Read Ninia Yali ESTER 5 Bible Online

ESTER 5 - Ninia Yali bible

ESTER 5

¹At Ester ambilik hweang welatfagdeg nukoho henahaneg on anyo fam de asum raja enohwesi en wan-duruk katfag on anyo wandoho re, o hun raja ebe wereg ma anyo en olohotma etano lebagdeg de sokole hun raja kuruk on anyo olohotma unduhuk latfag. Ne, at raja re hweriatuk angge takhta anyo emberimmu alukwe sok fil deg lit hwerieg latfag.

²Airoho hwerieg lit fu hauk men de hwe Ester anyo dagma unduhukmu hebagdeg de, at raja en hwe anyo enda hebagdeg de andomuk emas on anyo ibil bil hebag. Bil hebagman de Ester anyo hihiloho inaik watfagdeg de, domuk anyo ambiang bal ha watfag.

³Airoho bal hebag ma at raja hein og-hauk kwit de, “Nohwe nunggwe ale eke wereg en? Ne, hat de nunggwangge henda? Hweag-nimin! Haren an nobam kerajaan haren melal-enepuk kahenma au bul kwe minggiroho og-nimin ulug heng-napmihin halug ohore an den og-hitmin,” ulug hweag-etfag.

⁴Ai ebag ma at Ester en onggo uruk kwit de, “Nakni haren fano boruk kahen halug de, o yoho hup su fam nakni hat inim, hun Haman inim an hamingming angge en soni pesta nakni hobahet esetmin ai fam nakoho wamluhup,” ulug hweag-etfag.

⁵Airoho hweag-etfag ma re raja en de, hwe Ester en enayonggo fesebag on anyo fam lakoho re Haman folo-folo wamag ulug yonggo febag. Ma re it anyo hwe Ester en soni pesta esetuk mu anyo watfag.

⁶Watfagdeg de it enebe anggur ahaik nauk kwit etano, raja en Ester fam de, “Ketiare hat henda angge ai hweag-nimin. Haren di angge ulug heng napmihin angge aire, o an den melal-enepuk kahimu oman bul kwe minggiroho famen oho re og-hitmin!” ulug hweag-etfag.

⁷Ai ebag ma Ester en onggo uruk kwit de,

⁸“Nakni haren hendama fano behen halug de, an hamingming angge en heng-hapmin on su holiyug. Nakni hat mel Haman mel de an soni o sono hup eseruhuk on fam wamuhup fano. Soni ai nauk kwit neg de, an hamingming angge en di angge nenda ulug hobam heng uhuk,” ulug hweag-etfag.

⁹Airoho ebag ma re Haman anyo hwe Ester en soni esetfag ma nebagdeg de endama mun ahayegdoho beil lebag. Famen de at Haman ebe o raja wereg ma kwik laukmu sokolma etano aik lebagdeg duruk men de, at Mordekhai anyo en de inatlug at along bolug leho fouk fug angge wereg ma hebagdeg, de at olok humon atfag.

¹⁰Famen de aren di ale su ale duk fug angge enda sebel halug de obam lebag. Obam lebagdeg de at Haman en de ori omano kabog-dik wamag ulug hweag-esebagdeg de, at ohwe Zeres anyo oho it ininim seberoho hwerieg lamag ulug hweag-etfag.

¹¹Airoho hwerieg wereg ma re at Haman ele en wiril hauk kwit de angge di angge su angge wereg ale fahet mel, omaliki ap humdoho wereg ale fahet mel, raja en yabuk leho on welamag ulug og-nitsi ulug mel, it pegawai amu on enunggul unuk sebeleg kweleg at neg de unggul unuk leho on wereg ulug mel, onggwareg en leho fahat-dauk kwit hweag-esebag.

¹²Airoho hweag-esebagdeg aren eke uruk kwit de, “Hwe Ester en ohore we an nim hun raja nim neg soni nit nenobahet esetsi on ai na wamag ulug nenayonggo fesi, ne o sono hup oho nikangge nit nenayonggo fesi.

¹³Famen de, at Mordekhai ap Yahudi on ai o raja kurukmu sokolma eta hwerieg wereg kweleg de di on su on etma re nobam atuk fug,” ulug ebag.

¹⁴Airoho ebag ma holfagdeg at ohwe nim at ori nim etmano en de wene diroho obam ebag, “Ap en e unduhuk ap boreberuk on yatdoho re 22 meter en hilinggukwag ulug hweag-esakin. Airoho hilinggi folug de e ai fam at Mordekhai ai boreboukwag ulug at raja fam heng iyug. Airoho debehundeg neg de hat hebe soni pesta ai fam henda hambukdoho lahun,” ulug hweag-etfag. Airoho hweag-etfag ma re at Haman en de wene nobam ehesa on aire fano bebagdeg de aren de e ap boruruk on anyo folo-folo wirukwag ulug hweag-esebag.