Read Ninia Yali KELUARAN 31 Bible Online

KELUARAN 31 - Ninia Yali bible

KELUARAN 31

¹TUHAN en Musa hweag-utuk kwit de,

²“An den hun Bezaleel hun Huri amloho, hun Hur omba unggul unuk Yehuda on en anyo momaldihik

³An nomamne[32] anyo at obam we og-itihik. An den de at fam enda wenggeleg fam dukwag ulug inim, di on su on mundoho dukwag ulug inim, at enggik fam en di on su on mundoho felaluk alerohon inim og-itihik:

⁴Ai ebe re di on su on emas, perak, perunggu on mel fam wituk kwit su diroho debelug witul ulug wal-fal halug wituk kamag ulug inim;

⁵helep permata fanoroho doalduk on fahet man fam al warukwag ulug inim; e fam hwesesengge wowag ulug inim, ne di on su on enggik fam en felal heheg dukwag ulug inim enggat on og-itihik.

⁶At Oholiab hun Ahisamakh amloho unggul unuk Dan on anyo oho re at let duruk kamag ulug An den momaldihik. An den it tukang-tukang amu on fam enoluk mun enggat humon fam An den di on diek ulug hweag-esaukmu duruk ale fahet og-esauihik.

⁷An Nobam Sabo ai mel, Peti Sali wene ai mel, aplit sebeleg on ai mel, o Sabo ai ilonggo elekwe wereg angge mel ebere,

⁸meja ebe inim, ai emberimmu wereg angge nim, lampu emas mun ebe on fam wirig angge anyo eyog inim, ai fam wereg angge inim, mezbah amben fano angge yalduk mu anyo mel,

⁹mezbah di angge su angge walug yaldukmu anyo mel, anyo fam duruk angge mel, ik yenggeleg angge obale anyo mel, oholuk eangge mel,

¹⁰sum it Harun omaliki inim enebe imam wereg lit yabuk dukoho lahapuk asum mel,

¹¹ahalue enunggulmu hililduk on fahet mel, Ambe Enegma anyo amben fano on yalduk angge fahet on mel, wirukwag ulug hweag-esauihik. Mundoho etma re An den diroho suroho duhup ulug hat melale hobahaki ale eta alit dindokdoho neg duhun,” ulug hweag-etfag.

¹²At TUHAN en de it ap homi enunggul unuk Israel on fam

¹³wene unduhuk feik lowag ulug Musa mingming duruk kwit de, “Nukoho Sabat ai salim kel wat-dauk kamuhup ulug An den unduhuk ferihik mu re hiren nukoho ai leho kamuk. Nukoho aire di li em su li em etma fam hit inim An ninim nenenda ebereg wereg lit, hiren de we An neg TUHAN welahi ale mel, ne hit henebe An nonggwareg nomaliki on henobaharik ale nim henoluk amuhup.

¹⁴ Nukoho kel wat-dauk salim aire, nukoho su re nukoho mun eneg horeg on ulug hiren leho foruk kamuhup. Hit henobahet de nukoho folfalik en eta fam yabuk duruk kamag ulug og-hesauihik, famen de nukoho sabit on aire nukoho humon An nobahet eneko folug welamuhup on. Ap eke en nukoho ai leho bouk fug angge yabuk duruk halug de unggum de ebe binggi waruhup.

¹⁶Hit henunggul unuk Israel on de nukoho aire wene sali wat-wat atuhuk on anyo eneg angge ulug ebetuk kamuhup.

¹⁷ An TUHAN nebe en de nukoho folfalik en fam bohol kwenang inim wal-deberihik, ne nukoho sabit angge ai fam de kel waroho bok welatihik mu re, nukoho aire it ap homi Israel on nim An ninim fam nenenda ebereg welamuhuk on, isi,” iyug ulug hweag-etfag.

¹⁸Airoho at Musa inim Dom Sinai anyo fam en ele ulug de, At Allah en de helep biren kahaleg angge fam Allah en wene melaleg baleg angge anyo Musa og-etfag.