Read Ninia Yali KELUARAN 28 Bible Online

KELUARAN 28 - Ninia Yali bible

KELUARAN 28

¹Eke hweag-utuk kwit de, “Hat howe Harun nim at omaliki Nadab, Abihu mel, Eleazar mel, Itamar mel, wol-esalug de iren An nil hanim duruk on imam wereg lit An nobahet yabuk duruk kamag ulug enemu eneko fesein.

²At Harun ebe along wereg lamag ulug de at asum imam fahet on seleben diyug.

³It ap sum seleben duruk on An den mun enggare feserihik enap etma wol-eneplug de, At Harun An nobahet eneko wereg lit ebe imam on atlug An nobahet yabuk duruk kamagdoho iren asum wirukwag ulug hweag-esakiyug.

⁴Iren de sum amigmu dagdeg on, efod mel sum jubah dag kwe on mel, ebe sum enenggik en seleben deg on mel, unggulmu bug deg on mel, bahaluk fahet mel wirukwag ulug hweag-esakiyug. Sum etma re hat howe Harun fahet nim at omaliki enobahet nim, iren enebe imam wereg lit An nobahet duruk kamag ulug sum imam fahet on wiruhup.

⁵Sum ai wituk kwit de wol il bohol on mel, ungu on mel mebon mel, hekel emas on mel lenan sako on mel, fam wiruhup. Ai debelug de efod fahet de hekel soaleg on fam alili angge boruhup.

⁷Elanma re efod ai het duruk on fahet sabu biren angge ilili fohup.

⁸Bahaluk misig eke hekel il sako on fam soaleg angge hekel misig on fam en misig hundig lamag ulug de sum efod ai fam seleben debehup.

⁹Helep delima biren walug de, ap emas hwesesengge wauk ale mun enggat on eke hera halug de aren helep ai fene hun Yakub omaliki etano enunuk enebe umur endag-atswa aleroho hwesesengge oko foukwag ulug herariyug. Airoho debelug de helep biren etano atog kwe emas on fam sebele folug de, it enunggul unuk nesanggo en anyo ebereg welamag ulug sum efod anyo ahale fam unummu menaho fohup. Airoho duhup ai fam de at Harun en it enunuk um fam walug lauk karuhu, ai fam An TUHAN en it enebe fahet nenda ebet-enesauk karuhuk.

¹³Emas ayuhuk bereleg on eta wereg kweleg de,

¹⁴bosiemanggen elang deg angge emas mun ebe on fam sabu hagdoho hilingguhup de emas en indip bereleg on anyo fam ilili fohup en hilinggiyug,” ulug hweag-etfag.

¹⁵“At Imam Agung anyo Allah enda boruk ale noluk amag ulug duruk kwit sum wan-duruk on fahet de amig mapnu angge misig eke wiriyug. Ne, amig mapnu angge ai wirukoho dug duhup angge mel hekel soaleg angge mel etma re no efod fahet on deg anyo hagdoho neg debehup.

¹⁶Ebe unggutdoho deg ma re biren sireg laruhu, ambiang yatdoho et anggweroho et de 22 sentimeter en heheg debehup.

¹⁷Amig mapnu angge ai fam de helep permata on asiog ohwan fam dopnoruhun. Asiog keram on fam de helep delima, topas, baiduri sepah nim fam dopno diyug.

¹⁸Ai en siog bireneg on fam de helep Zamrud, nilam, intan inim fam dopno diyug.

¹⁹Asiog henahaneg on fam de helep lazuardi, akik, kecubung nim fam dopno diyug.

²⁰Asiog ohwaneg on fam de helep pirus, yakut, ratna cempaka nim fam dopno diyug. Permata nesanggo en aire no emas fam bug debeiyug.

²¹Helep misig amu domog de hun Yakub omaliki nesanggo en misig on unuk eke ap homi enunggul unuk Israel on anyo ebereg welamag ulug hwesesengge oho feiyug.

²²Amig mapnu angge ai fahet de emas mun ebe on fam yihig angge hekel bombaleg biren angge hilinggiyug.

²³Eke sehene emas on biren yihig folug de amig mapnu angge ai atog emberim fil etlema kwelabe feiyug.

²⁴Airoho debelug de rantai biren angge etano re sehene emas biren etano fam elelekwe kwelabe fohup.

²⁵Atog foma biren etare ambiang sebeleg angge etano fam het debehupmu re amig mapnu angge aire no efod ahale um fam on anyo alukwe fil on nim hundig laruhu.

²⁶Sehene emas biren eke hilinggi folug de, amig mapnu angge ai ai atog apma fil het debehupmu re ilonggo fil en de efod ai bal hauk karuhu.

²⁷Ai mundoho debelug de emas on sehene biren eke yihiyug, yihig folug de bahaluk hekel il sako on fam yiko bug deg on en emberimmu, ne sabu efod fahet ummu biren lilig on etano en alukwe fil uluhun misig waregman horog apma fil hagdoho eta hilinggi feiyug.

²⁸Amig mapnu angge ai loloho wambuk fug angge bahaluk emberimmu wereg lamag ulug de sehene amig mapnu angge on aire sabu il bohol on sehene efod fahet on ai nim hundig laruhu.

²⁹At Harun ambe Ouswa ma anyo kuruk li re, aren ap homi enunggul unuk Israel on enunuk amig mapnu fam hwesesengge oho on anyo wan-dalug kuruk karuhu. Ai fam de An TUHAN en it nomaliki ai ebet esauk kwit neg welaruhuk.

³⁰ At Harun An wereg ma kuruk kwit wan-duruk kamag ulug de Urim mel, Tumim [29] mel eta amig mapnu anyo fam feiyug. Aren airoho eta hag li em duruk kwit de ap homi Israel on enobahet An nenda boruk kahi ale ai oluk amag ulug aren hundig-hundig amig mapnu ai wan-duruk karuhu,” ulug hweag-etfag.

³¹“Sum jubah efod emberimmu dag kwe wan-duruk on aire, hekel wol il bohol on fam yihig on wan-duruk kamuhup.

³²Enanggolop ele fahet de hebelelak duk no ulug de pita enenggik en seleben deg on fam omamne debeiyug.

³³Apma fil maseroho erahamu re, alili anggere, e delima anggen mel hag angge wol il bohol on mel ungu on mel mebon mel fam ilili folug de etma sahali kwe emas on anggeleg-hanggelegdoho walinggohore boruhup.

³⁵Sum jubah dag kwe on aire at Harun yabuk imam en duruk on duruk kwit wan-duruk karuhu. At ebe An nolohotma Ambe Enegma etma kwik waharukmu inim, etman wilibik laukmu inim, de atogma ai aplohok doleleng urukmu re at oluk welaruhu. Ne, aplohok elegma re at waratuk karuhu.

³⁶Alili angge emas mun ebe on fam hilinggi folug de ebene hwesesengge oho foruk kwit de ele diroho oho feiyug, ‘TUHAN obahet eneko wereg,’ ulug oho feiyug.

³⁷Ai oho folug de sabu il bohol on fam het debeiyug.

³⁸Alili angge emas on aire Harun elahama bug deg ma re, it ap homi Israel on enebe siag dulug en An nobahet di angge su angge feik waharuk on etmano, An TUHAN nebe en wauk karuhuk.

³⁹At Harun ebe sum aire hekel lenan il sako on fam yihikup. Ne, sum unggul asum misig eke re hekel lenan sako on fam yihikup, ne ban de henenggik en yaroho yihiyug.

⁴⁰It Harun omaliki etma oho enalongdoho deg lamag ulug de it nobahet sum kemeja mel bahaluk mel, enunggul asum mel yihiyug.

⁴¹Yihik folug de sum etma hare Harun inim at omaliki nim fam wan-debeseiyug. Airoho debeselug de iren An nobahet enebe eneko wereg lit imam amuhup deg yabuk duruk kamuhup en de e zaitun ahalue hililoho enebe unduhuk feseiyug.

⁴²Ai debelug de it enobahet sum celana baleg on hekel lenan sako on fam yihiyug. Sum ebe re enahap ap amu on en ha fug mu etma saleg lamag ulug de enahabimu en de enaho huliroho yihiyug.

⁴³Sum celana aire iren An nobahet An nobam sabo salegman lilimol fam etmano enebe imam eneg on wereg lit mezbah horogman Ambe Enegma etmano kwik laheg, wilibik waheg, duruk kwit sum wan-duruk kamuhup on fahet. Ai fam de it enahap ap en mel ha fug mu etma enameg en ulug waratuk kamuhup fug. Wene melaleg aire at Harun inim ne aren ondohoma on en nim airoho neg duruk kamuhup,” ulug hweag-etfag.