Read Ninia Yali KELUARAN 18 Bible Online

KELUARAN 18 - Ninia Yali bible

KELUARAN 18

¹At Yitro Musa eyamal, imam o Midian on anyo holduk men de TUHAN en it Israel on o Mesir en og-eneplug wilibik waharuk kwit Allah en at Musa fam inim it Israel on fam inim debeseruk katfag ale fahet urukmu holfag.

² Airoho holfag ai fam de at Yitro anyo Musa ha lamin ulug lauk kwit de, hwe Zipora Musa ohwe o Midian welatfag angge anyo nim,

³ omaliki ap angge biren Gersom[19] nim, Eliezer nim etano nim og-eneplug lebag. Amloho wandeba on unuk Gersom soalfag aire, at Musa en uruk kwit, “An de o suma ap bohon waharihik,” ulug soalfag.

⁴Omalik bireneg on de unuk Eliezer[20] soalfag aire, at Musa en uruk kwit, “Allah nambu-nomba en apne wauk katswa on anyo en an let-nabeheg, nahap wendat-nabeheg, disimu at raja Mesir on en nowatsi fug,” ulug soalfag.

⁵At Yitro anyo Musa ohwe nim, omaliki biren nim watfagdeg de leimu dom ousa andom horogma etma at Musa o sabo sale febagdeg wereg ma watfag.

⁶It airoho waharuk ulug Musa fam hweag-irik lebag ma,

⁷at Musa wilip-atfagdeg de it enolohotma og-enenbikoho lebag. Lebagdeg de Musa ebe hun Yitro apma alukwe belabeg sahaun ebagdeg dop-dop dang debag. Airoho debagdeg de iren enebe deg ale mel ne at Musa deg ale mel hein og-og atfagdeg de o sabo Musa en on fam etmano kwik lebag.

⁸Kwebagdeg de Musa en eyamal fam de raja mel, ap homi enunggul unuk Mesir on mel fam TUHAN en it enunggul unuk Israel on enahap wendat-enebikoho di on su on debag ale etmano dindilfag. Nikangge aren de it ap homi Israel on kwe fam waharuk kwit anggin-fanggin hebag ale mel, ne it airoho hauk men TUHAN en enahap wendat-enepfag ale mel, dindil-etfag.

⁹Abirangge etma dindilfag ma holfagdeg de, Yitro ahayeg humon debagdeg,

¹⁰aren uruk kwit de, “TUHAN hit hun raja nim it Mesir enap nim enenggikmen henahap wendat-henepsi on ai neg motdeg welamag! It Israel on anggin-fanggin enobam feselug sebel-enusug weregman loloho wilip-enebik wahasi on TUHAN ai neg motdeg welamag!

¹¹It ap homi Mesir on en enawonog fam duruk kweleg At TUHAN airoho duruk katsi ai fam de it enanggembu ilah mun sebeleg kweleg TUHAN neg de mun humon wereg ulug an ketia noluk atuk,” ebag.

¹²Airoho ebagdeg de, at Yitro en Allah obahet foruk on ulug mel, waroho yalduk on ulug mel wam fomane walug watfag. Airoho walug watfag ma re it Harun mel Israel on enowesi melal-enepuk on mel at Yitro mel Allah ebe enam atuk mu olohotma etmano watfagdeg seberoho nebag.

¹³Likia sekandoho re Musa en ap homi Israel on enori nim minggirig on omano biling-enepfag. Wene ai fahet o hubet indip debag angge ayo wiroho biling-enepuk men neg de o hup atfag.

¹⁴Airoho durukmu at Yitro en il hebagdeg hein og-hauk kwit de, “It ap homi su fahet de haren de nangginig ale on neg duruk kahen? Di ale su ale etma hat hamu en neg durukmu, it ap homi en wene komo hweag-nesowag ulug suma o hubet en angge unduhuk men neg hup atuk ale aire fano a?” ulug hweag-etfag.

¹⁵Hein og-hebag ma Musa en onggo uruk kwit de, “Ap homi etma re Allah enda keroho boruk anyo nenoluk amag ulug an nakit waharuk.

¹⁶Ne, iren minggit-minggit atlug halug de it nenawene kong nesowag ulug nakit waharuk, ne an den de Allah en wene melaleg inim diroho diyug suroho diyug ulug wereg on anyo inim it hweag-esauk kahi,” ulug hweag-etfag.

¹⁷Airoho ebag ma Yitro en uruk kwit de, “Airoho re mun siag.

¹⁸Haren airoho duruk kahen ai fam hat honggwareg homamne elehap deheg, ne it ap homi ai enomamne elehap deheg, duruk kahen. Yabuk aireg on aire ap misig en neg de anggin hum deg.

¹⁹Anggere an den wene komo imin on su holiyug, ne Allah en de hat let hapuk karuhu. Ne, haren ap homi su enunuk fam it enawene walug Allah olohotma walug lauk kahen ale aire fano.

²⁰Haren de Allah ele melaleg ai it hweag-eseheg, ne it enebut keroho fano welamag ulug mel hweag-eseheg, ne iren duruk kamag ulug mel hweag-eseheg, duruk karuhun.

²¹Famen de, ai duruk kwit de haren ap enebe enggatdoho hebeleg on foma en-eneplug de iren ap esan 1.000 en on mel, 100 en on mel, 50 en on mel, 10 en on mel, enobahet inatlug melal-enepuk kamagdoho hweag-esakiyug. It enebe re Allah fam enakol boruk kwit ele holoho neg duruk on, ne ap en oho duk alereg boruk on, ne uang enenggik apmane hwenaroho hwelauk fug on halug neg unduhuk feseiyug.

²²It ai hweag-esauk kwit de, it ap homi enebe hundomog etmano fahet unggum biling-enepuk on amuhup. Yabuk aire iren bekitdoho neg duruk kamuhup. Wene indip along on halug de hat hakit walug kwik waharuk kamuhup, famen de wene doron minggirig awene halug de it enemu en kongdoho elehap duruk kamuhup. Iren yabuk airoho duruk kamuhup ai fam de yabuk hat hobam anggin wereg on etmano seap deberuk kamuhup.

²³Haren airoho duhun halug, ne wene aireg on ai At Allah en dukwag ulug melale-hobaharuk mu re, haren yabuk mun higitdoho neg durukmu, ne ap homi oho enawene folo-folo bilinggoho elehap deberukmu it enobam enendama homoroho wilipuk kamuhup,” ulug hweag-etfag.

²⁴Airoho komo-debag ma at Musa en de Yitro en komo-debag ale anyo higitdoho neg de,

²⁵it ap homi Israel on enesahalimu etmano en ap enenda wenggeleg on neg momal-enepfag. Momal-enepfagdeg de ap homi esan 1.000 on mel, 100 on mel, 50 on mel, 10 on mel, melal-enepuk kamag ulug hweag-isil lebag.

²⁶Airoho hweag-esebag ma re iren ap unggum biling-enepuk on it ap homi Israel on fahet unduhuk lit yabuk higitdoho neg duruk katfag. Iren de wene along on halug de Musa akit walug kuruk katfag, ne wene doron minggirig awene on halug de it enemu en kongdoho elehap duruk katfag.

²⁷Ai debelug de at Musa en Yitro obam lowag ulug monde febag ma, at Yitro anyo obam indipmu lebag.