Read Ninia Yali KELUARAN 17 Bible Online

KELUARAN 17 - Ninia Yali bible

KELUARAN 17

¹ Ai en it ap homi Israel on anyo TUHAN en wene melaloho hweag-esebag aleroho o Sin leimu embeselug lebagdeg o ekeman ekema laheg dil lebag. Nukoho eke salim de it anyo o Rafidim etma o sabo wirik lebag, famen de etma ik nauk on eke welatfag fug.

²Airoho deg latfag ma iren Musa nim Harun nim fam enele mul-mul ale uruk kwit de, “Nit nenahaik naul on og-nesakiek,” ulug ebag. Famen de Musa en onggo uruk kwit de, “Nunggwelug hiren henele mul-mul uruk kwit TUHAN abut balduk kahep?” ulug hweag-esebag.

³Airoho hweag-esebag famen de ap homi omano ai ik mun ahe enepfag ma re enele mul-mul ale Musa fam uruk kwit de diroho uruk katfag, “Nunggwelug nit Haren o Mesir en og-neneplug wilibik waharihin? Nit inim nenomaliki inim nenowam inim ik ahe en waramag ulug og-neneplug waharihin a?” ulug ebag.

⁴Airoho uruk katfag ma re, at Musa en TUHAN fam hwiruruk kwit de, ele diroho ebag, “Ap homi su enobam an den keroho enepmin? iren an helep fam fukdoho nowarukoho duruk angge hil hakin,” ulug ebag.

⁵Airoho ebag ma TUHAN en Musa fam uruk kwit de, “Haren it ap homi ai enowesi melal-enepuk on fomane wol-esamihindeg de it ai inim seberoho ap homi ai enolohotma hit dam lauk kamek. Ne, lauk kwit de domuk Ik Nil watihin on anyo oho walug lakiyug.

⁶An de hat holohotma Dom Sinai fam helep hum angge ai fam unduhuk latmin. Lalug de helep ai watmihin mu ik wilibik watmisi mu re it ap homi ai naluswa anggere,” ulug hweag-etfag. Airoho hweag-etfag ma re at Musa it ap homi enowesi melal-enepuk on etmano inil kwelaboho kweleg aren airoho neg debag.

⁷O etan ap homi Israel on en TUHAN abut balduk kwit iren de, “TUHAN nit ninim wereg a, eleg a?” ebag ma re o eta unuk Masa[16] soalfag. Ne, obale nikama etan neg ap homi Israel on en enele mul-mul ale ebag ma re o eta oho unuk Meriba[17] soalfag.

⁸Ai en it ap Amalek on watfagdeg de it Israel on o Rafidim etma huk-enebik watfag.

⁹Airoho watfag ma re Musa en Yosua fam uruk kwit de, “Ap enebe wenako nunggwe en hagdoho Amalek enap ai inim dog yabukwagdoho en-enebin. Ne, ande o sono domuk TUHAN walug lakiyug isi on anyo seneko re duk unggulmu etlema unduhuk laruhuk,” ulug hweag-etfag.

¹⁰Airoho hweag-etfag ma re at Yosua en de Musa ele ale anyo higitdoho neg debag. At de Amalek enap anyo inim dog abik lauk kweleg de it Musa mel, Harun mel, Hur mel, de duk anyo fam lahabagdeg de duk unggulmu aik lahabag.

¹¹Lahabagdeg Musa enggik lahabeg lit wereg kweleg de it Israel on fil enalong atuk katfag. Famen de Musa enggik belabe foruk li re it Amalek enap fil enalong atuk katfag.

¹²At Musa enggik ele debag ma re it Harun nim Hur nim en de at Musa hweria amag ulug helep misig eke febag. At Musa enggik lahabegman neg mo obuk ukwag ulug de Harun nim Hur nim en de enggik bekit fil inim hware fil nim leko unduhuk latfag.

¹³Airoho debag on ambiangma re ap Amelek on Yosua en sebeloho fesebag.

¹⁴ At TUHAN en Musa hweag-utuk kwit de, “Hat along ahen ale ai ebereg lit neg welamuhup en de lisu baloho fein. Ne, at Yosua hweag-utuk kwit de, It Amalek enap ai An den mun elehapdoho fesehuk, eheik ulug hweag-umuk,” ulug hweag-etfag.

¹⁵Airoho ebag ma re at Musa en de helep mezbah misig eke witfagdeg de mezbah anyo unuk de, “TUHAN aire an nasuwe wareg,” ulug soalfag.

¹⁶At Musa en uruk kwit de, “TUHAN en de li mundoho-mundoho etma Amalek on nim dog yapuk karuhu angge re TUHAN en bendera [18] aire leko seneg lamek!” ulug hweag-esebag.