Read Ninia Yali NEHEMIA 9 Bible Online

NEHEMIA 9 - Ninia Yali bible

NEHEMIA 9

¹Airoho duruhukdeg de ap homi Israel on en de ap homi enunggul unuk amu on it ininim welatswa on etmano eneko enemumu feseil lausa. Airoho dusareg de bigalem ai tanggal 24 fam de ap homi Israel on enebe abirangge kabog-dusareg iren de, “Nit mundoho siag neg duruk katuhukmu,” ulug fak duruk kwit de siburu na fug angge hweang welatswa. Airoho wereg lit ap homi fomane en de, “It enenda wat-dauk kwit dehesa,” ulug eneg aleroho re enunggulmu ul belaboho sum belahi sum karung on wandoho welatswa. Airoho dusareg iren enesiag duswa on mel it enombasi en duruk katfag on mel mundoho fag-duswa.

³It airoho dusareg wereg kweleg, fobik en enebe unduhuk lit wereg kweleg de, Wene melaleg nenakni TUHAN Allah en hweag-esebag on anyo dindiloho hweag-esauk kweleg de jam henahan fam hagdoho welatswa. Ne, jam henahan ombolim on fam de iren enesiag duswa on mel, ne it enombasi en siag duruk katfag on mel mundoho fag-dil lausareg enorohole belabeg sahaun uruk kwit enakni TUHAN Allah mot-duswa.

⁴Airoho dusama etma e wirig doaleg ap Lewi on enobahet wereg ma, at Yesua ha, Bani ha, Kadmiel ha, Sebanya ha, Buni ha, Serebya ha, Bani ha, Kenani ha emberimmu lahausareg unduhuk lit somban enele hum fam enakni TUHAN Allah fam somban uswa.

⁵Airoho uswareg de nukoho ai salim de ap Lewi on de, hun Yesua ha, Kadmiel ha, Bani ha, Hasabneya ha, Serebya ha, Hodia ha, Sebanya ha, Petahya ha, etan de ap homi Allah mot-dukwag ulug hweag-esauk kwit iren diroho uswa, “Henebe inatlug de nenakni TUHAN Allah mot-dukohon! Nenakni At mot-duruk kwit neg wereg on anyo mot-neg duruk kamul! It eke re we dorangge hag mot-enebuk alereg famen de, At neg de unuk mun humon di kwe su kwe en unuk neg uruk on anyo mot-duruk kamul!” ulug hweag-esausa.

⁶Airoho uswa ma it ap homi Israel on en somban uruk kwit diroho uswa. “Nenakni TUHAN hamik-hamuneg welahen, Haren neg sohwalanggen wal-deheg, o bul kwe huli-huli balegma etma wereg on wal-deheg, dirihin. Airoho dirihindeg ik laut wal-dirihindeg kwenang inim ne kwenang emberim fam wereg angge nim wal-dirihindeg, oluk welamag ulug debeheg, ne Haren hwalduk kaheg duruk kahen. Airoho waldoho feserihin on bohol fam etma enomamne humon wereg on en Hat hapma sebe uruk, ne iren Hat hapma sebe ulug enelenggen dimiroho enorohole belabeg sahaun uruk kwit leho hobaharuk, nenakni.

⁷ Nenakni TUHAN Allah hamik-hamu neg welahen. Haren neg at Abram ap homi at unggul unuk on sahalimu en momaldihin. Airoho momaldihin deg at obam o Ur ebe Babel fam etman Hat hebe en walug-walug waharihin. Airoho dirihindeg eta li em en de Haren at unuk keron Abraham soal-itihin ai nenakni.

⁸ Airoho soaloho ferihin mu at ebe Hat hobam dipdeg lit, hele holoho neg durukmu hauk katihin ai. Airoho durukmu hauk kwit Haren wene demdoho on inim sali watuk kwit de, ap homi Kanaan on enobam mel, Het on enobam mel, Amori on enobam mel, Feris on enobam mel, Yebus on enobam mel, Girgasi on enobam mel, mundoho etma re haren ondohoma on enebe abirangge akni atlug welamag ulug, og-huruhuk ulug abug og-itihin. Hat de hebe dipdoho neg duruk kwit katukdoho on neg duruk kahen ai fam de, hat og-huruhuk ulug abug og-itihin on ai abirangge dipdoho neg debeserihin, nenakni.

⁹ Nit nenombasi en o endam etma anggin-fanggin hauk katfag ale Hat hil esauk katihin, ne iren o Mesir fam en nim o ik Laut Teberau fam en inim oba yatuk katfag on etma hesanggo holduk katihin.

¹⁰ Enele airoho holdihindeg, Hat homaliki fam di anggin su anggin feseruk katfag ale ai hil-esalug, raja Mesir on mel, at autsi pegawai mel, ap homi o etma wereg on mel, mun nik-nak aleroho debeserihin. Airoho debeserihin ai fam de Hat hunuk saha-faha uruk kwit ketia huli wereg ai.

¹¹ It homaliki enebe wilibik lowag ulug de ik laut Haren bul biatihin, Airoho debeserihindeg Haren it enebe ik ahum kwenang iringgig kwe eneyog dombon angge og-eneplug nindig-atihin. Ne, it enaselei on en it enebe enowatul ulug mug-eneplug watfag on etma re, helep anggen ik laut ahum namum-hamum deg on fam obukdoho wamburuk ai hag obuk ebag.

¹² Hat hebe o nukoho re anggulog fam inatlug melal-enepil waharihin, ne o hup anggo re indok on fam inatlug kobokwe lowag ulug selehap enepil waharihin.

¹³ Hat hebe re bohol fam en Dom Sinai fam wambik waharihindeg, Haren it homaliki on hinim hele irihin. Haren de it enobam wene melaleg mel, wene diroho diyug suroho diyug ulug mel, wene diroho duruk kamuhup ulug mel, komo enebeheg, hele demdoho ulug mel, dipdoho neg duruk kamag ulug mel hweag-esauihin.

¹⁴Ne, nukoho sabat Hat honggwareg fahet neg eneg wereg on anyo iren ebetuk kamag ulug hweag-eseheg, Ne, wene melaleg anyo Haren hamingming angge Musa fene en og-eseheg, dirihin.

¹⁵ It enesiburu dot deg en, it enesiburu nelareg ma, Haren roti bohol fam en belap-esa waharuk katihin. Ne, it enebe ik nelareg ma, ik helep mun wirik haro on ilonggoma en Haren ik eleruk hwaloho og-esauihin. Ne, Haren de, o etma hit akni amuhup en og-hesahuk ulug hombuk baloho abug og-esauihin mu etmano, enebe kwik lowag ulug hweag-esauihin.

¹⁶ Famen de nit nenombasi etman enenda mun omamne atlug enenda leho fahat-dauk katswa, ne Haren diroho diyug suroho diyug ulug hweag-esauk katihin on etmano iren holoho duk fug angge welatswa.

¹⁷ Haren di ale su ale fahet fanoroho neg debeseruk katihin on etma mel, ne along on duk fug alereg on duruk katihin etma mel, holoho duk ale enerim en de wong debeselug welatswa. It enawonog fam de it enowe ap eke en it enebe sombandoho o Mesir on enamingming angge welamuhup en og-eneplug feseik lowag ulug, eneko unduhuk fousa. Famen de ap homi en siag durukmu Hat Allah re elehapdoho feseheg, enebe henda hundig enebeheg, henda fano en debeseheg, hahummu ahe laharuk on sebe halug welaheg, duruk katihin ai. It enebe mundoho henda hundig enusug wereg lit de, enebe fotog-esa fug angge sen-enusug lit welatihin.

¹⁸ Iren kembu wam lembu ahut ilitdeg on wutswareg, iren uruk kwit de, ‘Nenakni Allah en nit ap homi Mesir on enapma enamingming angge hagdoho weregman og-neneplug wilibik wahasi on anyo ebe su ulug uswa on aire, ebe Hat Allah hebe mabenap hobaharuk kwit uswa!’

¹⁹ Airoho deg famen de Haren de mundoho henda hundig en, o leimu ap homi elegma etman it fotog-esa fug angge sen-enusug lit neg welatihin. Anggulog olomdoho lahabeg on ai fam de o nukoho angge kwebene og-enelug laheg, ne indok ai fam de o hup anggo enanggobokwe lauk kwe, selehapdoho og-eneplug laheg, bok am fug angge airoho og-eneplug waharihin.

²⁰Hat Haheime ebe on fam it mamul-enepuk katihin. Haren it enasiburu manna on bale fouk fug angge og-esaukmu nenggeg, enahaik obok deg ma og-esaukmu nenggeg duruk katswa.

²¹Haren de it enebe o leimu etma 40 tahun en fam sen-enusug lit wereg lit, di angge su angge it enangge eleg angge etmano higitdoho neg og-esauk katihin. It enesum wan-duruk on de dilip duruk katsi fug, Ne, it enaho nonggoleheg, fireheg, duruk katsi fug.

²² It ap homi enunggul unuk amu on o nit nenombasi og-esauihin mu oma huli-hulimu welatswa on, enalong elehap debeselug it fil enalong amag ulug debeserihin. Aire o Hesybon hun Raja Sihon en melal-enepuk katsi mu sebelik kwik waheg, o Basan hun Raja Og en melal-enepuk katsi mu sebelik kwik waheg, duswa ai.

²³ Haren de nit nenombasi etman ondohoma on de, sohwalanggen bohol fam wereg etma hagdoho debeserihin. Haren nit nenombasi hweag-esauk kwit, o etma hit welamuhup en og-hesahuk, ulug abug hweag-esauihin mu etma re suma welamag ulug mundoho og-esauihin.

²⁴ Iren ondohoma on en de ap homi o Kanaan suma on enalong elehap debeselug welamag ulug debeseheg, ap homi o etma wereg on enapma sebe ulug welamag ulug debeseheg, dirihin. It Hat homaliki etman de ap homi Kanaan on enunggul unuk domog mel, it enowesi raja mel fam, it enendan bolug ale neg enobam debesoukwag ulug homamne og-esauihin.

²⁵ It homaliki enomamne airoho debeserihin on etma fam de ap homi Kanaan on kwik wam no ulug fak lehet omamneroho oho on mel, enanggwenang sing fano on di angge su angge humdoho wereg ma mel, enobam, enangge di angge su angge wereg on mel, enahaik bohwe habulig on mel, ik hwaloho kwelabegma yenggeleg on mel, anggur yabuk mel, e zaitun yabuk mel, e foma anggen yihiruk on mel, mundoho sebel dausa. Airoho sebel daswareg di on su on anggen etma nauk kwit de enebe fihilig enap neg welatswa. Haren di angge su angge og-esauihin on etmano nauk wauk kwit welatswa.

²⁶ Famen de it Hat homaliki en de Hat hapma wereg lit hele holoho neg duruk wereg ale fahet enerim en de embeselug welaheg, ne Haren wene melaleg mel wene diroho diyug suroho diyug ulug mel hweag-esauihin on etmano embeselug deheg duruk kwit de, it ap nabi en hweag-esauk kwit, hit henepe hebel dalug de Hat enakni Allah hakit wamag ulug hweag-esauk katswa on etmano mundoho enowatuk katswa, ne iren de airoho enowareheg, Hat hebe enendaman seramap hobahakeg, duruk katswa, nenakni.

²⁷Airoho duruk katswa ai fam de Haren it enebe ap eneselei on en sen-enusug wereg lit di anggin su anggin enobam feseruk kamag ulug it enenggikmu feserihin. Airoho feserihin mu di anggin su anggin anggoloroho hauk kwit, Haren del nenebukwag ulug enele hwiroho hweag-hutuk katswa. Airoho duruk katswa ma re Hebe bohol fam en henda-enepihin deg, enele hesanggo holdihin ai, nakni. Ne, it eneselei on en sen-enusug welatswa on ai en loloho wilibi fesoukwag ulug ap enowesi melal-enepuk on mel, ap kaindeg enobahet duk alereg on mel mon-enebik waharihin.

²⁸Airoho mon-enebik waharihin mu iren del-enepswa ma re enobam enakol eleg angge fano wereg lit, famen de fobik en nikangge sombandoho siag duruk katswa. Airoho duruk katswa ma re Haren it ap eneselei on di anggin su anggin enobam feseruk katswa on ai enenggikmu feserihin. Famen, iren de fobik nit siag duruhuk ulug enenda ahamdoho del-nenebin ulug enele hum fam hayonggo fousa. Airoho fousama Haren it henda mundoho hundig deg lahen ai fam, hebe bohol fam en enele hesanggo hol-enepihin deg, del-enepuk kwit neg welatihin.

²⁹ Airoho del-enepuk wereg lit de wene melaleg Haren hweag-esauihin on anyo holoho neg duruk kamek ulug hweag-esauk katihin. Famen de it enonggwareg enenda leho fahat-dauk kwit wene melaleg anyo embeseruk katswa. It eneneda mun omamne deg lit de Haren wene melaleg hweag-esauihin on etma holoho duk eleg angge welatswa.

³⁰ It iroho siag neg duruk-wauk kwit wereg kweleg, Haren di tahun su tahun fam unggum enobam fesouk eleg angge hape moroho wereg lit komo-enepuk katihin. Haheime it ap nabi enobam wereg lit wene ai it enendama eberoho ulug hweag-esauk katsi. Famen de iren holduk ale nenerim ulug enesanggo lat-dauk katswa. Airoho duruk katswama re Haren it enebe ap homi di obam su obam enunggul unuk amu on enenggikmu feseruk katihin.

³¹Famen Hat hobabut de nit ap homi abirangge henda hundig nenepuk kahen on deg ma, it enebe mun elehapdoho fesouk fug angge welatihin. Airoho duruk kahen ale aire we Allah Hat hamu neg deg lahen. Hat hobabut mun fano en nit abirangge henda hundig-nenepuk kahen.

³² Nenakni Allah, Hat Allah hebe mun homamne on! Nit nenakni Hat Allah re mun humon fulu-bolan on welahen, nenakni! Hat hebe ninim dipdoho neg wereg lit, wene Haren diroho duruk karuhuk ulug abug hweag-nesauihin on ai dahan am no ulug higitdoho neg nenepuk kahen. Ap homi Asyur on enowesi raja en nenobam di anggin su anggin foruk katswa etma huli en ketia huli re di anggin su anggin neg hauk kahe. Ma re nit nenowesi raja mel, ap nabi mel, ap imam mel, nenowesi kaindeg mel, nenaknisi mel, nit ap homi nenebe abirangge mel, en di anggin su anggin hauk kahe neg. Ma re niren anggin fanggin hauk kahe on ai hapeleg atlug, mun hape wong debouk fug!

³³Niren mundoho siag neg duruk kweleg famen de Hat hebe nenobam dipdeg wereg lit, niren siag duruk on fahet Haren unggun nenobam feheg, ayo wit-nenebeheg duruk kahen on aire mun dipdoho neg duruk kahen.

³⁴Nit nenombasi en mel, nenowesi raja en mel, ap imam en mel, nenowesi kaindeg en mel, Haren wene melaleg hweag-nesauihin on anyo seramap debelug de holoho duk fug angge duruk katswa. Haren uruk kwit de diroho diyug airoho diyug ulug melal-nenepihin on etma mundoho mel, enenggali watihin on mel, hole folug duruk kam ale enerim deg latswa ai.

³⁵Haren it homaliki kwenang mun sing fanoma mun wiriloho yatdeg ma og-eseheg, enowesi raja en melal-enepuk kamag ulug unduhuk feseheg, dulug enebe fanoap debeseruk katihin famen de, iren Hat hamingming angge hagdoho atlug hat hobahet duk fug angge enobabut mun siag ale on neg duruk kwit de, enobabut mundoho aham duk fug angge kwasikdoho neg duruk katswa ai.

³⁶Aireg famen de ketia nit nenanggwenang sing fanoma it nenombasi og-esauihin on etmano, nit akni ahun atlug di on su on yako nauk kam on de ap homi fomane enamingming angge atlug welahe ai.

³⁷Niren siag duruk kahe on ai fahet unggum nenobam fouk hag de it ap homi amu on enowesi amu on etma nit homaliki hwal-nenepuk welamag ulug unduhuk feserihin mu, hwal-nenepuk wereg lit di on su on yaho on mel, ebe endereheg, anggen baleheg, durukmu, iren enele omamneroho hweag-nesauk kwit de nit nenobahet nenobaharuk kamek ulug ningdoho urukmu feseruk kahe. Hiren melal-nenepuk kwit de iren enendaman bolug diriek suriek ulug hweag-nesauk. Ai fam de nit ketia mun siagdoho wereg lit di anggin su anggin hauk kahe, nenakni,” ulug somban ebag.

³⁸Somban airoho ebagdeg iren uruk kwit de, “Nit ap homi Israel on en diroho duruk kamuhuk ulug lisu baloho foruhukdeg de nenowesi melal-nenepuk on mel, ap Lewi on mel, ap imam mel, enenggik ahalue foukwag ulug hweag-esauhukmu airoho fousa.”