Read Ninia Yali KELUARAN 15 Bible Online

KELUARAN 15 - Ninia Yali bible

KELUARAN 15

¹ Airoho debag ma at Musa inim ap homi Israel on abirangge nim en suni TUHAN apne wauk kwit wilipfag on de su, “At TUHAN mun selegdoho along aha ai fam, an den TUHAN obahet apne suni uruk kahi. Kuda abirangge mel, ap kuda ambolowag fam lauk on mel, ik laut ahum bul hwik-enebeheik ma.

² TUHAN aire omamne humon fam an ili og-napuk on wereg; Aren neg an nahap wendat-napuk. At aire an nakni Allah deg ma an den At apne wauk ale mun nenda, Allah nakni nomba en apne wauk katswa on deg ma an den At unuk neg humap debemin.

³TUHAN de mun sehen anggen deg lit abiroho dog yapuk on, At unuk de TUHAN ai.

⁴Tentara Mesir on mel, kereta humdoho mel, de ik laut ahummu hwik-enebeheik. Sehen anggen on enolok lihireg enap etmano Laut Gelagah il apma belap-enebeheik.

⁵Helep ik il apma wamburuk hag, ite ik laut ahum yaron en houm eseheik.

⁶TUHAN nakni, Hat homamne humdeg lit nikdeg lahen, Hat en duruk kahen ai fam it nenaselei on buhul-bahal esehen.

⁷Hat handung-dang humon welahen anyo fam, it Hat fam haseleireg on etmano elehap debesehen. Hat holok de indok mulog duruk kwit de, it enebe enggelangge iringgig on hagdoho han werag-enebehen.

⁸Laut haren fu esehenma ik undu wanduroho yat angge inaha, dom aeg hagdoho ying-aha ma ik ahum obale fene anyo ap homi lahesa

⁹At selei on en uruk kwit de, It ai an den mug esa lamindeg sen-enepmin, an nenggarog lisoho walug it enebe mundoho enowarikohon lahi. Airoho enowatmin deg de enangge mundoho an den del-damindeg, an den yohwan-yohwan esauk kwit an nobam homoroho hwelamin.

¹⁰Eheik famen de TUHAN misig am sat dehen on fam de, it Mesir on fam mun siag on aik waha. It enebe re helep timah anggin on hag, ik ahum humon funag-lenggag angge durukmu obuk ehesa.

¹¹TUHAN nakni mun hambogbag seleg wereg lit hebe mun eneg welahen on, Hat de no ilah nangginig on nim ilit hea alereg ma? At TUHAN en duruk ale etma hagdoho re, ap sa en eke along hum ale deheg, duk fug alereg on deheg, duk alereg?

¹²Hat henggik bekit fil bil haukmu re, selei on misiham kwenang apma houm-esauk.

¹³Hat hele sali irihin on anyo dipdoho neg duruk kahen ma atlug, Haren enunggul unuk enap enahap wendatihin on su hondog eneplug lauk kahen. Hat homamne humon fam hapma kwelap-enesug lahen, Ne, Haren hondog neneplug hanggwenang mun eneg horeg on fam etmano feseik lauk kahen.

¹⁴It ap homi enunggul unuk domog omano en hol-halug de enowag elek deheg, ap Filistin on mel, Edom on enowesi mel, ai hole folug enowag eleg aheg, Ap Moab on leho enap omano enowag kwel-deheg, it ap Kanaan on omano enenda omalik aheg, disi.

¹⁶At TUHAN omamne ai inil halug de, It mundoho enakol neg atuk. It Hat homaliki anyo lauk li em etma lauk kweleg Haren fiselaroho wilibi fesehen on koloroho wilip atuk kweleg, it selei on omano hambuk halug kahale fouk ale duruk fug.

¹⁷Airoho dulug Israel anyo Haren og-eneplug de, obale Hat hebe welaruhukmu ulug eneko fouk deberihin mu etma feseik lauk karuhun. Hat handuk mun eneg horegma Hat hamu en o wiri-fesehunmu etmano femdoho wereg lamuhup.

¹⁸Hat hebe re TUHAN Raja, li mundoho-mundoho etma melal-enepuk kwit welaruhun,” ulug suni felaloho ebag.

¹⁹It ap homi Israel on ik laut baloho nindig-atfag li etma kwenang apma etmano mun iringgig kwe nindig-atfag famen de, kereta Mesir on en mel, kuda mel ne ap anduhunmu lahalug lauk on mel ik laut anyo fam kwik lauk li em de At TUHAN en ik anyo nikangge hwale febag ma re it anyo ik ahum apma obuk ebag.

²⁰Airoho debag ma at hwe Miryam hun Harun owe ai ebe nabiah hwe on fam en Allah ele hweag-esauk on welatfag ma aren no rebana webagdeg durukmu re it homi fomane omano mel oho rebana webagdeg kong-duruk kwit yunggulduk katfag.

²¹Airoho yunggulduk kwit de at Miryam en suni it fahet diroho wilipfag, “TUHAN obahet apne wauk kwit suni ukohon o, hu, At aseleg humon anyo fam mun along aha ma. Kuda abirangge inim ne it anduhunmu lauk on nim mundoho re, ik laut ahummu hwik-eseheikma obuk ehesa o,” ulug suni wilipfag.

²²Airoho debelug de at Musa en ap homi Israel on anyo ik Laut Gelagah yenggelegman de o Syur leimu etma lebag. Etma lauk kwit de nukoho henahan ai hunduko ik eke inil ha fug angge o lei kwe etma lebag.

²³Lebagdeg de it anyo o unuk Mara[14] etma aik lebag, famen de ik etma mun asig deg latfag ma na fug alereg latfag. Ai fam de o eta fahet unuk Mara ebag. Ne, Mara aire asigdeg uruk hag.

²⁴Airoho deg en de it ap homi etmano enele mul-mul ale uruk katfagdeg Musa fam hein wauk kwit de, “Nit nenahaik nunggwe naul?” ulug hweag-etfag.

²⁵Airoho ebag ma at Musa en somban TUHAN fam dik-demdoho ebag ma, At TUHAN en e somboreg angge eke Musa fam unug-hebag. At Musa en e ai oko ik ahummu hwik hebag ma ik ai unduk fano atfag ma ik na ale on atfag. O etman TUHAN en wene melaleg humdoho og-eseheg, etman neg enebut baleheg debag.

²⁶At TUHAN en ele uruk kwit de, “An nobam nele dik-demdoho neg holoho duruk kamek, ne hiren su fano ale ulug kumu halug duruk kamek; ne An den diroho diyug suroho diyug hweag-hesauihik on ai higitdoho neg duruk kamek. Hiren airoho duruk kamuhup halug de An den ouk anggolo on it Mesir on enobam feserihik ai hagdoho hit henobam henobahakuk fug. Hit henebe hiling henepihik on de TUHAN we An namu,” ulug hweag-esebag.

²⁷Ai mundoho debelug de it o Elim aik watfag. Etma re ik eleruk nesanggo en wilipuk on inim e kurma 70 en inim welatfag ma, it anyo ik horogma eta o sabo sal-debag.