Read Ninia Yali KELUARAN 11 Bible Online

KELUARAN 11 - Ninia Yali bible

KELUARAN 11

¹TUHAN en Musa hweag-utuk kwit, “An den de anggin-fanggin misig eke nim at raja Mesir on nim ap homi Mesir on inim enobam fesehuk. Ai mundoho aruhu mu neg de, hit lowag ulug fotog-hesahureg o suman muko wilibi henobahaku lit deg.

²TUHAN en Airoho duhu angge re haren it ap homi Israel on hwea-esauk kwit de, enelili angge emas mel, perak mel, ap homi it enobam inim eraroho wereg on enengge etma heng-enebukwag ulug hweag-esakiyug,” ulug hweag-etfag.

³TUHAN en ap homi Mesir on en Israel on fam enenda kain amag ulug debesebag. Ne, at Musa re it o Mesir fam yain-kain wereg enap en nim it ap homi Mesir on abirangge en nim along bolug leho foukwag ulug atfag.

⁴At Musa en raja fam uruk kwit de, “TUHAN en de diroho eheik, O hup andundu deg kweleg An o Mesir kwe etma noruk katmin.

⁵O Mesir suma en omalik ap omalik wandeba on at raja omaliki fam en de it homi gandum anggen luluhun duruk on enamingming angge huli hundomog mundoho waramlusa. Wam omalik en keram endag-atsi on halug oho re mundoho waramlusa neg.

⁶Ne, o Mesir ilonggo abirangge etma oba lenggu-lengga uruk on neg holduk kamlusa. Oba ai hag on o endam oho eke holswa fug ne fobik airoho eke aruhu fug.

⁷Famen de it ap homi Israel on wereg ma etma omalik wandeba oho wam wandeba on oho misig eke waramuhup fug. Ai fam hit en de, An TUHAN Allah en ap homi Mesir on nim ap homi Israel on nim aham debesi, ulug henoluk amuhup, eheik iyug,” ulug hweag-etfag.

⁸Ambiangma re Musa en uruk kwit de, “Hat hautsi hapma yabuk duruk on etmano en watlug an napma sebe ik waharuk kwit de, an ninim ap homi an nunggul unuk on nim en o kwenangma suma embeselug wilibik lowag ulug hweag-nirik waharuk kamuhup. Airoho duhupmu neg de an lahuk,” ulug hweag-etfag. Airoho hweag-etfagdeg de at Musa en olok mun hangdoho raja embeselug wilibik lebag.

⁹Wilibik lebag ma TUHAN Musa fam uruk kwit de, “An den o Mesir kwenang fam suma along on humdoho dukwag ulug de at raja en hat hele fu hobahamisi fug,” ulug hweag-etfag.

¹⁰It Musa, Harun inim en de along on mundoho at raja olohotma etman debag, famen de TUHAN en raja unggul owag haro debebag, ai fam de aren ap homi Israel on o Mesir en wilibik lowag ulug hweag-esebag fug.