Read Ninia Yali KELUARAN 30 Bible Online

KELUARAN 30 - Ninia Yali bible

KELUARAN 30

¹TUHAN en nikangge ele Musa fam uruk kwit de, “Amben fano angge yalduk mu obale mezbah eke e akasia on fam wiriyug.

²Mezbah ai obabut de unggut ohwan hilinggoho wiriyug ne nunggulig wiriloho inim, yatdoho ilihig inim de 45 sentimeter heheg, ne lahabeg on de 90 sentimeter doho wiruhup. Unggut ohwan eta fam ilitdoho re andimuk ilitdoho mezbah nim hundig lamag ulug debeiyug.

³Emberim fil etlema nim unggut ohwan etma nim andimuk fam etma nim de emas mun ebe on fam sapliroho wiriyug. Airoho debelug de ambiang berel angge re emas on fam maseroho debeiyug.

⁴Unggut sebel angge apma re e mezbah ai bearulug lauk on e ahoreg lamag ulug de ambiang foma-foma sehene emas on biren yiko feiyug.

⁵E beahan aire e akasia on neg emas nim sapliroho wiruhup.

⁶Wiri folug de Mezbah aire ebe e Peti Sali wene olohotma kain wereg on ai dag fil obale An nebe hat ninim ambi atuk kamuhukmu eta hwerie feiyug.

⁷Airoho fohupmu re hubet hundig at Harun lampu ulog dikoho waharuk kwit de, amben fano angge ai mezbah emberimmu yale folug neg duruk karuhu.

⁸Ai higitdoho nika ale hupmu lampu ulog dik waharuk kwit oho re airoho amben fano angge anyo mezbah emberimmu etma yale folug neg duruk karuhu. Amben fano angge yalduk ale aire di li em su li em etma hindik-hundig airoho neg duruk kamuhup.

⁹Mezbah ai emberimmu yaluk fug ulug ousa wereg angge re, wam wareg mel, di angge su angge amep wereg eleg angge on mel, etma yalduk kamuhup hayog; eke ik anggur ahalue ulug oho emberimmu etma hililuhup hayog.

¹⁰Tahun misig fam de misiham at Harun en de mezbah ai fanoap duruk kwit, wam endetuk on enesiag elehapdoho nenobahaukwag ulug foruk on anyo amep fam de andimuk ohwan etano fene kwete heg horuruk karuhu. Airoho duruk ale aire tahun hundig-hundig di li em su li em etma duruk neg karuhu. Mezbah ai abirangge mun horeg ma An nobahet eneko fohup,” ulug hweag-etfag.

¹¹TUHAN en Musa fam hweag-utuk kwit de,

¹²“Haren it ap homi enunggul unuk Israel on enebe domog wenako ininuk lisu balduk li em aire, it ap on enebe domog de it ininuk balduk li em eta anggin enobam aik wam no ulug de onggo baloho uang An og-nutuk kamuhup.

¹³ It ap ininuk balduk salim ai wenag enebuhup on halug de enemu domog uang ebe di hwili foruk kamuhup ulug An Nobam Saboma foruk aleroho An nobahet domogdoho kabog-duruk kamuhup.

¹⁴Ap on enebe hundomog wenaharuk li em ai fam enenuk baloho wenag-enebuhup on it ap enebe umur dua puluh tahun deg on halug oho ne it dahandoho emberim fil deg on halug oho re iren An nobahet domogdoho kabog-duruk on ai fam kabog-duruk kamuhup.

¹⁵Iren enonggwareg fahet onggo baloho ulug kabog-duruk kwit de ap dungon en alongdoho fohu fug, ne ap ilmoleg on en oho re dotdoho fohu fug.

¹⁶Haren de uang ai it ap homi Israel on fam kabog-dulug de uang ai on aire An Nobam Sabo wirig mu etma hwalduk kamag ulug diyug. Mundoho aire it enebe enonggo baloho duruk kamuhup, ne An den de it enebe ebet enusug lit hwal-enepuk karuhuk,” ulug hweag-etfag.

¹⁷TUHAN en Musa fam hweag-utuk kwit,

¹⁸ “Ik yenggeldukmu fahet obale perunggu on fam misig eke hilingguruk kwit de oholuk eangge re perunggu on fam neg buhun diyug. Buhundoho re obale hilinggig ai o sabo dulug Mezbah dulug bul honggolegma etma ik inim hwenanggoho feiyug.

¹⁹Ik aire it Harun mel omaliki mel owan O Saboma kwik wam fug angge,

²⁰ite di angge su angge foruk on etmano walug mezbah horogma aik wam fug angge re it enenggik eneyog mel horuruk kamag ulug feiyug. It enebe binggi enowaruk no ulug de iren airoho duruk kamuhup. Wene melaleg aire iren inim ne it enambiangma en endag-amuhup on en nim hundig-hundig hole folug duruk neg kamuhup,” ulug hweag-etfag.

²² TUHAN en Musa fam uruk kwit,

²³“Amben angge mun fano on etma walug, mur enam kilo lokoreg on nim, tiga kilo e unduk mit deg on nim, tiga kilo el amben fano sang deg on nim, e teja on enam kilo inim, walug de,

²⁴abirangge etma re An Nobam en anggin wal-hauk aleroho on fam anggin ilit diyug. Ilit duruk kwit de zaitun ahalue re empat liter inim dopno debelug de,

²⁵ahalue hilil-enepuk on wituk kwit de, ahalue amben sang deg on wituk kwit menenduk hag wiriyug.

²⁶Amben fano on anggelegsegdoho wirig angge ai fam de An Nobam sabo wirig mu etma duruk on fahet nim Peti Sali wene wareg anyo nim,

²⁷e meja anyo mel ai emberimmu en duruk angge wereg on etma fam mel, lampu owag anyo ebene wereg angge fam mel, amben fano angge yaldukmu mezbah anyo fam mel,

²⁸mezbah waroho indok yaldukmu anyo mel ai fam duruk angge omano fam mel, ik yenggele foruk angge obale anyo oholuk et fahet mel etma fahet ahalue watuk angge debeiyug.

²⁹Ebe airoho di angge su angge etma mundoho aire An nobahet neg eneg wereg lamag ulug debehunmu re abirangge mun eneg welaruhu. Di on su on en mel, ap homi en mel ai fam lohon bal hauk halug de no etma ousa eneg wereg ale mun omamne deg ma re it enebe alemat dauk kamuhup.[31]

³⁰At Harun omaliki nim ai oho re imam wereg lit An nobahet duruk kamag ulug de ahalue enenggulmu hilili folug eneko fesehun.

³¹Haren it ap homi enunggul unuk Israel on hweag-esauk kwit de, di li em su li em ahalue walug waharuk kamuhup on etma re An nobahet neg welaruhu ulug iyug.

³²Ahalue aire ap we on enenggul mu hesangge hililuk fug, ne ahalue ai on eke amu on fahet duk fug. Ahalue aire mun horeg on ulug mun ousa on horeg wereg laruhu.

³³Ahalue ai on ap eke we on imam on fug famen, ahalue ai wituk halug oho, ne ai on fam di ale su ale duruk halug oho, ap ai on An nomaliki on boruk karuhuk fug,” ulug hweag-etfag.

³⁴TUHAN en Musa fam hweag-utuk kwit de, “Haren amben angge orohole amu-amu etma ebe higitdoho neg, e hendali humu mel, lokan ahap mel, rasamala humu mel, amben fano angge mun ibik-ebe on mel, walug de,

³⁵abirangge etma fam de dupa ininig on amben mun fano on wituk on fahet diyug. Dupa ai il mun fanoreg lit wereg ma An Nobahet duruk on welamag ulug de mayu inim lohon wakiyug.

³⁶Amben angge ai en foma re sahaloho mun alinlan debeiyug. Airoho debelug de ebe walug An Nobam Saboma etma kwik lalug Peti sali wene wereg ma etma hilili feik lakiyug. Amben angge aire mun amu ousaroho An nobahet eneko wereg angge boruk kamuk. Hit henonggwareg fahet on ulug amben angge amu angge en ai hagdoho ulug buhun da fug.

³⁸Ap sa en amben angge ai hagdoho buhun dauk halug, ap ai An nomaliki on boruk karuhuk fug,” ulug hweag-etfag.