Read Ninia Yali KELUARAN 12 Bible Online

KELUARAN 12 - Ninia Yali bible

KELUARAN 12

¹ O Mesir kwenang fam etmano en TUHAN en it Musa, Harun inim fam ele uruk kwit de diroho hweag-esebag,

²“Bigalem su re hiren tahun eke fam tanggal wenaharuk kahep on anyo en bigalem keram on aruhu.

³Anggere, hiren wene melaleg su ap homi Israel on abirangge fam hweag-esauk kwit de diroho iyug: Bigalem su tanggal 10 fam de ap on enebe domog en de wam domba omalik misig eke it enahain elekwe on nim waroho nahup en wahup.

⁴It ahain elekwe on etma lahe enebe dot deg halug de, it enobam sokole nikama on etma inim domba omalik ai seberoho nahup fano. Domba omaliki enebe nahup on wenaho ale eta higitdoho yohwan-duhup fano.

⁵Hit en de domba omalik halug oho kambing omalik halug oho eneruhup famen de ebe yohombuk on halug neg, ahapmale eleg on umur tahun misig deg on halug neg eneriyug.

⁶Hit ene folug foroho man tanggal 14 huli aik lahumu re ai salim o hupmu kwe etare, it ap homi Israel on enebe abirangge en domba omalik anyo watil lahup.

⁷Ware folug mep foma oko o it nahup obam ai o sokole fam lang owag foma-foma nim sok elaha kwe etle nim are deboukwag.

⁸Ai debelug, hup anggo ai salim de wam ino ebe weraho folug sayur asig on nim roti fituk angge ragi eleg on nim nowag.

⁹Domba omalik ai ebe abirangge unggul mel, enggik, eyog mel, ilonggoma angge mel ai weraho fohupdeg nahup. Ne, hiren ebe mep deg kweleg oho, ik fam hulugdoho osoho on oho, nahup hayog.

¹⁰Ino ai lohon dorangge oho wereg kweleg o sekan duhu hayog. Foma ani lohon wereg halug de, indok neg yale fesehup.

¹¹Hit nauk kwit etare kwe lahup on fahet henesum henebe fam mundoho wan-deheg, heneyogma sandal kwelabe feheg, henendomuk henenggikmu seneg laheg, deg lit nakiyug. Hit de folo-foloroho neg nakiyug. Ai soni Paskah An TUHAN nalong bolug mot-napuk on fahet ai duhup.

¹²Hup ai salim de An o Mesir kwenang fam etma noruk kwit omalik ap angge wandeba on neg, ap enomalik et wam di angge su angge omalik et mundoho enowaruhuk. An nebe TUHAN deg lahimu re o Mesir fam etma kembu on allah-ap debelug apne wauk on etma mundoho enowaruhuk neg.

¹³Mep hit henobam sok fene welaruhu on ai fam de o hit henebe wereg lahep obam anyo eneg deg laruhu. Ne, An den o Mesir fam unggum enobam foruk kwit ai, An den mep ai nil hahuk deg de hit henebe henowaruk fug angge sohwan-hesalug lahuk.

¹⁴ Nukoho ai fahet de hit en nukoho leho on ulug TUHAN obahet ebetuk kamuhup. Ai huli en angge fobik mundoho-mundoho etma tahun eke waharuk em hundig-hundig ebetuk kamuhup, eheik iyug,” ulug hweag-esebag.

¹⁵TUHAN en hweag-esauk kwit, “Hit nukoho sabit en hunduko ai fam de ragi foruk eleg on nauk kamuhup. Nukoho sehelet misig indip duruk kwit aire ragi mundoho henobam olman dagma neg wilibi fesehup, ne nukoho sabirenam eta fam ap misig eke en roti ragi wereg on nauk halug ap ai ebe An nomaliki on anyo boruk kamuhup fug.

¹⁶Nukoho sehelet misig angge nim nukoho sabit angge nim ai An mot-nabukoho hit humdoho kabog-duruk kamuhup. Nukoho eta salim de hiren nauk on fahet neg de fouk duhup famen de, yabuk hum ale nanggig on ulug eke duhup fug.

¹⁷Nukoho keram salim aire An den hit henunggul unuk on abirangge o Mesir en og-heneplug wilibik lahuk anggere. Ai fahet hundig-hundig tahun waharuk on fam nukoho ai fahet nukoho leho on ulug hiren ebetuk kamuhup.

¹⁸Bigalem keram on fam hup tanggal 14 en de tanggal 21 hup huli aire hiren roti fituk angge ragi wereg on eke nahup fug. Nukoho sabiren eta fam de fituk angge ai hit henobam olman mundoho wilibi fesehup. Ap Israel on oho ap bog on en oho nukoho eta fam ragi wereg on nauk halug de ap ai An nomaliki on boruk kam fug alereg, eheik iyug,” ulug hweag-esebag.

¹⁹

²⁰

²¹Musa en it Israel on enowesi melal-enepuk on etmano mundoho wol-enepfagdeg watfag ma hweag-esauk kwit de, “Soni Paskah eseruhuk en de hit henahain elekwe domog fahet domba omalik misig heheg wak laluhupdeg wariyug.

²²Hisop enggela musan enggela hag on het misig eke waluhup deg domba ai amep waruk baskom elma yohwaregma[10] yuhul halug de hit henobam o sokole foma-foma mel, sok elaha emberim kwe mel, are debehup. Hup ai en angge o hubet sekan duhu huli ai ap hit henesahalimu etman misig ulug oho eke foldongdoho wilibik lahu hayog,” ulug hweag-esebag.

²³ Ne, Musa en TUHAN ele hweag-esauk kwit, “At TUHAN en ap homi Mesir on enowarikoho o Mesir kwe mundoho lauk kwit etma TUHAN en mep ai sok foma-foma inim sokole elaha emberim fene inim areregma hahureg de malaikat enowatuk on anyo en henobam olma kwik watlug hit henebe henowarukwag ulug hweag-uruhu fug we sohwan-hesalug neg lahu.

²⁴Hit en mel it henomaliki en mel, wene melaleg ai furoho neg mundoho-mundoho etma hundig duruk kamuhup.

²⁵Ne, hit lahe o TUHAN en abug og-hesasi obam etma kwik lahupdeg halug ohore soni nukoho leho on ai fahet ebetuk kwit esetuk kamuhup.

²⁶Ne, it henomaliki en hein og-henepuk kwit, Soni su ebe nunggwe fahet duruk kahe? ulug, hein og-hesauk halug

²⁷hiren onggo hweag-esauk kwit de, Aure At TUHAN en ap homi Mesir on enomaliki ap on wandeba on neg enowatuk kwit nit de nenoluk lili nenobahasimu, niren TUHAN along bolug leho foruk At obahet Paskah wam waroho esetuk kahe! uruk kamuhup,” ulug hweag-esebag. Airoho hweag-esebag ma re it ap Israel on etmano enelenggen dimi-debelug kwenangma sahaundoho Allah mot-debag.

²⁸Airoho debagdeg de it enebe TUHAN en wene melaleg Musa nim Harun nim hweag-esebag ale anyoroho dik lebag.

²⁹ Hup andundu bul etma TUHAN en it ap homi Mesir on omalik ap wandeba on mundoho on mundoho enowatil lauk kwit, at raja omaliki fam en de it ap hele wareg sabu hetdoho wereg on enomalik huli enowatfag.

³⁰Hup anyo salim de at raja mel, at apma yabuk duruk on mel, it ap homi Mesir on abirangge mel, enoluk inatfag. It airoho inatfagdeg hol-hauk men de o it ap homi Mesir on enobam etmano en enomalik wandeba on ap angge eke waratfag fug obam eke wereg fug en oba lenggu-kululung urukmu holfag.

³¹Hup ai salim neg at raja en Musa, Harun nim wol-enepfagdeg hweag-esauk kwit de, “Hit henebe abirangge o suma en mundoho lakiek! An nobam nanggwenangma suma embeselug wilibiek! Wilibik lalug hiren an heng-napuhup ale hagdoho henakni TUHAN mot-dik lakiek.

³²Henowam domba, sapi oho kambing oho hwelalug lakiyug! Ne, hit lalug de an nebe fanoap nobahaukwag ulug oho heng iyug!” ulug hweag-esebag.

³³Ap homi Mesir on en, it ap homi Israel on folo-folo wilibukwag ulug mingming-enepuk kwit de, “Hit folo-folo wilibik laluhup fug halug de nit nenebe abirangge waramukoho lahe!” ulug hweag-esauk katfag.

³⁴Airoho uruk en de, it ap homi Israel on omano enowaruk panci roti fituk angge eleg on menenoho kwelap-heheg febag angge etmano sum kain fam hwililip-heheg webagdeg harulug lebag.

³⁵ Airoho duruk kwit de at Musa en hweag-esebag ale anyoroho iren ap homi Mesir on fam enelili angge emas mel, perak mel, it Mesir on enasum wan-duruk on mel heng-enepfag.

³⁶TUHAN en de ap homi Mesir on en it Israel on fam enenda kain amag ulug debesebag ma, it ap homi Israel on en heng-enepuk angge etmano mun enenda eleg og-esebag. Airoho debag ai fam de it ap homi Israel on en it Mesir on enangge di angge su angge enenggik wereg angge anyo hwelalug o kwenang ai fam en wilibik watfag.

³⁷Ap homi Israel on anyo o kota Raamses en wilibik watfagdeg kobokwe eneyog fam neg de o kota Sukot aik watfag. It enebe wenako homi mel, omalik mel wenaho eleg angge re 600.000 en.

³⁸Iren de enowam sapi, domba, kambing mel hum-hamdoho hwelalug wilibik watfag. It wilibik laukmu etma ap bohon foma esan humdoho ininim watfag.

³⁹It enebe o Mesir en muko wilibi feseruk li em etmano mun fetagdoho neg atfag ma iren siburu kwemangge mel roti fituk angge ragi wereg on mel fouk duk fug angge wilibik watfag ma roti fituk angge eleg on muninig angge walug watfagdeg weratfag.

⁴⁰ It enunggul unuk Israel enap aire o Mesir etma tahun 430 en welatfag.

⁴¹Tahun 430 on ai en nukoho fotogdoho on ai fam de it TUHAN omaliki esan lohwaleg anyo o Mesir embeselug wilibik watfag.

⁴²Hup ai salim de it Mesir en wilip atuk mu TUHAN en along baloho neg og-eneplug wilibik watfag. Hup anyo fahet de TUHAN og-etfagdeg hundig ebetuk katfag. Ne, hup ai salim oho re it ap homi Israel on de kahaleg mundoho welatfag.

⁴³TUHAN en Musa, Harun nim hweag-esauk kwit de, “Hiren soni Paskah fahet esetuk kwit duruk kamuhup alere su. Ap bohon halug de nukoho Paskah ai fam wam domba watuk on ai ino nauk kamuhup hayog.

⁴⁴Famen de hit henamingming angge hiren onggo fam hun dauhup on en at ai ahap mundoho baleg halug neg de hit hinim nahu fano.

⁴⁵Ap o ekeman wahausa on mel ap yabuk onggo fahet wutuk on mel de hit hinim seberoho nahup hayog.

⁴⁶ Domba ino abirangge etma re mundoho olma en neg nahup, dagma eke walug wilibik lahup hayog. Ne, owag de we misig neg ulug oho eke sombo esahup hayog.

⁴⁷It ap homi Israel on enebe abirangge en nukoho ai salim leho bolug obahet duruk kamuhup.

⁴⁸Ap enahap baleg eleg on halug de soni osoho ai naukmu hinim nahup fug. Ne, ap bohon eke hit hininim mundoho yug atsireg wereg lit lahe, An nalong bolug leho nobaharuk kwit soni Paskah ai fahet ninim seberoho dimin boruk halug de, at ai ahain elekwe en ap on halug atam enahap bal-enebuhup fano. Ai mundoho debelug neg de it enebe ap homi Israel enonggwareg on hag debelug it hinim seberoho Paskah fahet esetuk mu ai duruk kamuhup.

⁴⁹Wene melaleg misig on aire hit Israel henonggwareg on fahet inim ne it bohon famen hit henesahalimu yugdoho wereg on nim fahet welaruhu,” ulug hweag-esebag.

⁵⁰Airoho hweag-esebag ma re it ap homi Israel on anyo TUHAN en Musa, Harun nim melale fesebag ale anyo mun holoho neg debag.

⁵¹Nukoho ai salim TUHAN en it ap homi Israel on mundoho o Mesir en og-eneplug wilibik watfag.