Read Ninia Yali KELUARAN 27 Bible Online

KELUARAN 27 - Ninia Yali bible

KELUARAN 27

¹“Mezbah eke e akasia fam wiriyug. Ebe wituk kwit de obabut de unggut hilinggoho, lahabeg de yatdeg ale nim nunggulig anggwereg ale nim de 2,2 meter, ne lahabeg de 1,3 meter en fam wiriyug.

²Ayuhuk atog emberimmu etlema re, unggut ilitdoho re andimuk mezbah ai nim misig amag ulug debeiyug. Abirangge re no perunggu fam sapli debeiyug.

³Kuali mel, sekop mel, mangkuk mel, garpu aeg soap mel, indok obale mel etma buhun-duruk kwit abirangge etma re no perunggu on fam sapliroho hilinggiyug.

⁴Kawat perunggu on yihilug de e beahan fahet de sehene ohwan angge beahan ai unggut apma fil kwelabe fohup.

⁵Kawat henaho angge aire mezbah ai en bul feneroho henaho folug de kawat henaho angge anyo mezbah apma fil maserebeiyug.

⁶E beahan de e akasia on biren angge perunggu nim sapliroho buhun-duhupdeg de,

⁷mezbah ai bearulug lauk kwit de mezbah anyo foma-foma sehene yihig anyo fam kwelabe foruk kamuhup.

⁸Obale mezbah aire e kahaleg on ilonggoma foleloho wiruhup ale ulug An den domma oman hweag-hirihi ale airoho neg wiriyug,” ulug hweag-etfag.

⁹Airoho ebagdeg eke uruk kwit de “An nobam Sabo wirig on o ambe lilimol balegma etma re kain wirilig on hekel il sako on fam yihig on ai fam maseroho kwelabe feiyug. Sum wirilig on ai il selatan fil de ebe yatdoho re 44 meter en debelug de,

¹⁰no perunggu fam lang owag hilinggig on ebe 20 en fam hambugap debeiyug, ne abirangge etare perunggu on neg doal angge feiyug, ne kwandi mel sukni foruk angge mel de perak on en debeiyug.

¹¹Ai hagdoho foma utara fil oho debehup,

¹²Foma barat fil de sum wirilig on aire yatdoho 22 meter en, ne owag belabeg on de num en, ne doal angge re num en debehup.

¹³Timur fil o sok yendeg fil etma re sum wirilig on ai yatdoho re 22 meter en neg,

¹⁴Sok ai hware fil mel bekit fil mel de sum wirilig sum etma hundomog boruhup, amu domog yatdoho re 6,6 meter e owag unduhuk on de henahan ne inindip de henahan fam fohup.

¹⁶Sok fahet de sum hulireg on yatdoho re 9 meter kain lenan sako on nim wol bohol il on nim, il ungu on mel mebon mel fam seleben deg angge, ne ebene hekel soaleg en bibo deg angge ai borebehup. Sokolma kain boreg laruhu on ai seneg lamag ulug de e owag ohwan fam nim ne eangge re ohwan fam hilingguhup.

¹⁷O lilimol maseroho e belabeg on aire eke en eke nim misig hundig lamag ulug de kwandi perak on fam ware fohup; kwandi aire perak on en ne eangge neg de perunggu on en debehup.

¹⁸Sum wiriloho o lilimol fam etma maseroho welaruhu on aire yatdoho re 44 meter ne anggweroho re 22 meter ne lahabeg de 2,2 meter en debehup. Kain wirilig on aire kain lenan il sako on fam yihikup neg eangge neg de no perunggu on fam debehup.

¹⁹O Sabo ai ilonggoma etma di angge su angge welaruhu angge mel, O Sabo ai fahet e delduk kamuhup angge mel, ne sum wiriloho boruruk kamuhup angge ai fahet mel, de perunggu on fam neg hilingguhup,” ulug hweag-etfag.

²⁰Eke hweag-utuk kwit de, “An Nobam Sabo wirigmu etma lampu ombagbag debehupmu ombagbagdeg lit neg welamag ulug, it ap homi Israel on en zaitun ahalue amu angge aroreg eleg on mun il wirik on neg lampu fahet walug wamag ulug mingming-enebiyug.

²¹At Harun omalikisi nim en de lampu ai hupmu huli en de hubet huli etma iren neg An nebe enam aik waharuk karuhukmu, Peti Sali wareg wene anyo olohotma re kain boregman dag fil etman hwalduk kamuhup. Wene melaleg aire it ap homi Israel on nim it enambiangma on en nim li mundoho-mundoho etma fam duruk-wauk kwit neg welamuhup,” ulug hweag-etfag.