Read Ninia Yali KELUARAN 23 Bible Online

KELUARAN 23 - Ninia Yali bible

KELUARAN 23

¹ “Wene seiale on saharuruk kam fug, ap enolok on en wene seiale wene fag-duruk on let-enepuk kam fug.

²Ap humdoho wene melaleg sahaloho folug enele seiale fam fag-dil noruk on mel ne iren siag ale neg dil noruk on mel etma re hit hinim mang-mangno dulug noruk kam fug.

³ Hiren unggum katukdoho on fahet bilingguruk kwit ap enenggik eleg on enawene famen de hiren aham-faham deheg enorohole fubi enebeheg duhup fug.

⁴ Hiren sapi oho keledai oho it hinim minggirig on en on longgo ulug wereg ma hweahalug halug de walug akni ahun og-irik wamuhup.

⁵It hinim minggirig on enangge keledai ebe anggin en dam-dam deg halug de, hiren leko feiyug, embesouk fug.

⁶ Ap enggik eleg on eke awene bekitdoho kong-nomag ulug walug waharuk halug de hiren fanoroho neg debeseruk kamuk.

⁷Ap eke siag duhu fug famen henenda meneni en obam hekip halug ebe binggi watuk ale on aire An den ap siag aireg ale on duruk on fahet mun nerim deg lahimu re hiren ahaye duruk kamek.

⁸Uang siag dulug en ahap wendaroho foruk on ai hwelauk kam fug. Uang enahap wendarangge forukmu hwelauk on ai en de wene demdoho on fam en ap inil mumap debeseruk mu re, ap siag duruk eleg on famen alemat enepuk anggere.

⁹ Hit atam de ap bog on hagdoho atuhupdeg o Mesir welatuhup mu re ap bog on atlug wereg lit hauk ale etare hit mundoho henoluk deg, anggere ap bohon hit henenda boruk aleroho hesangge debesouk fug,” ulug hweag-etfag.

¹⁰ “Tahun folfalik en fam de hiren heneyabuk wirigmu a yareheg ne anggen yihiruk on bal-deheg duruk kamuk.

¹¹Famen de tahun sabit on fam de kwenang ai yabuk wuruk eleg angge embesehupmu welaruhu. Tahun eta hit airoho wereg lit de di angge su angge heneyabukmu etman amu wilipuk angge re hit kabog da fug. It ap homi enenggik eleg on en ondol dowag ulug embeseiyug ne alinlan de wam maro fahet embesehup. Hit henangge anggur yabuk yaho on fam inim ne henahan zaitun wilibig on fam inim oho airoho neg diyug.

¹² Somban misig on fam nukoho folfalik en eta fam de hit yabuk wituk kamuk famen nukoho sabit anggere hit kel wat-dauk nu, ai fam de hit endag dauk angge mel, henamingming angge mel ap bog on hit henobahet yabuk duruk on mel oho re kel wat-dahup anggere.

¹³Di wene su wene An den hit hweag-hisihi on etma mundoho fubi debeiyug. Hiren kembu ilah amu on apne wauk kam fug, ne unuk uruk ale ulug oho re mun ousa,” ulug hweag-etfag.

¹⁴“Hiren An nalong bolug leho nobaharuk kwit tahun hundig-hundig etma fam de, hiren nukoho leho henahanam fam An mot-napuk kamuhup.

¹⁵ Bigalem Abib ai fam de, li eneg wereg aleroho re hiren Roti Fituk angge eleg on Soni ai ebe An den duruk kamuhup ulug melale-henobaharihik aleroho fam esetuk kamuhup. Ai indip de bigalem ai fam hit o Mesir embeselug wilibik waharuhup ai fam airoho duruk kamuhup. Hiren nukoho sabiren eta fam An napne wauk kwit de roti fituk angge nim fam wirig on nauk kam fug. Ne, hiren An wereg ma kabog-dik waharuk kwit de hundig-hundig etma An nobahet foruk on et walug waharuk kamuk.

¹⁶ Hit heneyabukmu en anggen yihig on balduk ale indip duruk kwit de Soni Anggen Baleg ai esetuk kamuhup. Tahun ahaebogma hiren di ahan anggen su ahan anggen inim anggur yabukmu en anggen dahaneg on inim kabog-duruk li em de hiren Soni O Sabo anyo esetuk kamuhup.

¹⁷Tahun hundig-hundig fam hiren soni indip henahan eta esetuk kwit de ap on neg enebe mundoho re An Enakni TUHAN Allah nakit wene kabog-dik waharuk kamuhup.

¹⁸Hiren An nobahet wam waroho feik waharuk kwit de roti fituk angge wereg on An nobahet feik waharuk kam fug. Wam An nobahet hiren soni henahan etano fam esetuk kwit waroho feik wamuhup on etman asei etma re fohupmu o hubet aruhu hayog.

¹⁹ Tahun hundig-hundig etma fam de hiren henangge gandum anggen keram baluhup on etma henakni TUHAN Allah obam wirigmu etma feik waharuk kamuhup. Domba omalik ino baleg mel ne kambing omalik ino baleg mel de ik isinga ag owe fam eseruk fug,” ulug hweag-etfag.

²⁰“An den malaikat hit henolohotma lauk kwit hit kwe fam laukmu henalong bal-henusug laheg ne o kwenang An den mun fik-fouk deberihik mu etma hondoko henobahaik laheg dukwag ulug mondorik waruhuk.

²¹At ebe re An den yonggo mondorik waruhuk on anggere hiren henobam hape ale duk fug, at fubi debeheg, at ele holoho neg deheg, diyug. Ne, hiren airoho duhup fug halug de hiren wene melaleg sahaloho fohup on ai fahet aren hit henobahaku fug mundoho henowaruhu.

²²Hit at fam dip deg lit An nawene melaleg anyo furoho duruk kamuhup halug de hit henaselei on etma An den neg ninim weim yapuk karuhuk.

²³An nayonggo malaikat en de hit henelukwema hondog heneplug lauk kwit de hit o ap homi Amori on, Het, Feris, Kanaan, Hewi, Yebus, on enobam etma og-heneplug lahumu, ap homi etma An den mun elehap debesehuk.

²⁴Hiren it enenggembu enalong baloho fahat enusug on etma mot-duruk kam fug ne iren kembu fam mot-duruk kwit obahet duruk ale etma enahut wal-heheg duk fug. Iren kembu enalong bal-enusug on ulug wereg on mel, helep unduhukmu kembu mot-durukmu mel, etma mundoho lilibugdoho dukom esakiyug.

²⁵Hiren An Henakni TUHAN Allah mot-napuk kamuhup halug de, An den hit nauk kamuhup angge og-heseheg, henahaik og-heseheg duruk karuhuk. Ouk indip hit famen yatma hwik-esa lauk karuhuk.

²⁶O Hit henobam henanggwenang fam etma homi en enomalik wilipuk kamuhup fug ne it ibili deg lamuhup fug. An den hit henoluk yatdoho og-hesahuk.

²⁷Ap homi enunggul unuk domog wereg ma hit lahupmu etma iren An nobam enakol on hum-ham ale debesehuk; An den de it enebe enepe nong-hong esahuk; ne it henaselei on de enambol sombandoho heiye lahup.

²⁸Heneselei enap etma An den enenda yin-hun[22] esahuk. Hit lauk kamag ulug de An den ap homi enunggul unuk Hewi on, Kanaan on, Het on, etma hit henolohotma en muko wilibi fesehuk.

²⁹Kwenang ai fam we alemaroho wereg ma di angge su angge maro on neg saha-faha uk no re it ai An den enebe tahun we misig fam neg ambine muko wilip-enebuhuk fug.

³⁰An den it enebe foma huli heheg wilip enepuk men hit henebe kwenang ai fam welam aleroho hum amuhup.

³¹O hit henanggwenang aruhu mu An den huli-huli ferihik mu re o Teluk Akaba huli en de Ik Efrat huli etma, ne ik bul yenggeleg Laut Tengah fam en de lei wereg huli etma. Ap homi kwenang ai fam wereg on etma hiren muko wilip-enebukwag ulug An den hit henomamne og-hesahukmu, hit henebe kwenang ai hwelag kwik lauk kwit etma hiren it muko wilip-enebuhup.

³²Hiren ap homi etma on nim oho, enanggembu etma nim oho sali waruk fug.

³³Hiren it enanggembu ilah etma mot-deheg, An nil hanim siag deheg, dehep ha no re ap homi etma hit henanggwenangma etma welamag ulug embesouk fouk. Ne, hiren lahe it enanggembu etma fam apne wauk kamuhup halug de hit henebe waratuk on anyo yep deg ma ilag uruk kamuhup,” ulug hweag-esebag.