Read Ninia Yali KELUARAN 10 Bible Online

KELUARAN 10 - Ninia Yali bible

KELUARAN 10

¹TUHAN en Musa hweag-utuk kwit, “Raja weregma lakin. An den de along on humdoho it enesahalimu en duhuk ulug at raja nim autsi apma yabuk duruk on nim, enunggul owag haro deberihik.

²Ne haren hombawi-homaliki fam dindilesauk kwit, TUHAN en it ap homi Mesir on fam di along su along duruk kwit lal-fal esasi, ulug dindilesauk karuhun. Ai fam de hit mundoho en we, An neg TUHAN wereg, ulug henoluk amuhup,” ulug hweag-esebag.

³Airoho hweag-esebag ma re Musa nim Harun inim raja weregma lebagdeg, hweag-utuk kwit de, “It ap homi Ibrani on enakni TUHAN Allah anyo en uruk kwit de, Hat hebe An nele holoho napma sebe uk fug angge neg weregman de ke huli welaruhun? An nomaliki etma An nobam somban ik lowag ulug fotog-esakin.

⁴Ne, haren An nele holuk eleg angge embeseruk neg karuhun halug de, An den sono bulue hat hobam etma mondorik waruhuk.

⁵Mondorik waruhuk mu, o kwenang orohole mun enameg eleg ma it bulue mun hum-hamdoho etman saleg laruhu. Ne, di angge su angge yaho on mel e wilibig on mel osit lumbiag en watsi fug on etma bulue etman eleho fohup.

⁶Hat hobam silimu mel, it hapma yabuk duruk on enobam olekwe mel ap homi enobam olekwe mel bulue amu neg saha uhu. Ai on hobam aik waruhu on aire mun fulu laleg ale it hambu-hombasi wereg li em oho airoho on eke atfag fug ale on duhu, isi,” ulug hweag-irik lebag. Airoho hweag-irik lalug de Musa anyo sombandoho lebag.

⁷Lebag ma it raja apma duruk on etmano en raja hweag-utuk kwit de, “Ap ai en nit nenobam anggin-fanggin foruk men neg de ke huli welaruhu? Furin, nit nenanggwenang fam su mundoho siag aha angge! Ap homi Israel on etma enakni TUHAN Allah obam somban ik lowagdoho embesein,” ulug hweag-etfag.

⁸Airoho hweag-etfag ma re it Musa, Harun inim etano nikangge raja weregma kwik wamag ulug wol-enepfag. At raja en it etano fam uruk kwit de, “Hit de henakni TUHAN Allah fam somban ik lahup fano. Famen de hit henesahalimu etman de ap sa-sa lahup?” ulug hein og-esebag.

⁹Airoho hein og-esebag ma at Musa en onggo uruk kwit de, “Nit nenebe abirangge lahuk. Nenebe sauwe on et ap sobal on et, nenomaliki mundoho nim, nenowam sapi, kambing, domba mundoho inim, niren nenakni TUHAN along bolug wene humon kabog-duhukdeg mot-duhuk en de nenebe mundoho lahuk,” ulug hweag-etfag.

¹⁰Hweag-etfag ma, at raja en uruk kwit de, “An de hit henomaliki et henohwesi henahwelani et og-eneplug lowag ulug fano hweag-hisihi ha fug alereg! Hiren heng ehep angge aire an den TUHAN fam hit fanoap henobahaukwag ulug heng uk hag heng-nabehep. Ai fam de hiren wenggelduhup ale aire mun kwasik ale wenggelduhup ale enameg ai.

¹¹Eleg. Hiren lahe TUHAN obam somban ik lahukdeg wamuhuk ulug henenda boruk kwit halug de we ap neg lahup!” ulug ebag. At raja en ele airoho hweag-esebag ai fam de it Musa, Harun nim etano muko wilibi fesebag.

¹²Airoho debesebag ma, TUHAN en Musa hweag-utuk kwit, “O Mesir emberim fam etma henggik lahabe fein. Bulue waharuk kwit di angge su angge a yaho on osit lumbiag en watsi fug on etma mundoho nahup,” ulug hweag-etfag.

¹³Airoho hweag-etfag ma Musa en andomuk anyo lahabe foruk kweleg TUHAN en hol mo indip fil en o etma fam firik wamag ulug febag ma, firulug waharuk kwit nukoho hundig hup hundig hol watuk kwit neg welatfag. O sekan dikoho duruk kweleg hubet etano hol en bulue

¹⁴ mun deg elegdoho walug watfag ma o Mesir kwenang fam etmano hopo ebag. Ap en bulue airoho deg ma eke hauk katfag fug. Ne ai watfag li en fobik airoho eke atfag fug.

¹⁵Bulue ai en o Mesir kwenang anyo abirangge sale febag ma re il mun sing deg latfag. Bulue omano en de di angge su angge osit lumbiag en watfag fug angge omano mundoho inim e anggen yihig on nim mundoho nebag. O Mesir kwenang fam mundoho etma e fam inim kwenangma inim enggela oluk angge eke wilibig latfag fug.

¹⁶Airoho deg ma at raja en Musa, Harun nim folo-folo wol-enepfagdeg hweag-esauk kwit de, “An den hit henakni TUHAN Allah fam inim hit henobam inim siag dihi.

¹⁷Ketia su fahet an nasiag henapelehapdoho nobahalug hukuman waratuk on su wowagdoho TUHAN Allah fam somban iek,” ulug hweag-esebag.

¹⁸Airoho ebag ma Musa raja weregma embeselug wilibik lebagdeg, TUHAN fam somban ebag.

¹⁹Airoho ebag ma TUHAN en hol anyo hwaloho mo obuk uruk fil en omamne humon feik watfag ma bulue omano firulug de ik Laut Gelagah[9] wereg ma etmano feik lebag ma re we dem misig eke oho o Mesir fam etma welatfag fug.

²⁰Famen de TUHAN en raja unggul owag haro debebag ma re, ap homi Israel on lowag ulug fotog-esa fug angge welatfag.

²¹TUHAN en Musa fam uruk kwit de, “Hat henggik lahabe fein. Lahabe femihin mu re o Mesir kwenang fam etma hup bin atmisi anggere,” ulug hweag-etfag.

²² Airoho ebag ma Musa enggik lahabe febag ma O Mesir fam etma nukoho henahanam hup bin deg latfag.

²³Airoho deg ma re ap homi Mesir on en di angge su angge inil hauk katfag fug. Ne, eta aireg li em de ap homi di kwe su kwe lauk katfag fug. Famen de ap homi Israel on enobam neg de seleg deg latfag.

²⁴Aireg ma at raja en Musa wol-debagdeg hweag-utuk kwit de, “Hit de henakni TUHAN obam somban ik lahup fano. Ne, henohwesi, henahwelani mel, henomaliki mel et lahup fano. Famen de henowam sapi, domba, kambing mel neg de walug lahup fug,” ulug hweag-etfag.

²⁵Airoho hweag-etfag ma Musa en onggo hweag-utuk kwit de, “Aireg halug de niren nenakni TUHAN Allah obahet og-utuk on mel, waroho yalduk on fahet mel, de wam nenakni Haren og-nesamihin.

²⁶Nit nenowam etma abirangge hwelalug lahuk, misig eke suma folug lahuk fug. Nenowam etma on en eke nenakni TUHAN Allah og-umul ulug eneruhuk. Lahukmu etman neg de wam ke on nenakni fahet foul ulug neneluk aruhu,” ulug hweag-etfag.

²⁷Airoho ebagman de TUHAN en raja ebe unggul owag haro debebag ma re aren ap homi Israel on lowag ulug hweag-esauk katfag fug.

²⁸At raja en Musa fam uruk kwit de, “Nil hanim dian hangge lakin! Eke nim horohole heahuk fug! An den hat horohole lohon heahukdeg en de hat hebe wareg nohokun!” ulug hweag-etfag.

²⁹Airoho hweag-etfag ma, at Musa en uruk kwit de, “We nowe Haren hele ehen higitdoho neg, nowe haren an norohole neahun fug lit deg,” ulug hweag-etfag.