Read Ninia Yali KELUARAN 1 Bible Online

KELUARAN 1 - Ninia Yali bible

KELUARAN 1

¹ Hun Yakub unuk eke Israel soaleg welatfag on anyo, at omaliki nim, ne it omaliki enohwesi enomalik inim domog o Mesir lebag on de enebe su:

²Ruben, Simeon, Lewi, Yehuda

³Isakhar, Zebulon, Benyamin

⁴Dan, Naftali, Gad, Asyer

⁵At Yakub omaliki, aire enebe abirangge seberoho re, 70 en lebag. Ne, at Yusuf neg de atam o Mesir lebagdeg welatfag.

⁶Airoho lebagdeg wereg lit li eke nim welatlug at Yusuf ori mel anyo mundoho waratfag. Airoho it fomane at Yusuf nim ambine on omano oho mundoho waratfag.

⁷ It airoho waratfag famen de it ai en ondohoma on, it Israel enap anyo re enomaliki, enombasi hum-hamdoho endag-ail lauk kwit misiham enebe humdoho saha uruk katfag. Ai fam de o Mesir kwenang fam anyo iron neg hopo uruk katfag.

⁸ Airoho atuk kweleg de, ap raja keron eke at Yusuf apeleg on inatfagdeg o Mesir fam etma melal-enepuk katfag.

⁹Melal-enepuk kwit de aren it ap homi Mesir on omano fam hweag-esauk kwit de, “It ap homi Israel on aire nit nenebe maben deg kweleg, it neg de enebe mun humdeg lit, enomamne oho mun hum deg ma re it fahet de mun namelmeldeg.

¹⁰ Aireg angge, dog abukohon ulug uk men oho, ite nit ninim abukoho re ap neneselei on mel misig sebe uk alereg. Airoho atuk kwit de, o kwenang su embeselug wilibuk alereg ma,[1] it enebe hum-atuk kwit neg wereg ale ai airoho neg welam no re niren nangginoho debesehuk ulug wenggelukohon lahe,” ulug hweag-esebag.

¹¹Airoho hweag-esebag ma re it ap Mesir on en de ap homi enunggul unuk Israel on anyo enebe wereg ale mel, anggilik-anggoloroho welaheg, yabuk oho mun enomamne fam duruk kamag ulug debeseheg, duhuk ulug de, ap inil wereg lit kahal-enusug lamag ulug unduhuk fesebag. Airoho debesebagdeg de it Israel enap anyo en at raja Mesir ahun anyo fahet o kota Pitom mel, Raamses mel, sum di angge su angge foruk on fahet indip etma welaruhu en wiriek ulug enomamne hasimeg mingming-enepfag.

¹²Famen de it ap homi Israel on anyo enobam anggin-fanggin feseruk kwit sebeloho feseruk kweleg de it ap homi Israel on anyo enebe eke inim dopno uruk kwit de, enebe o Mesir kwenang fam omano mundoho sahail lauk katfag. Airoho sahail lauk en de it ap homi Mesir on anyo enakol hum atfag.

¹³Airoho enakol atuk kwit de it Mesir on anyo en de it ap homi Israel on anyo fam enolok hasimeg ale neg debeseruk kwit sebeloho feseheg,

¹⁴ne enebe wereg ale mel, mun anggilik-anggoloroho welamag ulug mel debeseheg, duruk katfag. It enebe enenda esa fug anggere, enele omamne fam yabuk o wireheg, kobokwe yareheg, kok wireheg, duruk on omano hag on deheg, yabuk siburu yabuk on wireheg, duruk kamag ulug hweag-esauk katfag.

¹⁵Airoho duruk kwit de, nikangge at raja Mesir on en it homi Ibrani on enomalik endetuk mu let-enepuk kamag ulug welatfag on, hwe Sifra mel, Pua mel, etano fam wene melale feseruk kwit de,

¹⁶at raja Mesir on anyo en de diroho hweag-esebag: “Hiren it homi Ibrani homi enomalik endag-daukmu let-enepuk kwit halug de, wene su ebereg lamuk: Omalik endag-atuk on ai lahe ap angge halug de ebe binggi wariyug! Famen de omalik endag-atuk on ai lahe hwelani angge halug de oluk welamag ulug embeseiyug,” ulug hweag-esebag.

¹⁷Airoho melal-enepfag famen de, it homi biren etare Allah fam enakol boruk katfag ma atlug de, at raja en wene melale fesebag ale anyo embeselug de omalik ap angge endag-atuk on omano abirangge enoluk feseruk katfag.

¹⁸Airoho duruk en, hun raja anyo en it biren etano wol-enepfagdeg, watfag ma hweag-esauk kwit de, “Hit de nunggwe ulug omalik ap angge etma enoluk feseruk kahep?” ulug hein og-esebag.

¹⁹Hein og-esebag ma iren onggo hweag-utuk kwit de, “It homi Ibrani on de homi Mesir on hag deg fug mu. Ite seroho neg enomalik endag-dauk. Ne, it homi let enepuk on ai owan waharuk eleg kweleg ohore it folo-folo enomalik endag-dalug wereg,” ulug, hweag-etfag.

²⁰Ai fam de, it homi etan Allah leho foruk katfag ma Allah en homi enomalik fahet let-enepuk katfag on etano fanoap debesebagdeg it enomaliki ondohoma on og-esebag. Ne, it ap homi Israel on anyo ohore humdoho endag-atuk kwit de, enomamne hum atuk katfag.

²² Airoho duruk ale en de at raja en wene ap homi Mesir wereg latfag on abirangge melal-enepuk kwit de, “It ap homi Ibrani on enomalik ap angge ket-endag-atuk on halug de, Ik Nil ahummu yalik lakiyug, famen de it hwelani omalik on halug de oluk welamag ulug embeseruk kamuk,” ulug hweag-esebag.