Read Ninia Yali ESTER 2 Bible Online

ESTER 2 - Ninia Yali bible

ESTER 2

¹Airoho ebagdeg il eke wereg latfagdeg, eta li em at raja olok debag ale anyo eke nim olok duruk katfag fug famen de, aren de hwe Wasti en debag ale anyo mel, airoho hapmin fug ulug ebag ale nim anyo fahet ebetuk kwit neg welatfag.

²Ai fam de ap wene komo uruk katfag enap at raja inim horogdoho deg on etmano en wene diroho hweag-etfag, “Nenakni hat hobahet hwelani enebe inil aluli buhun on heraruhup fano.

³Anggere nenakni haren de ap pegawai in eneplug de o hat hapma wereg on au fam en Propinsi abirangge etma fene en hwelani enebe inil aluli buhun on hweag-eneplug de, enebe og-eneplug raja wereg ma o Susan oma wamuhup. Ne, airoho wamuhupmu re at Hegai hun raja hobam etman it homi enobahet kepala welamag ulug eyabuk eneko wereg ahun ai en de it enebe hwal-enepuk kwit de enebe inil aluli mun buhun on amag ulug debeseruk karuhu.

⁴Airoho debeseruk karuhumen de nenakni haren hwele duhum hat henda nauk on momal dalug de at ai hwe Wasti obalma hat hohweap dahun,” ulug hweag-etfag. Airoho hweag-etfag ma re at raja en de it wene komo uruk enap etmano en ebag ale anyo fano bebagdeg, wene ebag on etmano higitdoho neg debag.

⁵O kota Susan ai fam de ap Yahudi on misig eke unuk de Mordekhai hun Yair amloho ai welatfag. At aire unggul unuk Benyamin on, hun Kis mel, Simei mel enambiangma on welatfag.

⁶ At Mordekhai ebere hun Nebukadnezar ap homi Babel on enowe raja anyo en o Yerusalem sebeloho foruk kwit etmano sabu hetdoho walug lebag ahun. At Mordekhai ebere hun Yoyakhin raja Yehuda on anyo mel, ne it ap sabu het-eneplug lebag on amu on mel o Babel etma feseik lebag.

⁷At Mordekhai aire erek hwele angge at akni are en ondoho on eke unuk de Ester ai ne unuk it Ibrani enele on fam de Hadasa ai welatfag. Hwele aire orohole re il aluli siban deg lit ebe ohore mun buhun-bahan deg latfag. At Ester ebe isinga akni mel de mundoho waratfag ma re, at Mordekhai en aeg debagdeg, at onggwareg omalik on hagdoho kulduk katfag.

⁸Airoho wereg ma re at raja en wene melaleg wilipfag on anyo unduhuk feil lebag ma re hwelani duhum on humdoho o Susan etma kabog-dik watfag. Ne, at Ester oho it enesahalimu etma welatfag. Airoho wereg ma re at oho hondoholug de hun raja obam silimu etma lebag hun Hegai it homi enobahet kepala o raja obam etma hwal-enepuk katfag on anyo fam domohe febag.

⁹Airoho feik lebag ma re at Hegai en de hwele Ester anyo fahet yande-debagdeg de at fam endareg latfag. Airoho deg lit de aren hwele Ester anyo enebe buhun atuk on debeheg, nauk angge oho amu eneko og-ereheg, debag. Airoho debelug de at Ester anyo re ebe etano en hondoko re o hun raja obam en sili it homi fahet weregman obale mun ebema etma feik lebagdeg, hwelani enebe sabiren angge enebe raja obam etma wereg lit yabuk duruk kwit de mun fisagdoho neg duruk on fam hwele anyo obahet duruk kamag ulug fesebag.

¹⁰Airoho wereg ma re at Mordekhai en hwele Ester anyo komo-duruk kwit de, “An nebe Yahudi nahaloho uk fug,” ulug ebag ma re aren ap homi hweag-esauk katfag fug.

¹¹At Mordekhai anyo re nukoho di salim su salim de o homi enobam bumbuk anyo olohore kwe etmano men-men angge lalug de hwele Ester anyo ebe deg ale mel, ne ebe keroho duhup ulug mel hein-og-enebik lauk katfag.

¹²Ne, wene melaleg welatfag on fam de hwelani etmano fam de it enebe buhun amag ulug de tahun misig hunduko wereg lit buhun-deberuk katfag. Aire bigalem folfalik en fam de ahalue no kemenyan inim hahambik deg angge fam buhun-debeseruk katfag, ne bigalem folfalik en ombolim on etano fam de ahalu hahambikdoho amben angge amu-amu on inim fam buhun-debeseruk katfag. Airoho debeserukmu re it hwelani etmano re eke dam eke fobik kwik lowag ulug wenaho aleroho re hun Raja Ahasyweros akit kuruk katfag.

¹³Ne, it hwelani etmano misig eke en raja wereg ma kwikoho halug de aren ebene nangginig on wan-damin boruk ale omanoroho neg wan-dalug kuruk katfag.

¹⁴Airoho wan-dil lauk em de at ebe walug de o hupanggo raja obam kwik lalug de likia re o bumbuk eke on fam feik laukmu re hun Saasgas, hun raja amingming angge on fam en ohwesiap dauk on etmano hwal-enepuk kamag ulug wereg on anyo akit feik lauk katfag. Airoho feseik laukmu wereg ma re hwele duhum anyo re at raja en endaman bolug unuk yiko wol-duruk halug de ekenim kuruk katfag famen de eleg halug de kuruk katfag fug.

¹⁵Airoho duruk katfag ma re, at Ester hun raja wereg ma kwik lauk ale higit aik lebag. At Ester aire hun Abihail ahaloho at Mordekhai akni are en ondoho on deg ma re erek famen de aren onggwareg omalik hagdoho aeg debag; Hwele Ester aire ap homi en at fu hil lauk kwit de yanderuruk katfag. Ma re at Ester ebe raja wereg ma kwik laukmu re, asum de hun Hegai raja obam etmano en bumbuk hwelani fahet on fam wereg lit hwal-enepuk katfag on anyo en diroho wan-dimihin ulug ebag aleroho neg wan-debag.

¹⁶Airoho wan-debagdeg de at hun Ahasyweros raja inatfag huli en de tahun sabit on ne bigalem de num on, bigalem unuk Tebet ai wereg kweleg, at Ester ebe hondoholug raja wereg ma kwebag.

¹⁷Kwebagman de hun raja en kumu hebag ma re, hwelani duhum amu on etmano re maben hag deg kweleg at Ester neg de at endama aleroho deg ma enda ahayeg boruk ale on deg ma hebag. Ai fam de raja en hwele anyo fam enda nebag. Ma re raja en de mahkota ap raja wereg lit enunggulmu bug deg on anyo Ester unggulmu bug debebagdeg, at Ester anyo re hwe Wasti obalma hun raja ohweap debag.

¹⁸Airoho debagdeg de hwe Ester anyo along bolug leho foruk kwit de at raja en soni pesta humon esetfagdeg, ap pegawai mel, it kaindeg mel enayonggo fesebag. Ne, aren de o at along apma wereg kwe etmano ne yabuk kel waroho[3] welamluhup ulug unduhuk feheg, onggo enahayegdoho ulug di on su on hum-hamdoho yohwan deheg, debag.

¹⁹Airoho duruk kwit etare at Mordekhai ebere hun raja en de o etma fahet pegawai welamag ulug unduhuk febag.

²⁰Ne, at Ester en oho re at ebe Yahudi ahaloho anyo fahet de Mordekhai en komo-debag aleroho re, at Ester en de at ebe dotdeg li em erek hun Mordekhai anyo en ebag ale anyo hole febagdeg de, ‘An nebe Yahudi on,’ ulug de owan hweag-esauk katfag.

²¹Nukoho misig salim de, at Mordekhai anyo yabuk o raja ebe wereg ma etmano duruk kwit weregman de, it ap biren angge hun raja apma yabuk eneko duruk enap, enunuk de, hun Bigtan nim, Teres nim en Raja Ahasyweros mun enerim boruk kwit de ebe watul ulug enele seberoho abug balfag.

²²Airoho balfag man de iren dul ulug weim abug ebag ale anyo re at Mordekhai oluk atfagdeg de at Mordekhai en de Ester hweag-irik lebag. Airoho hweag-irik lebagman de at Ester en nangno ha fug angge re folo-folo at Mordekhai oluk atfag ale anyo re hun raja hweag-irik kwebag.

²³Hweag-irik kwebag ma re wene anyo fahet ka baldil-baldil duruk men de demdoho deg ma hebagdeg de, at raja en wene melaleg ebag ale higitdoho re ap biren etano unggum de enebe e fam suknoho fesebag ma, re wene atfag ale aire buku kerajaan ai fam di ale su ale atuk on fahet baloho foruk katfag on anyo fam baloho febag.