Read Ninia Yali KELUARAN 24 Bible Online

KELUARAN 24 - Ninia Yali bible

KELUARAN 24

¹Airoho hweag-esebagdeg en TUHAN en Musa fam uruk kwit de, “An ninim ambi amul en An wereg ma lahaik ma. Hat laharuk kwit de it Harun, Nadab, Abihu mel it ap homi etma melal-enepuk on enebe 70 en mel seberoho lahaik watlug de it enebe yatma hagdoho wereg lit iren An fam enalukwe belabeg sahaun ulug mot-nabukwag.

²We hat hamu neg de An nakit horogdoho aik manu. Ne, it fomane etma re horogdoho aik wamuhup hayog, ne it ap homi holduk on de dom su fam ulug oho lahaik wamuhup fug,” ulug hweag-etfag.

³Airoho hweag-etfag ma re at Musa lebagdeg de TUHAN en duhup ale ulug melaloho hweag-etfag on etmano mundoho it ap homi anyo fam unduhuk feik lebag. Airoho unduhuk febag ma it enebe abirangge en enele seberoho ambine uruk kwit de, “Nit de At TUHAN en eheik on etma mundoho duruk kamuhuk,” ulug ebag.

⁴Anyo mundoho debelug de at Musa en de TUHAN en wene melaleg hweag-esebag on anyo mundoho lisu balfag. Ne, likia sekandoho re mezbah misig witfagdeg dom indipmu etma helep sengget kabog nesanggo en inim witfag; helep sengget eta re it Israel on enunggul unuk nesanggo en deg ale etanoroho, helep sengget misig de unggul unuk misig on fahet ulug witfag. Israel enap unggul unuk misig on unuk fam de helep misig heg debeil lebag.

⁵Airoho witfagdeg de at Musa en ap sauwe fomane TUHAN obahet waroho yalik lowag ulug mingming enepfag ma lebagdeg, iren waroho indok yaleheg, ne sapi waroho anggerang owam fahet waroho yaleheg, debag.

⁶Wam sapi etmano amep de fomane at Musa en waruk baskom fam yohwaroho febag. Ne, fomane re mezbah emberim fene hililfag.

⁷Airoho debebagdeg de buku wene sali wareg angge ilonggoma re TUHAN awene melaleg balfag angge anyo oko ap homi inil hanim ele hum fam bilinggebag. Bilinggebag ma iren enele uruk kwit de, “Nit de TUHAN ele neg holoho duruk kwit Aren wene melaleg hweag-nesasi on etma duruk kamuhuk,” ebag.

⁸ Ai en at Musa en mep waruk baskom fam ologdoho febag angge anyo webagdeg, ap homi enebene kwete hauk kwit ele diroho ebag, “Mep sure At TUHAN awene melaleg higitdoho At TUHAN en hit hinim Sali wene wat-wat atuhup on anyo omamneapdoho,” ulug hweag-esebag.

⁹Ai debelug de Musa inim Harun, Nadab, Abihu, inim it Israel enap melal-enepuk on 70 en anyo ha dom fam lahabag.

¹⁰Ne, it lahabagdeg inil hauk men de At Allah ap homi Israel on enakni anyo helep onggo humon nilam ai on en hwenie doalegma hag ne bohol orohole mun healegma deg hag il aireg angge emberimmu unduhukmu hebag.

¹¹It Israel on enowesi melal-enepuk on etmano inil en Allah hebag famen de it enebe Aren elehap debesebag fug. Ai debelug neg de iren enesiburu nenggeg enahaik nenggeg debag.

¹²Ai en TUHAN en Musa uruk kwit, “Nakit dom emberimmu etma lahaik ma. Etan de An den Nawene melaleg helep biren fam baldihik angge etano og-huruhuk. Wene melaleg og-huruhuk on aire ap homi ai hweag-esauk karuhun ale fahet og-huruhuk,” ulug hweag-etfag.

¹³Airoho hweag-etfag ma re at Musa let duruk on Yosua anyo inim dom TUHAN ebe wereg ma ai lahakuk[23] ulug fik-fouk debag.

¹⁴At Musa en ap homi Israel enowesi etmano fam heng-enepuk kwit de, “It Harun inim Hur inim de hininim wereg ai anggere hit henebe suma nangno nenepukmu nit nikangge wambik wamuhuk. Ap sa en awene eke wereg halug de iren kongdoho elehap nesowag ulug enekit walug lauk kamuk,” ulug hweag-esebag.

¹⁵Ai ulug Musa Dom Sinai fam laharuk kweleg hena baloho mondeg angge eke en salfag.

¹⁶Salfag ma Seleg TUHAN wereg ale anyo dom ai fam salik wambik watfag ma, ap homi Israel on inil fu hebag ma re, dom ai fam indok ulog durukmu hag hebag. Nukoho folfalik en hena dom ai fam saleg latfagdeg, nukoho sabit angge re hena ai fam en TUHAN en Musa wol-debag.

¹⁸ Airoho wol-debag ma re at Musa anyo abiroho domma mon halug lahabagdeg de hena anggelegma obukdoho kwik lebag. Kwik lebagdeg de at Musa ebe etma nukoho 40 en hup 40 en huli welatfag.