Read Ninia Yali ESTER 6 Bible Online

ESTER 6 - Ninia Yali bible

ESTER 6

¹Airoho hweag-etfag ma re hup anyo salim de hun raja ebe hup nohouk fug ale duruk katfag ma re, aren buku ap homi debag ale baleg latfag on walug bilinggukwag ulug hweag-esebag.

² Bilinggukwag ulug hweag-esebag ma bilingguruk men de, it ap yabuk hunduko duruk katfag enap, hun raja ebe nohorukmu anyo fahet kahaleg latfag enap, hun Bigtan inim Teres inim etano en de hun raja ebe waruhuk ulug abug balfag ale fahet de hun Mordekhai en olukap debag ale fahet baleg wereg ma hebag.

³Airoho deg ma hebagdeg at raja en hein og-esauk kwit de, “At Mordekhai en disi on ai fahet onggo og-ereheg, ne dangdoho leho feheg, de duswa?” ulug hein og-esebag ma, It amingming angge obahet duruk on etmano en hweag-utuk kwit de, “At de di angge su angge eke ulug oho og-utswa fug,” ebag.

⁴Airoho ebag ma at raja en uruk kwit de, “An nobam olma etma re ketia ap pegawai sa wereg?” ulug ebag. At airoho uruk li em etano at Haman anyo en de, “Ap Mordekhai anyo e wiri fehi angge fam borebemin,” ulug raja olukapdoho hweag-itmin ulug de o raja ebe weregman silimu etano kwik lebag hag hein og-esebag.

⁵Airoho ebag ma, at raja amingming angge etmano en uruk kwit de, “Haman de nenakni hat hakit kwik watmin ulug wahareg oluluk wereg,” ulug hweag-etfag. Airoho ebag ma at raja en de, “Kwik wamagdoho hweag-emek,” ulug hweag-esebag.

⁶Ai ebag ma re at Haman anyo kwik lebag ma hun raja en uruk kwit de, “An den de ap eke fam alongdoho leho femin en ulug duruk kahi, anggere an den nangginig on dihi ha alereg?” ulug hweag-etfag. Airoho ebag ma at Haman en wenggelduk kwit de, “Raja ap eke alongdoho leho femisi on aire ap eiya sa eke wereg angge? We an fahet eheik!” bebag.

⁷Airoho bebagdeg aren onggo uruk kwit de, “Ap ai obahet de sum log sum hun nakni honggwareg en wan-duruk kahen on anyo wag lalug de, kuda nakni haren on anyo fene re mahkota hag angge[5] etmano borebeil lakiyug.

⁹Airoho debelug de ap kain on misig eke unggul unuk ahun en sum ai hun nakni haren ap alongdoho leho femihin on ai fam lahabe folug de, wam kuda nakni haren ai fam de hondoholug o kota sili kwe lauk katmisi. Airoho laukmu re ap kain on anyo ap kuda fam lauk on anyo alukwema lauk kwit de, ele diroho il lauk katmisi, ‘Ap en at raja along bolug deberuk on fam de raja en de diroho debeseruk!’ ulug il lauk katmisi,” ulug hweag-etfag.

¹⁰Ai ebag ma raja en Haman fam uruk kwit de, “Sum ai mel, kuda ai mel folo-folo wag lalug de, hun Mordekhai ap Yahudi ahun ai fam alongdoho leho foruk ale ai debeiyug. Aire misig eke belabe fouk eleg angge haren ehen ale etanoroho neg diyug. Ne, at ebere o raja obam silimu kwik waharuk on fam sokolman olohotma hwerieg wereg ma hamihin lit deg,” ulug hweag-etfag.

¹¹Ai ebag ma re at Haman en de sum wan-duruk on mel, kuda mel, etmano webagdeg de sum anyo hun Mordekhai fam wan-debebag. Wan debebag ma at Mordekhai anyo kuda fam lahabag ma re Haman en de o kota bumbuk kwe hondoholug lauk kwit de diroho il lebag, “Furiek, ap en hun raja along bolug deberuk on fam de at raja en de diroho enalong leho feseruk,” il lebag.

¹²Anyo airoho dil lebagdeg de at Mordekhai anyo nikangge hun raja kurukmu sokolma etano watfag. Famen de at Haman anyo re we hwaleg eleg angge ap homi en inil neano ulug de enggali en de orohole saloho siag-biag obam lebag.

¹³Lebagdeg de aren ohwe nim ori nim fam de wene atfag ale etmano mundoho dindil esebag. Airoho ebag ma it at ohwe mel ne ori enggat enap etmano mel en uruk kwit de, “Hun Mordekhai aire Yahudi ahun deg angge re haren at sebeloho fehen ha fug alereg, aren hat halong elehapdoho hobahauk alereg. Ne, hat de at Mordekhai mundoho along on atuk kwit hat homamne eleg ahen ai,” ulug hweag-etfag.

¹⁴It airoho enele Haman nim matuk kweleg de it ap raja weregma yabuk duruk enap omano hwaleg eleg angge watfagdeg Haman hondoholug de hwe Ester en soni esetukmu anyo lebag.