Read Ninia Yali KELUARAN 29 Bible Online

KELUARAN 29 - Ninia Yali bible

KELUARAN 29

¹Eke hweag-utuk kwit de, “It Harun inim at omaliki nim enebe imam An nobahet yabuk duruk kamag ulug unduhuk feseruk kwit de diroho duruk kamuhup. Sapi yohombuk ket sauwe on misig eke nim domba yohombuk ahapmale eleg on biren inim walug de,

²tepung terigu mun fano on fam de inin angge fituk eleg on nim ininiyug. Ininuhup angge anyo foma fam de roti no zaitun ahalue fam wiruhup, ne, foma re ahalue eleg angge wiruhup, ne, dindikdoho on de kue ahalue aro heheg wiruhup.

³Wiroho re si yihig elma yohwaroho folug An nobahet foruk angge sapi yohombuk nim, domba yohombuk biren etano nim walug og-nirik waharukmu etma fohup.

⁴At Harun omaliki nim de An nobam sabo saleg on anyo sokolma etma aik watlug de enebe ho-dowag ulug hweag-esakiyug.

⁵Harun fam de asum imam on anyo wan-deberuk kwit, sum kemeja nim sum efod nim, sum dag kwe on jubah efod saloho wan-duruk on anyo nim amig mapnu inim, bahaluk nim wan-debeiyug.

⁶Unggul hobog ai unggulmu bug debelug de ai fene alili angge emas on fam de TUHAN obahet eneko wereg, ulug baleg angge anyo bug debeiyug.

⁷Airoho debelug de ahalue ap unduhuk feseruk kwit duruk on anyo oko wahundeg unggul mu hilili folug de ahalue ebe aroriyug.

⁸Ai mundoho debelug de, at omaliki wol-enebuhundeg wamuhup mu enesum enebe sum wan-debeseheg,

⁹bahaluk it enobam bug debeseheg, dulug de enenggul asum oho enenggulmu hobog debesehun. Airoho neg haren at Harun inim at omaliki nim unduhuk fesehun. Airoho unduhuk fesehunmu re it Harun ambiangma on etma re enebe An nobahet imam unduhuk wereg lit mundoho-mundoho duruk kamuhup.

¹⁰Ai en sapi yohombuk on ai walug An nobam sabo sokolma waruhun deg, Harun omaliki nim enenggik unggulmu sebele folug wereg kweleg,

¹¹sapi yohombuk ai An nil hanim o sabo sokolma etma ware feiyug.

¹²Sapi ai amep henggik en walug de mezbah ai andimuk fene etma are debelug, dindik aruhu on de mezbah apma fil erahamu hilili feiyug.

¹³Ai debelug de, sapi ai sei amian mel, ilonggomangge hwililp deg on mel amuanggo anggen biren mun fano angge etma mel, oko mezbah emberimmu folug indok yaloho An og-nuruhun.

¹⁴Wam sapi ai ino mel, alot mel, ahap mel, enggik, eyog abirangge etma oko dag fil yale fohun. Airoho yaluhun on aire, it imam enesiag elehap dukwag ulug duhun.

¹⁵Ai debelug de domba yohombuk on etano en misig eke oko walug de it Harun omaliki inim enenggik unggul mu sebele folug wereg kweleg,

¹⁶domba ai ware folug, amep oko mezbah unggut ilitdoho etma hilili feiyug.

¹⁷Domba yohombuk on ai senggeloho re ilonggomangge mel, enggik eyog abirangge nim de fanoroho omaho folug de unggul nim amu angge on kongdeg omano nim emberimmu lahabe feiyug.

¹⁸ Domba senggeleg angge abirangge ai oko mezbah emberimmu lahabe folug An nobahet indok yaloho og-numuhupmu, yaluhup angge amben ai fam An nendama healuhu.

¹⁹Ai en de domba yohombuk on eke ap unduhuk feseruk kwit duruk on fahet walug de at Harun omaliki nim en enenggik wam ai unggulmu sebele foukwag ulug hweag-esakiyug.

²⁰Airoho debelug de domba yohombuk anyo waroho senggele folug, amep dorangge oko re Harum omaliki nim enesanggo amuluk bekit fil mel, enenggik foap bekit fil mel, eneyog foap bekit fil mel, fam are debehun. Mep dindik aruhu on etma re mezbah unggut ilitdoho etma hilili feiyug.

²¹Mep mel, ahalue ap in-enepuk kwit feseruk on fahet ulug on mel lohon wahun deg, Harun omalikisi mel enebene nim enesum fene nim kwetete-esahun. Airoho duhun ai fam de Harun omaliki enebe mel enesum mel aire, An nobahet eneko welamuhup.

²²Domba yohombuk on anyo asei mel ahaema asei wereg on anyo mel, ilonggoma angge fam asei hwililip deg on anyo mel, wam amu anggo famen mun fano fil on halug mel, amu anggo anggen biren etano asei et angge mel, enggik eyog bekit fil on mel, wakiyug.

²³Ai en de si elma roti An nobahet ulug fohup on anyo en ebe amu-amu en de misig heheg wakiyug. Wauk kwit de zaitun ahalue fam wirig on de misig, ne ahalue eleg angge wirig on de misig, ne kue misig inim wakiyug.

²⁴Airoho walug de di angge su angge nauk on anyo oko at Harun omaliki nim enenggikmu fohun mu, iren An Nobahet og-nutuk kwit, Nunuk wareg foruk kamuhup.

²⁵Airoho debelug de roti anyo it enenggik mu en angge wahun deg, mezbah emberimmu An nobahet di on su on yale fohun on anyo emberimmu etma yale fohun. Yaluhun angge ai amben en An nendama healuhu.

²⁶Domba yohombuk anyo amig aire An og-nutuk on Nunuk wareg on ulug og-numuk ne, ai neg de hat hobahet on aruhu.

²⁷It imam on unduhuk feseruk salim ai fam domba yohombuk anyo amig mel aho mel de An og-nutuk on Nunuk wareg on ulug og-nutlug it imam enobahet wepdoho fohup.

²⁸An den wene katukdoho iminmu ap en mel aham duhup fug on de su: It An nomaliki en An nobahet anggerang owam waroho foukoho walug waharuk kwit etma, wam amig nim, eyog enggik nim etma re, it imam on enobahet. Ai it An nomaliki en An nobahet foruk kamuhup.

²⁹Sum at Harun asum An nobahet duruk kwit wan-duruk on aire it omaliki enebe unduhuk feseruk kwit wan-duruk kamuhup en wan-debesehu.

³⁰Harun amloho akni obalma imam atlug sum ai wandoho o An Nobam saboma Ambe Enegma anyo kulug yabuk duruk kwit halug de sum ai wandoho neg duruk men de nukoho sabiren welaruhu.

³¹Wam domba at Harun omaliki nim unduhuk feseruk kwit waruhup on anyo ino walug de, obale mun ousaroho enegma etma eseruhup.

³²Weraho folug de ino aire it An nobam sokolma etman, roti alinlan si elma yohwareg on etma nim nahup.

³³It nahup alere it enebe unduhuk feseruk kwit enesiag elehapdoho nenobahaukwag ulug di on su on fohup on ai nahup. We it imam on neg de nauk angge An nunuk waroho nobahakup on ai nahup.

³⁴Nahupmen lahe likia sekandoho ino oho roti etmano oho dindik atuk on wereg halug, ai mundoho eneko fohup angge on deg ma re eke nahup fug, mundoho indokma yale fohup.

³⁵It Harun omaliki nim unduhuk feseruk kwit wene kabog-duruk kwit halug de An den wene melaloho hweag-hesauihik hagdoho nukoho sabit en hoporoho duhup.

³⁶Nukoho misig salim fam de sapi yohombuk on misig henesiag elehapdoho nenobahaukwag ulug on fahet watuk kamuhup. Ai watuk kamuhup ai fam de mezbah anyo horoho koloreberuk kamuhup. Airoho debelug de mezbah anyo An nobahet eneg welamag ulug de haren zaitun ahalue fam aredeberuk karuhun.

³⁷Nukoho sabirenam eta fam nokoho hundig-hundig airoho duruk kamuk. Ai durukmu re mezbah nim abirangge en etma nim horeg on welaruhu; ne amu-amu angge en eke mezbah ai bal-hauk angge halug de, TUHAN neg og-utuk kamuhup, ne ap sa en eke mezbah ai bal-hauk halug de horeg welamag ulug debehup on aire mun omamne deg ma[30] re enebe alemat atuk kamuhup,” ulug hweag-etfag.

³⁸“Di li em su li em nukoho hundig-hundig etma re mezbah ai emberimmu etma domba yohombuk on biren umur satu tahun deg on waroho yalduk kamuhup.

³⁹Misig eke re hubet waroho yale folug, eke hupmu waroho yalduk kamuhup.

⁴⁰Domba omalik hubet waroho yalduk on ai nim de tepung terigu mun fano on satu kilogram inim zaitun ahalue satu liter mel hahambik deg angge nim feiyug. Ai inim de anggur ahaik satu liter inim feiyug.

⁴¹Domba omalik hupmu waroho yalduk kamuhup on ai ohore abut de hubet on duhup ale eta higitdoho tepung inim zaitun ahalue inim, anggur ahaik nim folug yaliyug. Airoho yaldukmu amben ai en An nendama healuhu.

⁴²Ai en fobik li mundoho-mundoho etma fam duruk kamuhup ale oho re, hiren waroho yal-nutuk on etma re walug An Nobam sabo sokolma An nolohotman etma feik waharuk kamuhup. Etman neg An nebe nomaliki nim ambi atlug, hat fam nele matuk karuhuk.

⁴³Etan An nebe it enunggul unuk Israel on nim ambi atuk karuhuk, ne An nebe enam atuk on naseleg ai en de obale eta mun eneg horoho foruk karuhu.

⁴⁴An den de o sabo ai nim mezbah ai nim ousa ap debehuk. Ne, Harun nim at omalikisi nim de enebe imam wereg lit An nobahet duruk kamag ulug de An den enebe eneko fesehuk.

⁴⁵An nebe it enunggul unuk Israel on enenggeleg ma wereg lit de it Enakni Allah welaruhuk.

⁴⁶An nebe TUHAN Allah it enanggelegma welaruhuk en ulug o Mesir en og-eneplug wilibik waharihik ale it enoluk deg lamuhup. An nebe re it enakni TUHAN Allah anyo” ulug hweag-etfag.