Read Ninia Yali KELUARAN 25 Bible Online

KELUARAN 25 - Ninia Yali bible

KELUARAN 25

¹TUHAN en Musa hweag-utuk kwit,

²“Ap homi Israel on en An nobahet foruk angge og-nirik wamagdoho hweag-esakin. Ap eke endama lebe duruk halug An nobahet walug feik waharuk kwit de,

³emas mel, perak me, perunggu mel;

⁴kain lenan mun sako on mel, kain wol domba oruk fam yihig on il bohol hag on mel, il ungu on mel mebon mel kain kambing oruk on mel etma.

⁵Domba yohombuk on ahap mebon aroreg angge mel, ahap sako on mel, e akasia kulit mel,

⁶minyak lampu fahet on mel enggelangge ahalue wene kabog-duruk kwit duruk on fahet mel dupa hendali amben fano on yalduk on fahet mel

⁷helep onggo humon wauk on permata il dihinig on yihinig on sum efod [24] fam eratuk on fahet mel at Imam Leho on amigmu sal angge anyo fam mendatuk on fahet mel etma walug feik wamuhup.

⁸An ap homi ai enesahalimu etma welaruhuk en de iren An nobahet O Sabo eke wirukwagdoho hweag-esakin.

⁹O sabo mel, di angge su angge o ai fahet walug wamuhup angge etma mel de An den diroho duhup ulug hat hweag-huruhuk ale eta fi-furoho neg duhup,” ulug hweag-etfag.

¹⁰“Peti misig eke wutuk kwit e akasia fam yatdoho ilihig de 110 sentimeter ne ambiangma nunggulig nim lahabeg nim de amu-amu 66 sentimeter fam wiriyug.

¹¹Wituk kwit de ilonggo fil et dag fil et emas indokma weraho on mun ebe on fam sapliroho wiruhup ne doung oho re emas on fam neg wiriyug.

¹²E beahan fahet de sehene emas on ohwan yihig folug de unggut ohwan etano fam hundi feiyug, ne sehene yihig eta re biren heheg ombandu deg ale etanoroho feiyug.

¹³Beahan ohore e akasia fam emas nim seberoho wiruhupdeg de,

¹⁴beahan ai sehene yihig elelekwe e peti anyo ombandu deg aleroho kwelabe feiyug.

¹⁵E beahan etma re sehene ai elma etma mundoho kwelabeg laruhu, anggere lisoho wilibik wamuhup fug.

¹⁶Airoho debelug de e peti ai ilonggoma re An den nawene melaleg helep biren angge fam baloho og-hitihik angge etano yohware feiyug.

¹⁷ Peti ai aplit sebel anggere emas il buhun on fam de yatdoho ilihig de 110 sentimeter ne nunggulig anggwereg alere 66 sentimeter en fam wiriyug.

¹⁸Ai wituk kwit de kerub [25] ai emas mun sahal-fahaldoho wituk kwit de,

¹⁹peti anyo aplit saleg on ambiang foma re kerub eke ne ambiang eke fam de kerub eke feiyug. Kerub ebe biren aire aplit lareg on ai inim misigmu seberebeiyug,

²⁰Aplit fam etma enahwerabul langdoho sebeloho kwelabeg lit inim ahundip deg hag peti ai emberimmu welamuhup.

²¹Helep biren ai peti ai elma feiyug, folug de aplit emberimmu sebele feiyug.

²²O aireg ma etma An hat ninim ambi atlug peti emberimmu kerub biren foma-foma wereg ma etman it ap homi Israel on enobahet An den hat wene melaleg diroho diyug suroho diyug ulug og-huruhuk,” ulug hweag-etfag.

²³“Meja misig eke e akasia on en buhundoho wiriyug, ne yatdohore 88 sentimeter elan anggweroho re, 44 sentimeter, lahabeg on de 66 sentimeter fam wiriyug.

²⁴Wituk kwit de emas mun il buhun on fam aldapdoho witlug ebe maseroho re emas on fam bereloho wiruhup.

²⁵Meja ai elanma ayuhuk fil etma 7,5 sentimeter anggweroho wiri folug de emas en huli baloho elan etma maseroho kwelabe feiyug.

²⁶Sehene emas on ohwan jiko unggut ohwan foreg kwe kwelabe folug eyog ohwan fam elanma hilinggi feiyug.

²⁷Sehene aire e meja ai bearulug laukmu beahan ai ahoreg ale fahet.

²⁸E beahan aire e akasia on fam neg hilingguhup deg, emas nim sapli diyug.

²⁹Ai en piring-piring mel waruk cangkir mel ukwag mel, cangkir anggur ahaik hwenanggoho feik lauk angge mel hilingguhup. Di angge su angge meja ai fam duruk kamuhup angge etma re emas ebe on fam neg buhun-diyug.

³⁰ Meja aire peti sali wareg ai olohotma eta fohup deg wereg ma meja ai emberimmu re, roti weraho on hundig forukmu welaruhu.”

³¹“Lampu ebe aire emas abut baleg on fam buhun-diyug. Owag mel alhop mel de emas sahaloho buhundeg on fam wiriyug. Owil angge boreg angge mel, atel sebeleg on mel elaha mel de alhop inim owag nim misigmu wut-debehup.

³²Owag ai fam de enggik handohwal folfalik en agdoho wiri feiyug, ne ombandu foma-foma re henahan heheg debeiyug.

³³Enggik handohwal abirangge fenere alili angge badam owil wirilig on mel abip mel henahan heheg hilinggi fohup.

³⁴Lampu owag etma re alili angge badam on owan owil wirilig on mel elaha mel ohwan heheg buhun-debeiyug.

³⁵Enggik handohwal foma-foma wutdeg on etma fam hundomog de apmane unggul wirilig on misig heheg wiruhup.

³⁶Lampu ebe abirangge etma inim ne enggik handohwal deg on etma nim unggul wirilig on etma nim de emas sahaloho mun ebe on kong misig fam wiruhup.

³⁷Lampu ulog-durukmu de sabiren wiri folug de lampu owag fam etma hiren mun buhun-bahandoho hilinggi fohupmu re seleg de alukwe fil etma fisarik wamburuk kamag.

³⁸Pelita ai andinbun horuruk on fahet fa nim forukmu talam nim de emas mun ebe on en neg hilinggiyug.

³⁹Lampu ai ebe inim ai fene deg on nim hilingguruk on fahet de emas mun il ebe on 35 kilogram en fam hilinggiyug.

⁴⁰ Lampu ai ebere An den dom su fam en hat hweag-hirihi aleroho neg hilingguhup en de fubi debeiyug,” ulug hweag-etfag.