Read Ninia Yali KELUARAN 19 Bible Online

KELUARAN 19 - Ninia Yali bible

KELUARAN 19

¹Anyo mundoho debelug de it ap homi Israel anyo o Rafidim embeselug, lebagdeg de, tanggal satu bigalem henahaneg on fam o Mesir embeselug wilibik watfagdeg anyo, o Sinai lekma etma aik watfag. Etma aik watfagdeg de it enobam sabo sum fam Dom Sinai ai indipmu etma sal-debag,

³ne at Musa re dom ai fam Allah inim ambi atmin ulug lahabag. Lahabag ma TUHAN dom ai fam en wene it ap homi Israel enap at Yakub ambiangma on ai fam unduhuk foukwag ulug mingming duruk kwit de,

⁴“An den ap homi Mesir on fam dirihik ale nim ne An den hit henebe An nakit nomamne humon fam og-heneplug waharihik ale re suwe ik wesahup en omalik ahwerabul emberimmu walug lauk hag og-heneplug waharihik ale aire hiren oho hinil neauhup.

⁵ Ketia re hiren An nobam dip debelug duruk kamuhup halug, ne hiren An den nawene sali waroho og-hesauihik on anyo fam furebelug duruk kamuhup halug, hit de An nonggwareg nomaliki on apdoho henobahakuk. Kwenangma abit angge ai hit henangge amuhup, famen de hit henebe neg de An nonggwareg nangge nenda hundig on amuhup,

⁶ An namu nobahet neg eneko amuhupdeg, hiren An nobahet imam unduhuk wereg lit duruk kamuhup,” ulug hweag-esakiyug, ulug hweag-etfag.

⁷Airoho hweag-etfag ma re Musa wambik watfagdeg aren it ap homi enowesi melal-enepuk on etmano wol-enepfagdeg kabog-dik watfag ma re di wene su wene TUHAN en hweag-esakiyug ulug ebag ale etmano mundoho dindil-esebag.

⁸Dindilfag ma it enebe abirangge seberoho en uruk kwit de, “TUHAN en eheik on aire nit duruk kamuhuk nenenda,” ulug ebag. Airoho ebag on anyo at Musa en TUHAN fam hweag-etfag ma, TUHAN en Musa fam uruk kwit de, “An de nebe hena mun heik on fam hwililipdoho waharuk karuhuk; ne An den hat hobam nele hweag-hutuk mu it ap homi en enesanggo holduk kamuhup, ne airoho duhuk huli ai en de iren hat hobam demdoho ulug boruk kamuhup.

¹⁰Ketia re hat hebe ap homi ai enekit lalugde iren enebe yoho inim sono inim wene kabog-duhup on fahet fik-fouk dukwagdoho re hweag-esa lakin. Iren enesum de mundoho ik ho dahup neg.

¹¹Ne, haure it mundoho foukdeg lamuhup. Nukoho ai salim de An Dom Sinai su emberimmu ap homi abirangge en inil neama etma wambik waruhuk.

¹² Dom su maseroho re eneg ale huliroho ousa ma etma ap homi ai kwik wam no ulug, feiyug. Ne, it ap homi enunggul unuk ai en dom au fam lahaik wam no ulug oho, ne horogma aik wam no ulug oho seiye feiyug. Hweap eke en eneg ale hulireg on ai dahandoho kwik waharuk halug de ebe binggi waruhup.

¹³Ap ai ebe helep hwik waruhup ane ite sehen en bisingdoho waruhup ane. Ne, at ebe re ahap bal ha fug. Aire ap homi et wam di on su on et fahet welaruhu; it ai enebe abirangge en hulireg on ai dahandoho lauk on de enebe binggi enowaruhup. It enesanggo holduk men bohweap trompet ele yatdoho urukmu holdil lauk kwit de it ap etma enebe domma lahaukwag,” ulug hweag-etfag.

¹⁴Airoho hweag-etfag ma at Musa domman wambik watfagdeg ap homi etmano wene kabog-dukoho fik-fouk duruk kamag ulug hweag-esebag. Aren uruk kwit de, “O haure hit mundoho fik-foukdeg welamuhup angge re hit airoho duruk kwit eiya henohwesi nim seberuhup hayog,” ulug hweag-esebag. Airoho hweag-esebag ma re it ap homi anyo fik-fouk duruk ale indip debagdeg de enesum inim ik ho-debag.

¹⁶ Nukoho henahaneg salim de hubet ululu sipukdoho oweal lebeg hauk mu, hena wilim on dom anyo fam sal-dil wambik waharuk kwit bohweap trompet ele yaron omamneroho lit haukmu re ap abirangge o sabo kwe welatfag on etmano enowag elek duruk kwit enakol en duruk katfag.

¹⁷At Musa en it anyo Allah inim seberukwag ulug og-eneplug wilipfagdeg, it abirangge dom indipmu etmano unduhuk latfag.

¹⁸Unduhukmu Dom Sinai ai emberimmu At TUHAN ebe indok sahalimu wambik watfag ma re abirangge hobu humdoho en salduk katfag. Hobu aire ap en indok yabuk ahan yaldukmu hobu laharuk hag laharuk katfag, ne dom anyo abirangge re mun nik aleroho lang-fang hauk katfag.

¹⁹Bohweap trompet ele uruk on anyo re eke nim omamneroho uruk katfag. At Musa en hein waukmu re Allah en ele ululu fam onggo hweag-utuk katfag.

²⁰TUHAN ebe Dom Sinai ai fam wambik watfagdeg de Musa dom ai fam lahaik wamag ulug wol-debag ma, dom ai dukmu lahabag.

²¹At Musa lahaik lebag ma TUHAN en ele hweag-utuk kwit de, “Wambulug de ap homi en huli baleg on ai dahandoho An inil neaul ulug sohwandoho kwik wam no re enenda eberoho hweag-esa wambin. Iren lahe dahandoho kwik waharuk halug oho re it enebe sahalimu etman humdoho waramuhup.

²²It Imam-imam on en oho An horogma aik laul bolug halug oho re it enebe atam ho dahup; it airoho duhup fug halug de it enebe binggi waramuhup,” ulug hweag-etfag.

²³Airoho hweag-etfag ma Musa en TUHAN fam uruk kwit de, “Haren nit melale nenobaharuk kwit, Dom au mun ousa angge on hag deg ma niren huli-huli maseroho wereg on ai fureboukwag ulug hweag-nesauihin mu re, ap homi etma re domma suma lahaik wamuhup fug,” ulug hweag-etfag.

²⁴Airoho ebag ma TUHAN en onggo hweag-utuk kwit de, “Hat hebe wambulug de nikangge Harun hinim seberoho lahaik manu. Famen de it imam mel ap homi holduk on mel de An nakit laul en ulug huli wereg on ai sohwandoho kwik wamuhup hayog. Ne, iren dahandoho kwik wamuhup halug de enebe binggi enowaruhup,” ulug hweag-etfag.

²⁵Airoho hweag-itil lauk em de at Musa wambik lebagdeg de, TUHAN en ebag ale etmano ap homi hweag-esebag.