Read Ninia Yali KELUARAN 21 Bible Online

KELUARAN 21 - Ninia Yali bible

KELUARAN 21

¹Ai en TUHAN en Musa fam uruk kwit de, “It ap homi Israel on fam Wene melaleg su hweag-esakin:

² Hiren henamingming angge hit henenggul unuk on misig oma en onggo hun-enebil lauk kwit halug de, tahun folfalik en heneyabuk duruk karuhu famen tahun sabit angge re loloho wilibi foruk kwit onggo ulug oho eke fouk fug angge wilibi feiyug.

³At ebe yau deg lit hit henamingming angge atsi halug de at ebe wilibik lauk kwit aire ohwe et wilibik lahup fug. Famen de at ebe ohwe hwelasireg en hit henamingming angge atsi halug de at ohwe et angge ambine wilip-amuhup.

⁴Ne, hun akni anyo en amingming angge anyo ohwe eke og-uruhumu omalik enderuhu halug, at ap anyo wilibik lauk li em aire hwe anyo nim omalik inim de hun akni anyo angge aruhu, ne at amingming angge ai inim wilibik lahup fug.

⁵Famen de, ap amingming angge anyo en lahe ohwe mel omalik mel, akni ai mel enda hundig enepuk kwit loloho wilip atuk ale nerim boruk halug de,

⁶at akni anyo en ap wene kabog-durukmu omano walug lahu. Etma walug lahureg de amingming angge anyo o wene kabog-duruk obam anyo sok fam oho ne e lang owag deleg on fam oho in amag ulug hweag-uruhureg akni ai en amingming angge anyo esanggo foruhu. Airoho debehumu re at amingming angge ai ebe oluk mundoho welaruhu li etma we enamingming angge atlug welaruhu.

⁷Hwele Ibrani ahaloho eke akni en mingming on fahet ulug onggo wahu halug de, hwele ai enam tahun debelug loloho wilibi fohup fug. Aire it ap on enamingming angge atuk on nim de mun aham deg.

⁸At akni anyo en hwele ai en ohweap dahuk ulug deg on anyo, hun anyo en enda boruk eleg ale neg duruk halug de, hwele ai nikangge onggwareg akni endetsi on fam onggo wahup. Hwele aire at akni onggo wasi ahun anyo en ele sali isi aleroho debouk fug angge we hesangge-besangge ale neg debesimu re, hwele ai ap bohon fam onggo wahup fug.

⁹Ap eke en hwele eke amloho ohweap dahu on fahet ulugdoho hwele eke onggo hundutlug halug de, hun ai en hwele aire at onggwareg en ondoho on hagdoho deberuk karuhu.

¹⁰Ne, amloho anyo lahe hwe amu on eke hwilil lauk kwit halug de aren nauk angge nim, sum inim, di on su on ap ai en ohwe keram on fahet deberuk ale anyo mundoho deberuk karuhu.

¹¹Ne, aren airoho duk fug angge duruk halug de aren hwe ai fahet onggo ulug uang loleg onggo hwela fug angge lole feseruk karuhu,” ulug hweag-etfag.

¹² “Ap eke en ap amu on yeik waruhu mu waratuk halug de, at waruhu ahun ai oho binggi waruhup.

¹³ Famen de ap ai en watmin ulug endama wenggeleg elegman fetagdoho ware folug halug de buroho o obale An den unug-hiruhukmu etma laukmu at ebe along baleg laruhu.

¹⁴Famen de ap misig eke en ahummu het en olok hasimeg apenen ap eke ware fohureg en famen an nalong bal-amag ulug An yal-nutuk angge mezbah anyo wereg ma ulug lahu famen de ap en etman lisoho wilibi folug binggi waruhup fano.

¹⁵Ap eke en akni mel, isinga mel enowatuk halug binggi waruhup.

¹⁶ Ap eke en ap amu on herag dahureg onggo wahu halug oho, ne obam wereg halug oho, ap ai binggi waruhup.

¹⁷ Ap eke en akni, isinga mel hururung enepuk halug de binggi waruhup.

¹⁸It eke en yeik yapuk kwit, ap eke it amu on eke helep fam oho, enggik yinggilig oho, ware fohu famen de ebe binggi waruhu fug halug de ap ai unggum og-umuhup fug. Ne, ap ware fohu on anyo lahe at eke en waruhu angge anyo en yinggig wereg laruhu

¹⁹famen de, fobik en inatlug domuk fam lauk halug de, ap waruhu on anyo en let-duruk men neg ap ai fano aruhu. Ne, at ai ouk wauk li em etma re at ware fohu on ai en angge obalma og-uruhu.

²⁰Ap eke en mingming on ap on oho hwelani on oho fetnangge ware fohumu ai salim waratuk halug de ap ai unggum og-umuhup.

²¹Famen de amingming angge ai waratuk eleg kweleg nukoho biren henahan welaruhu halug de akni ai unggum og-umuhup fug. Ite at unggum og-om hag de at amingming angge ware fohureg anggolo hauk karuhu ai neg.

²²Ne, it ap fomane yeik hambog-hambog atuk kwit it etano misig eke en hwe eke omalik ahummu wereg on domag-esahupmu hwe ai omalik ahummu elek dulug wilibuhu famen de hwe ebe amu fil etmano ouk duk fug angge wereg halug de ap anyo en de onggo hwe ai ahun en heng-uhu aleroho ne it unggum bilingguruk enap omano en oho fano feheik boruk aleroho fohu.

²³Famen de hwe ai ouk mun anggindoho aruhu halug de ai aruhu on fahet unggum de at ebe waratuk halug at ebe nim wut-aruhu,

²⁴ ap eke hinil dohouk deberuk halug de onggo at il dohouk debehup, ne ap eke henaeg langgo deberuk halug de onggo at aeg langgo debehup, ne ap eke en henenggik sombo deberuk halug de onggo at enggik sombo debehup, ne ap eke en heneyog sombo deberuk halug de onggo at eyog sombo debehup,

²⁵ap eke en ebe fam yebil ambumbu deberuk halug de onggo at oho yebil ambumbu debehup, ne ap eke indok en han yaluhu halug de onggo at indok en han yaluhup, ne ap eke en are waruhu mu ebe firuhu halug de onggo at oho ware fohupmu ebe firuhu.

²⁶Ap eke en amingming angge il dohoukdoho waruhu mu il bug atuk halug, il siag aruhu on ai onggo re at ebe loloho wilibi fesehup.

²⁷Ap eke en amingming angge anyo aeg langgoroho ware fohu halug de, amingming angge aeg ai onggo re ebe loloho wilibi fohu,” ulug hweag-esebag.

²⁸“Wam sapi yohombuk on eke en andimuk fam ap eke daldukmu waratuk halug sapi ai helep en obagdoho waruhup deg ino re nahup fug, famen at akni ahun oho re unggum og-umuhup fug.

²⁹Ne, wam sapi yohombuk on en ap andimuk fam hundig enowatuk mu ap akni ahun fam hweag-umuhup famen furoho hwalduk elegma ap eke andimuk en waruhu mu wararuhu halug, sapi ai helep obagdoho ware folug akni ahun ai oho ebe binggi waruhup.

³⁰Famen de, sapi akni ahun ai fam we onggo femihin ulug heng-duruk halug de aren ebe obalma onggo su huli fein uhup aleroho foruk karuhu.

³¹Ne, waruhu on ai lahe ap omalik halug oho hwelani omalik halug oho enowatuk halug de wene melaleg aire higitdoho neg duruk kamuhup.

³²Ne, waruhu on ai lahe ap enamingming angge ap halug oho ne hwe halug oho waruhu halug de, sapi akni ahun ai en onggo uang tiga puluh perak hun amingming angge ai onggwareg akni ahun fam onggo og-uruhureg, sapi yohombuk on ai oho ebe binggi waruhup.

³³Ap eke en ahaik bohwe aplit wareg on wahumen ane ite habuluhureg aplit elma sale fohu fug mu ane sapi yohombuk on oho keledai oho elma wamburuk halug,

³⁴at bohwe ele ai akni ahun ai en de wam akni ahun ai fam onggo og-utuk karuhu, famen de aren wam wareg ai onggwareg fahet ulug hwelauk karuhu fano.

³⁵Ap eke owam sapi yohombuk on en are eke owam sapi yohombuk on watuk halug sapi akni enap enebe biren et sebe ulug sapi oluk on onggo uang walug uang anyo enebe biren etano minggit atuk kamuhup. Ne, iren wam wareg on anyo oho inim howit aheg duruk kamuhup.

³⁶Famen de ap eke owam sapi yohombuk on ai andimuk fam eitogdoho enowatuk famen at akni ahun anyo en furoho walduk eleg halug, at akni ahun ai en obalma sapi oluk on onggo fohureg, at de wareg on ai hwelahu fano,” ulug hweag-etfag.