Read Ninia Yali KELUARAN 22 Bible Online

KELUARAN 22 - Ninia Yali bible

KELUARAN 22

¹“Ap misig eke en wam sapi ane domba ane herahakureg senggeloho onggo wauk halug, sapi misig fahet de obalma sapi foaben alulumno duhu, ne domba misig fahet obalma domba ohwan alulumno duhu.

²Aren de sum enggan herahaku angge etma onggo ilitdoho alulumno duhu famen at angge alulumno duruk on eleg halug de aren herahaku on etmano obalma re at ebe at mingming on amag ulug onggo wahu. Ne, aren herahaku angge sapi ane, domba ane, keledai ane omano oluk angge forohoma hweahakupdeg halug de wam misig fahet aren onggo wam biren heg neg fohu. Ne, o hup anggo ap misig eke en olma heraharuk mu hweahail lauk kwit at ebe ware fohup halug de ap ware fohu ahun aire obam wene welaruhu fug. Famen de o mun nukoho li en duhumu waruhup halug neg de ap ware fohu on ai fam oho wene welaruhu neg.

⁵Ap eke en aren endetuk angge omano hesanggema oho ne aren ahan anggur yahoma oho enggelangge nil lauk kamag ulug fotog hahumu aren endetuk angge omano enggelangge nil lauk kwit ap amu on eke[21] eyabuk yaho on nil lauk halug, at owam akni ahun anyo en alulumno re anggen yihig fano on ane, ne eyabukmu en anggur anggen ahalue mun fano on ane fam alulumno duhu.

⁶Ap eke en at eyabukmu indok yale fohumen indok anyo harep nil lauk kwit ap amu on eneyabukmu gandum yahoma wilipuk on mel, ite gandum anggen ket baloho foruk on mel mundoho nahu halug de at indok yaluhu ahun ai en de obalma alulumno duhu.

⁷Wal-heheg de ap eke en uang hag angge ane ite sum enggan onggo wereg angge ane obam fein fohumu at foroho latmin ulug foroho laruhu. Famen obam fein foroho on anyo aren foroho kweleg at obam olman herahakupmu, ap herahaku on anyo hweaho fohup halug de at herahaku ahun ai en de onggo aldap birenamdoho fohu.

⁸Famen de at herahaku on anyo hweahakup fug halug de ap obam fein fohupmu foroho laruhu on anyo walug de wene kabog-durukmu lalug de di angge su angge an nobam fein fesi on etma an den heraharihik fug ulug hombuk baluhu.

⁹Wam sapi ane keledai ane domba ane ite sum wan-duruk on ane longgo ohomu hweahakup on fahet enele sahaleg bilili uruk kwit halug de, ap eke en ai an nangge ulug uhu on aire hondoholug de wene kabog-durukmu etmano feik waharuk kamuhup. Feik waharukmu Allah en uruk kwit ap su en siag disi uruk on aire aren onggo aldap birenamdoho akni ahun anyo og-utuk karuhu.

¹⁰Wal-heheg de ap eke en keledai ane sapi ane domba ane ite aren endetuk angge amu on oho at are en on eke kulduk men wam anyo ap en inil ha fugmen wam anyo wararuhu halug oho, ne ahapma ambumbu deg laruhu halug oho, ap selei on en del dahup halug oho,

¹¹wene ai fahet de wene kabog-durukmu etmano lahupdeg ap kulduk karuhu on anyo en de am an den kulduk kamag ulug nobam ferihin on aire an den heraharihik fug ulug TUHAN unuk yiko hombuk baluhu. Ne, demdoho aren herahasi fug halug de alemat atsi on ai fahet de ap onggwareg ahun ai amu neg, ne at kulduk katsi ahun ai en onggo fohu hayog.

¹²Wam ai lahe it ap amu on en herahakup halug de ap kulduk karuhu on anyo en akni ahun anyo onggo alulumno og-uruhu.

¹³Ne, iren endetuk angge lahe mene olok on en senggeloho nahu halug, ap hwalduk on anyo en de owag apuhuno walug akni ahun fam eneg aleroho unuhuku, ne ap hwalduk karuhu on anyo en akni ahun fam obalma onggo og-uruhu fug.

¹⁴Ap eke en iren endetuk angge are on misig elamna wahumen wam anyo onggwareg ahun il elegman ahapma wareg halug oho, ne mondabi wareg halug oho at elamna ulug wahu ahun anyo en obalma onggo alulumno duhu.

¹⁵Famen de at akni ahun ebe eta wereg kweleg aruhu halug de, at elamna wasi on anyo en onggo fohu fug. Ne, wam ai lahe onggo folug elamna forohoman de alemat aruhu halug onggo re foroho latmin ulug onggo foruk on ai fam kwik lahu,” ulug hweag-etfag.

¹⁶ “Ap eke en hwele ket duhum on ap ahap apeleg on, ne ap en oho momaleg fug on eke nim, Ninim nohoukohon ulug mingming duruk halug onggo mondabi fohureg ebe hwelahu fano.

¹⁷Famen de hwele anyo akni en ap ai hwelamisi fug uruk halug de ap ai en onggo re hwele anyo akni fam hwelani ket duhum fahet onggo foruk ale doho fohu.

¹⁸ It homi en eke kwenang al feseruk ale duruk halug de binggi waruhup.

¹⁹ Ap eke en ap en hwalduk angge nim seberuhu halug de binggi waruhup.

²⁰ Ap homi en An, TUHAN nobahet neg wam waroho foruk kam on famen, iren kembu ilah enobahet wam waroho foruk halug de ebe binggi waruhup.

²¹ Hit de atam o Mesir ap bog on hagdoho welatuhup ale anyo henenda wenggel-halug de, hiren ap bog on enobam anggin-fanggin ale debeseheg, hwenareg ale debeseheg, duk fug.

²²It homi sohwe on mel, omalik wetien on mel fam hiren henele along balongdoho hit henenda boruk aleroho neg debesouk fug.

²³Hiren it fam henolok ale neg debeseruk kamuhup halug, iren let-nenebin o ulug enele ngaruruk kamuhup on ai An, TUHAN en enele holduk karuhuk.

²⁴Enele holug de An nolok en hit weim yapuk li em henowaruhukmu hit henohwesi re sohwe aheg, ne henomaliki wetien aheg, duhup.

²⁵ Ap homi An nomaliki on enesahalimu etman hit hene uang ap enenggik eleg on en baleg lamuhup halug, henele anyo fam ap di angge su angge onggo wauk on en uruk hag dopno angge eke nim wakin uk fug.

²⁶ Hiren ap eke asum jubah dag kwe yanggulduk on at ombaleg angge ai obalma fohu en enda lit angge ulug wahupdeg halug, mo owan obuk uruk eleg kweleg og-umuhup,

²⁷sum aire we misig ai neg deg ma anggere ebe ahanhandoho ulug ai fam hulilipdoho nohorukmu anggere. Ne, hiren at onggwareg og-umuhup fug halug at nohoruk kwit de nunggwe fam hulilipdoho nohoku no? Aren let nabin o ulug An nobam ele hwiruhu on aire An den elaheg hahukdeg ele nesanggo holuhuk.

²⁸ Allah fam henalitno en deheg, hit henunggul unuk on ai henowesi melal-henepuk on hururung enebeheg, duruk kam fug.

²⁹Nukoho di salim foruk kamuhup ulug li momaloho fohup aleroho re hiren heneyabukmu angge gandum anggen fomane mel anggur ahaik mel zaitun ahalue mel etma An nobahet foruk nu. Henomaliki ap wandeba on omano mel An og-nutuk nu,

³⁰ne foma sapi, domba omalik yohombuk on keram endetuk on halug, inim An og-nutuk kamuk. Ap en endetuk angge omalik etma re nukoho sabit en ai ai isinga nim welamag ulug embeselug de, ne nukoho ligin angge re An og-nutuk kamuhup.

³¹ Hit henebe re An nomaliki on deg lahepma, henengge endetuk kamuhup on etma abirangge mene en senggelduk angge halug de nauk kam fug; ite senggeleg angge ai mene at og-umuk,” ulug hweag-etfag.