Read Ninia Yali KELUARAN 26 Bible Online

KELUARAN 26 - Ninia Yali bible

KELUARAN 26

¹“An Nobam Sabo[26] wituk kwit de kain lenan kongdeg angge il sako on num en fam de kain domba oruk on il bohol hal on mel il sohwanggen on mel, mebon mel fam seleben debelug wiriyug. Wituk kwit de sum kain ai fam de no kerub [27] anyo mel ilit debeiyug.

²Sum etma domog atog de ambiroho neg bale feiyug, ne unggut yatdoho re 12 meter ne unggut wiriloho re 2 meter en debeiyug.

³Kain ai baleg foaben de misig ahundip duhup mu wiril aruhu, ne baleg foaben eke eta oho re airoho neg diyug.

⁴Kain biren eta elan kwe re asigsig ware forukmu fahet kain orohole bohol il hwal on fam ilili feiyug.

⁵Kain ebe domog de asigsig 50 en ililduk on hilinggi feiyug.

⁶Kain biren eta misigmu uluhun watuk ale fahet de suknuruk angge emas on 50 en buhun diyug.

⁷Onggwa O Sabo ai fahet de kain kambing oruk on 11 en kong diyug.

⁸Abirangge etare ambiang ambiroho neg kong diyug, ne unggut yatdoho re 13 meter en unggut anggweroho re 2 meter heheg kong diyug.

⁹Baleg foaben de ambiang misigmu seleben diyug, ne foma folfalik en eta ohore airoho neg diyug. Baleg folfalik on uluhun wareg on aire o Sabo ai orohole fil sebeleg ale fahet de aldap biren debeiyug.

¹⁰Kain wirilig on etano en keram on fam de asigsig watuk angge 50 en elanma ware feiyug, ne kain bireneg on ai fam oho re elanma 50 en ware feiyug.

¹¹Kain wirilig on biren eta uluhun misigmu waroho O sabo anyo onggwa salduk angge amag ulug de no perunggu on fam de asigsig watuk angge 50 en ware folug de foma-foma uluhun ware feiyug.

¹²Kain ai en foma dindikdoho on etman baleg foma re o sabo ai ambol fil etma dopno duhup on fahet.

¹³Kain ai dindik aruhu on yatdoho 50 sentimeter en hagdoho o sabo ai unggut deg aleroho re O Sabo ai ombandu fene etma maseroho saleg lamag ulug debehup.

¹⁴O Sabo ai dag fil fahet de sebeleg angge biren wiriyug, misig de domba yohombuk on ahap fam ahalue mebon areroho ne eke re ahap serap wareg on fam wiriyug.

¹⁵O Sabo ai lang owag fahet de e akasia on bekit unduhuk on fam neg hilinggiyug.

¹⁶E lang owag etma ambiang lahabeg on yatdoho re 4 meter, ne ambiang nunggulig on de 66 sentimeter en fam debeiyug.

¹⁷Lang owag hundomog etma ken-ken biren heg debelug owag-owag etma misigmu ahundip hil lahup.

¹⁸O Sabo ai en selatan fil fahet de owag 20 en hilinggiyug,

¹⁹ne eangge no perak fam on de 40 en. E ken-ken biren heg fahet de apmane owag biren heheg feiyug.

²⁰O Sabo ai en utara fil fahet de owag 20 en

²¹eangge perak on de 40 en e ken-ken biren heg fahet de apmane owag biren heheg debehup.

²²O Sabo ai ambol barat fil etma fahet de e doung folfalik en hilinggiyug,

²³ne owag bireg heg de unggut-unggut etma fohup.

²⁴E owag etma re indipmu inim unggulmu inim ahundip debehup. Unggut hilinggig on biren eta oho re airoho neg debehup.

²⁵Aireg ma re abirangge re owag perak earoho hilinggig on de ligin en ne owag etma domog de biren heg apmane wereg laruhu.

²⁶E nunggulig on de 15 en e akasia on en buhun-debelug foaben de o sabo elan foma misig fil fahet,

²⁷foaben ekere amu fil en ahoreg laruhu on fahet, foaben ekere o sabo ambol barat fil etma aho deg laruhu on.

²⁸E emberimmu dulug apma dulug bul di ahan deg laruhu on de yaron o sabo ai foman-foma dipdeg laruhu.

²⁹E owag unduhuk on mel e nunggulig di ahan deg on mel, abirangge etma re emas inim neg sapliroho hilingguhup. Sehene e etma ahoreg laruhu angge etma oho re emas on neg buhun-duhup.

³⁰O Sabo aire wuruhun alere An den diroho wiriyug ulug dom su famen hweag-hirihi aleroho eta neg wiruhun.

³¹Sok de kain on eke hilingguruk kwit, kain lenan sako on domba oruk hag angge wol il bohol hwalon mel ungu on mel mebon mel fam seleben deg on fam hilinggiyug. Kain ai seleben duruk kwit de kerub [28] ilitdeg anyo et seleben diyug.

³²Hilinggi folug de kain ai e akasia on ohwan angge emas inim sapliroho hilinggig on fam sukni foruk angge oho emas on hilinggig angge perak on ohwan eareg on emberimmu wereg ma hilinggi feiyug.

³³ Airebelug de kain ai O Sabo onggwa saleg on apma suknuruk angge erareg on etmano fam sukni feiyug. Airoho debehup fam kain ai en de Ambe Mun Amu Enegma inim de Ambe Enegma inim hulireg ma ilonggo fil de Peti Sali wene wareg on fam helep biren etano yohwareg wereg angge anyo welamag ulug kwelabik lahup.

³⁴Peti Sali wene wareg ai aplit aire Peti ai emberimmu feiyug.

³⁵Meja di angge su angge walug feik waharukmu fahet de kanggog Ouswa alongma ai en dag fil utara fil etma feiyug, ne lampu eyog hilinggig ai neg de O Sabo ai ilonggoman apma selatan fil etma feiyug.

³⁶O Sabo ai sokma boreg laruhu on fahet de kain lenan sako on no wol il bohol hwal on mel ungu mel mebon mel fam soaleg angge fam hilinggiyug, hilinggi folug de ebene re enenggik mendaho on etma fam boriyug.

³⁷Sum boreg laruhu angge ai fahet de e akasia on foaben emas inim sapliroho buhun-debehup deg de sukni foruk angge emas on foaben etano nim wut-debehup. E unduhuk on etma fahet de eangge no perunggu on foaben hilinggiyug,” ulug hweag-etfag.