Read Ninia Yali KELUARAN 14 Bible Online

KELUARAN 14 - Ninia Yali bible

KELUARAN 14

¹Ai en de TUHAN en Musa fam hweag-utuk kwit de,

²“Ap homi Israel on ai nikangge sombandoho lalug de o kota Pi-Hahirot o kota Baal-Zefon horogma o kota Migdol dulug ik Laut Gelagah dulug etma enobam sabo wirik lowagdoho mingming enebin.

³Raja Mesir on en boruk kwit de it ap homi Israel on anyo re o lei en kwe bal-enepuk en kwenang suma fam leil watil noruk bemisi.

⁴An den de at enda mun haro debeminmu re, aren hit mug-heneplug watmisi. Famen de An den at raja Mesir on ai fam inim it autsi tentara fam inim An Nomamne welahi ale anyo ename feminmu ai fam iren An TUHAN welahi ale anyo enoluk amuhup anggere,” ulug hweag-etfag ma mingming enepfag. Airoho ebag ma re it ap homi Israel on anyo en TUHAN en it melale fesebag ale anyo higitdoho neg debag.

⁵At raja Mesir on anyo esanggo holduk men de ap homi Israel on etmano mundoho heiye wilibehesa ulug holfagdeg de at inim it yabuk apma duruk on nim en nenambik en ulug enenda siag atfag ma uruk kwit de, “Niren de keroho dul? Nunggwelug ap homi Israel on ai lowag ulug niren embesehema ketia nit neneyabuk duruk on nenamingming angge eleg aha?” ulug ebag.

⁶Airoho ebagdeg de at raja en kereta emberimmu lahalug dog yapuk on mel, autsi tentara mel fik-fouk debag.

⁷Airoho debelug de At ebe angge kereta amu on nim ne angge kereta mun memereg on 600 en it autsi perwira sehen foroho enap en walug lauk on nim walug lebag.

⁸Demdoho At TUHAN en raja enda haro debebag ma atlug de it ap homi Israel on o Mesir ai embeselug At TUHAN en along baloho[12] og-eneplug kwema laukmu mug-eneplug lebag.

⁹Lebagdeg de it tentara Mesir on kuda emberim fam lahalug lauk on mel kereta walug lauk on mel en de it Israel on etmano sik-mug eneplug lebagdeg de enembolim o ik laut aegma o Pi-Hahirot horogma sabo saloho nohorukmu lebag.

¹⁰It ap homi Israel on anyo en raja Mesir on anyo autsi tentara nim waharukmu inil esebagdeg de it mundoho enakol neg atfag ma TUHAN en let nenebukwag ulug enele ngarebag.

¹¹Iren Musa fam uruk kwit de, “O Mesir ap homi waratuk on sal-enepukmu mun eleg en nit nenebe o suma en waramag ulug og-neneplug waharihin a? Hat dirihin ale fam ambiangma atuk ale ai hakin!

¹²Atam nit o Mesir etman wene matuk kwit, ai aruhu fug ale fahet uruhuk! Niren hat hobam limi hapuk kwit nit nenape kwe nong-hong nenesauk eleg nit de o Mesir suma enamingming angge on atlug welamuhuk fano uruhuk. O leimu suma waratuk ale embeselug o etma ap homi enamingming angge atlug welala aire mun fano,” ulug ebag.

¹³Airoho ebag ma at Musa en it onggo hweag-esauk kwit de, “Henakol duruk eleg! Hambuk hakiek! Hit henahap wendat-henepuk At TUHAN en eke dimisi ale ai hinil haluhup. Ap Mesir enap ketia esauk kahep on eta enebe elegma esaluhup lit deg.

¹⁴At TUHAN en neg hit henobahet dikohoreg anggere, hiren eke diroho suroho duluhup fug,” ulug hweag-esebag.

¹⁵Hweag-esebag ma TUHAN en Musa fam uruk kwit de, “Let-nabin ulug nunggwelug hele hwiruruk kahen? Ap homi Israel on aire lauk kamagdoho ulug hweag-esakin!

¹⁶Handomuk ai leho femihindeg ik laut emberim fam etma bili fein. Bili femihin mu re ik bul kwe biren minggit atmisi mu re ap homi Israel on eneyog fam ik laut ahum apmane kwenang iringgig kwe lalusa.

¹⁷Ap Mesir on ai An den enunggul owag haro debeseminmu iren ap homi Israel on ai sik-mug eneplug waharuk mu re An de raja Mesir on nim autsi esan lohwaleg on nim kereta ap ebe walug lauk on mel fam An nomamne wereg ale anyo unug-esamin.

¹⁸Ai fam de it ap homi Mesir on en inim An nebe TUHAN ulug eneluk amag ulug dimin,” ulug hweag-etfag.

¹⁹Airoho ebagdeg Malaikat Allah ap homi Israel on esan lohwaleg enalukwe fil welatfag on anyo ahamdoho enambol fil aik lebag. Ne, hena anggulog anyo

²⁰en de it ap Mesir enap fam mun mum[13] debebag famen de it Israel on fil de seleg deg latfag. Ai fam de hup hundig etmano it ap esan biren ai inim ambi am fug alereg latfag.

²¹Ai en at Musa en andomuk anyo ik laut ahummu emberim fam enggik bil-hebag ma, TUHAN en hol o mo obuk uruk fil en mondorik watfag ma, hol omamneroho firuruk kwit ik laut anyo mundoho hihil atfag. O hup hundig hol anyo watuk men neg welatfag ma re ik laut yenggeleg welatfag ma anyo ahamdoho kwenang iringgig on atfag.

²² Ik laut anyo biren minggit-atfag ma re ap homi Israel on laut baloho nindig atuk mu re ik anyo foma-foma dom aeg hagdoho yinggig kweleg it enebe kwenang iringgig angge fene eneyog fam nindig atfag.

²³Ne, it ap Mesir on oho enengge kuda mel kereta mel ap kereta emberimmu lahalug lauk on mel mundoho re it Israel on mug-eneplug enembolim watfagdeg de ik laut ahummu bik-bul etma kwebag.

²⁴O sekan delak deg kweleg etano At TUHAN hena anggulog mel indok ambulbul mel fam etmano en it tentara Mesir on etmano il fu esebagdeg enebe mun sel-kweldoho naleg-haleg esebag.

²⁵Aren de it enangge kereta omano eyog siaho febag ma re it enebe anggoloroho lisil lauk katfag. Airoho lauk kwit de it Mesir on etmano en uruk kwit de, “TUHAN en de it ap homi Israel on enobahet duruk kwit nit ninim dog yapuk. Anggere nit de suman heiye wilibukohon!” ulug ebag.

²⁶TUHAN en Musa hweag-utuk kwit de, “Hat henggik nikangge ik laut emberimmu bil-hamihin mu re ik nikangge obalma yuag aik watmisireg, it Mesir enap ai mel, kereta etma mel, it ap walug lauk enap mel, ik ahum en sal-enepmisi,” ulug hweag-etfag.

²⁷Airoho hweag-etfag ma at Musa en enggik ik laut emberim fam bil-hauk men de o mundoho sekan debag ma etano ik anyo nikangge obalma yenggil watfag. It ap Mesir on etma enahap wendaroho wilip amul ulug dung-dang hebag famen de At TUHAN en ik laut ahummu sale fesebag.

²⁸Ik laut anyo sombandoho waharuk kwit de kereta mel it ap walug lauk enap mel, ne it tentara Mesir it Israel on mug-eneplug ik laut bulmu kwit watfag on etmano mundoho mel sal-enepfag ma re it enebe mundoho waratfag.

²⁹Famen de it ap homi Israel on ik laut balduk li em de it enebe kwenang iringgig angge fene watfag, ne ik de dom aeg hagdoho foma-foma di ahan deg kweleg watfag.

³⁰Nukoho ai salim de At TUHAN en it ap homi Israel on it Mesir on en mug-eneplug waharuk on anyo fam en enahap wendat enepfag, ne it Mesir on enebe wareg etmano re ik laut elan kwe wit-wat urukmu inil hebag.

³¹It ap Israel on en hauk men de At TUHAN Omamne humon fam it Mesir on enalong elehapdoho febag ale anyo hebagdeg iren yanderuruk kwit At TUHAN obam inim ne at amingming angge Musa fam inim enenda demdoho bebag.