Read Ninia Yali KELUARAN 16 Bible Online

KELUARAN 16 - Ninia Yali bible

KELUARAN 16

¹Etma saloho welatfagdeg it ap homi Israel on abirangge anyo o Elim en wilip atlug lebagdeg tanggal 15 bigalem bireneg angge fam it o Mesir embeselug wilibik lebagdeg anyo re it enebe o Elim dulug Dom Sinai dulug bul o Sin leimu etma aik lebag.

²Lebagdeg o leimu etmano en iren Musa, Harun nim fam enele mul-mul ebag.

³Iren uruk kwit de, “Nit o Mesir etmano en TUHAN en binggi nenowatlep ma warala re mun fano. Etman de we eleg hale en oho re nenangge ino angge mel, roti mel yuagdoho nauk mu homo nenobaharuk kalep. Famen de nit o suma siburu obok en mundoho wat-heheg lowag ulug og-neneplug waharuhup,” ulug ebag.

⁴ Airoho ebag ma TUHAN en Musa fam uruk kwit de, “Ketia An den hit abirangge nauk on fahet osit wambik waharuk hagdoho hilil-halaldoho belabik watmin. Nukoho hundig-hundig de nauk on ai henebe nauk ale etano higitdoho ondolduk kamuk. Airoho duhuk ai fam de it An nomaliki anyo en An den nawene melaleg anyo dipdoho neg duruk a, eleg a, ulug An noluk amag ulug henabut baluhuk.

⁵Nukoho folfalik salim nauk on fahet andog duruk kwit de, iren ilitdoho nauk on etano wereg ma aldap ekenim dopnoroho kabog-dauk kamuhup,” ulug hweag-etfag.

⁶Airoho hweag-etfag ma it Musa nim Harun nim en ap homi Israel on mundoho fam hweag-esauk kwit de, “Yoho Hupmu su fam we At TUHAN en neg hit o Mesir og-heneplug wilibik wahasi ale henoluk atmisi.

⁷Hiren henele mul-mul uruk kwit henesuahal At fam, At TUHAN fam uruk katuhup on ai mundoho holsi, ne nit de we Aren diroho diyug suroho diyug ulug melale-nenobaharuk on anyo neg duruk kahema re, sono hubet At TUHAN ebe aseleg ombagbag fam enam aruhu mu hinil hahup.

⁸Hiren henele suahal ale neg uruk kahep on etma TUHAN mundoho holsi anggere, o hupmu kwe re ino angge og-hesauk karuhu, ne hubet de siburu roti og-hesaukmu re hit mun homoroho nauk kamuhup. Dik-demdoho anggere hiren nit nenobam henele suahal uruk kahep on etma re, hiren TUHAN fam uruk kahep,” ulug hweag-esebag.

⁹Ai en at Musa en Harun fam uruk kwit de, “Iren enele ngulug-ngulug ale uruk on etma At TUHAN mundoho mundoho holsi anggere, it mundoho TUHAN olohotma wamagdoho hweag-esakin,” ebag.

¹⁰At Harun ele airoho hweag-esauk kweleg etano it enelukwe endenoho o lek fil fu hauk men de TUHAN ambogbag anyo fetagdoho hena anggelegma enam atuk mu hebag.

¹¹TUHAN en Musa fam uruk kwit de,

¹²It ap homi Israel on en enele ngulug-ngulug ale uruk on etma An mundoho holihi. Anggere diroho hweag-esakin, o hupmu re ino angge og-hesauk mu nauk kamuhup, ne hubet de hit roti mun homoroho nauk kamluhup, iyug. Ai fam de iren An nebe it enakni TUHAN Allah welahi ale anyo enoluk amuhup.

¹³O hupmu kwe re suwe puyuh yomalmal hag on anyo elang hum-hamdoho waharuk kwit o sabo saleg on omano hopo-debeik waharuk katfag, ne hubet de lil o sabo saleg on etmano aluluk kwe maseroho wambik waharuk katfag.

¹⁴Lil wambuk waharuk on anyo ahe atlug laharukmu re o lei kwe etmano il maben angge no ikan amurul hag deg ma lil olom dulug mun sako angge enam atuk mu hauk katfag.

¹⁵ Airoho inil hebagdeg de ap homi Israel on etmano enapeleg deg ma re, iren eke en eke fam hein og-og atuk kwit de, “Ai nunggwangge?” ebag. Airoho ebag ma at Musa en it hweag-esauk kwit de, “Aire TUHAN en hit nauk angge ulug og-heseheik angge.

¹⁶TUHAN en uruk kwit de, hit henemu domog en de hit nauk ale etanoroho, ap misig ohwe fahet oho omalik fahet oho we dua liter heg neg ondol-dauk kamuhup,” ulug hweag-esebag.

¹⁷Airoho hweag-esebag ma it ap homi Israel on en airoho duruk katfag; famen de it fomane ap misig fahet famen dua liter wereg ma eke nim dopnoroho yohwareheg, it foman dotdoho yohwareheg duruk katfag.

¹⁸ Airoho dulug iren ilit angge fam wal hauk men de at eke en humdoho kabog-dasi on anyo dindikdoho atuk katfag fug, ne at eke dorangge kabog-disi on anyo elegma hauk katfag fug. It enebe domog en de it nauk ale etano ilitdoho neg kabog-dauk katfag.

¹⁹Musa en it ap homi omano enobam uruk kwit de, “Hit eke en nauk angge ai hubet fahet ulug eke foukdoho fouk fug,” ulug hweag-esebag.

²⁰Famen it enesahalimu etma ap fomane en de at Musa ele ebag on anyo sahale febagdeg iren nauk on omano foma hubet fahet ulug fahat-debag. Airoho debag famen de hubet hauk men de nauk angge etmano sobon anggen ondoho lit filik amben duruk katfag. Ai fam at Musa olok atfagdeg it siagdoho bet-enepfag.

²¹Hubet hundig-hundig de iren nauk angge ai it nauk ale etano ilitdoho ondol-dauk katfag, ne o mo ahanhan duruk li em de nauk angge ai kwenangma minggiroho embeseruk on etmano owerulug eleg atuk katfag.

²²Nukoho folfalik salim neg de nauk angge ai ekenim aldapdoho nukoho biren fahet on ondolduk kwit de ap misig fahet halug empat liter en ondolduk katfag. Airoho duruk ale anyo it enowesi melal-enepuk on etmano halug watlug Musa hweag-irik watfag.

²³ Hweag-irik watfag ma at Musa en it hweag-esauk kwit de, “TUHAN en wene melaleg eheik on de su. Sono re nukoho yugdoho kel-dauk on nukoho Sabat, nukoho TUHAN obahet foruk on anyo deg ma re hiren di angge eke werako foul behep halug oho werariyug neg, ne eke ik hulugdoho esetul behep halug oho hulug diyug neg. O yoho su en hiren mundoho dulug dindik-atmisi on aire amumu eneko folug de wepdoho sono fahet feiyug, eheik,” ulug hweag-esebag.

²⁴Ai fam de nauk angge dindik atfag on anyo re at Musa en wene melaleg hweag-esebag ale anyo higitdoho sono fahet on ulug febag. Iren nauk angge febag on aire amben oho debag fug ne sobon anggen oho endetfag fug.

²⁵At Musa en hweag-esauk kwit de, “O yoho su hit nauk angge re su, yoho sure nukoho Sabat TUHAN along bolug leho foruk kwit nukoho kel-dauk on anyo, ne nauk on ai hiren henobam sabo salegman dag fil etman eke hweag-dehep ha fug alereg.

²⁶Nukoho folfalik en ai hiren nauk on andog-dauk kamuhup, famen de nukoho sabit angge ai nukoho kel-dauk on deg ma nukoho ai salim nauk angge eke wambik waruhu fug,” ulug hweag-esebag.

²⁷Nukoho sabit angge ai ap homi Israel on foma en nauk angge ondol-daul ulug debag famen, dorangge oho eke hwelebag fug.

²⁸Airoho debag ma TUHAN en Musa hweag-utuk kwit de, “Kea huli hit An nele melaleg uruk on fureberuk fug angge neg duruk kamuhup?

²⁹An den hit nukoho we misiham ai kel wat-dauk kamuhup on ulug og-hesauihik ale anyo wenggel-hakiek. Ai fahet de nukoho folfalik angge re hit nauk on nukoho biren fahet ulugdoho An den og-hesauihik. Nukoho sabit angge aire ap homi enebe domog olma neg welamuhup dagma eke wilibik lahup fug,” ulug hweag-etfag.

³⁰Ai fam de nukoho sabit angge ai iren yabuk duruk katfag fug.

³¹ Nauk angge ai fahet it ap homi Israel on en de unuk manna [15] uruk katfag. Orohole re kut angge ne anggen de dot-dot angge deg ma unduk de kue kin ahalue fam wirig angge unduk deg hag deg latfag.

³²At Musa en hweag-esauk kwit de, “O Mesir en TUHAN en og-neneplug wilibik wahasireg o lei kwe og-neneplug lauk kwit nauk on manna og-nesasi on ai fobik nit nenomaliki nit nenambiangma on en inil hauk kamuhup en de, At TUHAN en hweag-nesauk kwit de logdoho fugmen dotdoho fugmen we dua liter heheg neg wakiyug ulug hweag-nesasi,” ulug hweag-esebag.

³³ Airoho ebagdeg Musa en Harun hweag-utuk kwit de, “Belanga misig eke walug manna dua liter oko yohware folug de it nit nenambiangma on enobahet TUHAN olohotma etma hwerie fein,” ulug hweag-etfag.

³⁴Airoho hweag-etfag ma re At TUHAN ele melaleg fam airoho feiyug ulug ebag ale anyoroho, Harun en belanga anyo oko Peti sali wene wareg wereg ma olohotma etano febag.

³⁵ Manna aire ap homi Israel on en fobik 40 tahun ambol fil eke nim it nauk angge atfag ma nil lauk men neg de o Kanaan it enebe yugdoho welamuhupmu ulug etmano aik lebag. (

³⁶It etma li em ilit dil lauk katfag angge erapdoho mel, welelenggen mel, duk fug angge etmano re 20 liter yohwaroho febag.)