Ezra en de Allah en wene melaleg diroho diyug suroho diyug ulug ebag ma Musa en hweag-esebag on Lisu Baleg wereg on oluk hum ahun anyo en walug bilinggukwag ulug heng-debag.

²Airoho heng debagma at Ezra en de Allah Wene melaleg baleg anyo walug de ap homi kabog-debagma, ap mel homi mel, omalik doron wene uruk ale furebouk alereg on mel wereg ma walug watfag.

³Wahasireg o hubet en de hupmu huli at Ezra en wene anyo bilinggurukmu re ap homi etmano fanoroho holeg welatfag.

⁴Airoho holeg wereg ma re at Ezra ebe re ap homi airoho wene kabog-durukmu fahet e wiri febag ma unduhuk lit hweag-esauk katfag. Airoho hweag-esaukmu at Ezra ebe enggik bekit fil ap unduhuk welatfag on ap enunuk de su: Hun Matica mel, Sema mel, Anaya mel, Uria mel, Hilkia mel, Maaseya mel; ne it ap enggik hware fil unduhuk latswa on de: Pedaya mel, Misael mel, Malkia mel, Hasum mel, Hasbadana mel, Zakharia mel, Mesulam mel welatfag.

⁵Ne, e wirig at Ezra unduhuk latfag mu aire leko wirigmu re ap homi mundoho en at ebe inil hauk katfag. Airoho inil kumureg kweleg de at Ezra en buku anyo liminggi febagma re, ap homi enebe abirangge inatfag.

⁶Inatfag ma at Ezra en uruk kwit de, “Nenakni TUHAN Allah Hebe humon, mot neg hapuk kahe!” ulug hweag-etfagma, it ap homi etmano abirangge en enenggik yatdoho lahapuk kwit de, “Demdoho amag, uk hag de, Amin, amin!” uruk katfagdeg de, iren enelenggen dimiroho enorohole belabeg sahaun uruk kwit Allah apne webag.

⁷Airoho mundoho apne watfagdeg de enebe enobale domog inail lebag ma re, it ap Lewi on enebe kabogdeg on en de Allah wene at Ezra en bilinggil lebag on anyo ebe enegdoho hweag-esebag. Ap hweag-esebag on eta enunuk de: Yesua mel, Bani mel, Serebya mel, Yamin mel, Akub mel, Sabetai mel, Hodia mel, Maaseya mel, Kelita mel, Azarya mel, Yozabad mel, Hanan mel, Pelaya mel.

⁸It ai en de Allah wene melaleg[14] anyo it enele fam ahamdoho hweag-esauk kwit de, ebe diroho suroho eheg, di huli en de su huli en eheg ulug hweag-esaukmu[15] re ap homi etmano en fanoroho holduk katfag.

⁹Airoho hweag-esaukmu re ap homi etmano holfagdeg de mundoho enenda hesilduk en de oba yatfag. Airoho debagma at Gubernur Nehemia mel, Imam Ezra Wene baleg anyo oluk-boluk deg latfag ahun anyo mel, ne it ap Lewi enap wene ebe diroho ulug selegdoho hweag-esauk katfag enap etmano mel en de ap homi etmano abirangge fam de diroho hweag-esebag: “O yoho su re TUHAN anukoho fam welahema re hit henenda hesilduk kwit oba yatuk eleg.

¹⁰Nenakni TUHAN en henendama henahayeg howag ulug henobahasi on ai en henendama aho ware-henobaharuk karuhu. Anggere, ketiare TUHAN anukoho fam welahe anggere, henobam olekwe sombandoho lalug de henenda sebe ulug welam fug angge, henenda henahayeg fam henasiburu nenggeg, henahaik nenggeg, diyug. Airoho duruk kwit de hit henasiburu mel, anggur ahaik mel, de it ap homi foma enasiburu mel enahaik mel eleg on etma yohwandoho og-esakiyug,” ulug hweag-esausa.

¹¹Airoho hweag-esaswareg de it ap Lewi on etmano en de ap homi etmano onggon enepuk kwit de nin uk nan uk diroho hweag-esausa, “Nukoho eneg on su fam hiren henenda fit atlug duruk eleg,” ulug hweag-esausa.

¹²Airoho hweag-esausa ma re it ap homi etmano buhuloho re enobam olekwe laswareg de, enasiburu nenggeg, enahaik nenggeg, duruk kwit de, it fomane yohwandoho og-eseheg, dul en ulug enobam olekwe lausa. Lauswareg de Allah en Wene melaleg hweag-esasi on hweag-esausa ma holswareg furebeswa ai en de enendama enahayegdoho welatswa.

¹³Airoho buhulug laswareg, likia re ap homi enunggul unuk domog enowesi mundoho mel, ap imam mel, it Lewi enap mel, mundoho kabog-dusareg de TUHAN en Wene melaleg anyo at Ezra en hweag-nesowag ulug akit lausa.

¹⁴ Lausa ma wene hweag-esaukmu re, Wene melaleg TUHAN en diroho diyug suroho diyug ulug Musa fene en melaloho hweag-esasi on anyo fam TUHAN en it ap homi Israel on hweag-esauk kwit de, ‘Soni O Sabo ai fahet eberoho esetuk kwit de henebe o sabo we elamna wit-heheg welamuk,’ ulug hweag-esebag ale hweag-esasimu enesanggo holswareg de enoluk atsi.

¹⁵Airoho duruk katswa ai fam de ap homi o Yerusalem en kota di kwe su kwe nim, isi ulug uswa: o esanggo-esanggo nim, welatswa on wene diroho[16] TUHAN en de, “Hiren o sabo enggelangge fam sal heheg, soni esetuk kamuk ulug hweag-nesasi on lisu baleg wereg higitdoho saldul en de, henebe o dom fene lahalug de e Sin hag on unuk lak mel e zaitun mel, e ahalue humdoho deg on mel, e unuk lua mel, e amu on mel, enggik liag heg wag lalug de walug manu, ulug hweag-isil lakiek,” ulug uswa ma hweag-isil lausa.

¹⁶Airoho hweag-esausa ma re ap homi etmano dom kwe laswareg de e enggik etmano wag lausa. Wag lalug de it enebe abirangge en de o sabo anyo re it enobam wirig on do emberimmu aming anggwereg kwe mel, enobam bumbuk kwe mel, o TUHAN Obam wirig on olohotma mel, kwenang healegma Pintu Gerbang Air mel, ne sokole unuk Efraim ulug deg on en kwenang healegma etma mel, wutswa.

¹⁷Ap homi sabu hetdoho og-eneplug lebagman sombandoho wahausa on etmano enebe abirangge en de o sabo e enggela fam etma wutswareg de enebe etma welatswa. Atam iren o sabo e enggela fam wit heg welatfag on anyo ebetuk kwit de hun Nun amloho Yosua anyo wereg li em wiroho welatfag on lien wiruk eleg angge welatfagdeg en de eta li em wiroho duswa ai. Airoho duruk kwit de it enebe abirangge en de enendama enehayegdoho neg welatswa ai.

¹⁸Airoho salswareg de soni esetuk kwit neg de nukoho sabiren welatswa. Airoho duruk kwit de Allah en wene melaleg lisu baleg wereg on anyo di salim su salim at Ezra en de nukoho eke salim wene indip eke on ne nukoho eke salim wene indip eke on hweag-esauk katsi. Airoho hweag-esauk katsireg de nukoho ligin on fam de Allah en Wene melaleg anyo fam lisu baleg wereg ale higitdoho, soni anyo ahae fotogdoho esetuk kwit hweag-esesai.