Read Ninia Yali KELUARAN 32 Bible Online

KELUARAN 32 - Ninia Yali bible

KELUARAN 32

¹ It ap homi Israel on omano en hauk men de at Musa anyo domma etlemano anunuroho wereg lit wambik wam fug angge neg wereg ale en de, it anyo at Harun akit walinggik lebagdeg hweag-utuk kwit de, “Nit de hun Musa o Mesir en og-neneplug wilibik wahasi ahun anyo ambi keroho atsi e? Nit nenapeleg deg, angge re nit og-neneplug lauk on fahet ilah [33] eke wit-nesakin,” ulug hweag-etfag.

²Airoho hweag-etfag ma re, Harun en it hweag-esauk kwit de, “Hit henohwesi mel henomaliki mel enesanggoma angge emas kwelabeg angge etma kobog-dulug an nakit walug manu,” ulug hweag-esebag.

³Hweag-esebag ma re iren enesanggoma angge emas omano enemu domog en kobog dulug de Harun og-irik watfag.

⁴ Og-irik watfag ma re at Harun en enesanggoma angge etma oko re lop dukwag ulug weratfagdeg de lop deg angge anyo ahut hilingguruk angge fam hililoho kwelapfagdeg de anyo fam en sapi ahut ilit deg angge witfag. Airoho witfag ma it ap homi enunggul unuk anyo on en uruk kwit de, “Yaho hit Israel henap, ilah nit o Mesir en og-neneplug wilibik wahasi on de ebe su!” ulug ebag.

⁵Ai en at Harun en mezbah eke sapi emas anyo olohotma etano wiri febagdeg, wene hweag-esauk kwit de, “Sono re At TUHAN along bolug leho foruk kwit de, soni eseruhuk,” ulug hweag-esebag.

⁶ Airoho hweag-esebag ma re likia hubet-habet de ap homi Israel on abirangge en wam waroho indok yaloho og-utuk on mel, ne foma re anggerang owam wareheg duruk on ulug, walug watfag. Airoho walug watfagdeg de it anyo enebe hwerieg wereg lit enasiburu nenggeg, enahaik nenggeg debagdeg, inatfagdeg enahayeg en duruk katfag.

⁷Airoho duruk mu re TUHAN en Musa fam uruk kwit de, “Folo-folo wambik lag, ap homi haren o Mesir en og-eneplug wilibik waharihin on anyo en siag humon dehesa.

⁸Iren de An Nawene melaleg anyo dahandoho dehesa. Iren de sapi ahut ilitdeg emas werako lop deg angge fam wiri fehesareg de apne wauk kwit wam waroho og-utuk. Iren enele uruk kwit de, Su re ilah nit o Mesir en og-neneplug wilibik wahasi on anyo, uruk.

⁹It ap homi enunggul unuk ai on aire it mun enenggul owag haro deg on An mundoho noluk deg.

¹⁰An den de it nolok enobam fehireg enebe mundoho elehap debesemin en duruk kahi anggere An nobam kwe baleg ale nabuk fug. Famen de hat inim haren ondohoma on inim de An den ap homi henunggul unuk humon henobahakuk,” ulug hweag-etfag.

¹¹ Airoho hweag-etfag man de Musa en akni TUHAN Allah heng duruk kwit de diroho ebag, “TUHAN, nunggwelug Haren it ai enobam airoho debemin ulug duruk kahen? Hat halong humon wereg lit homamne humon fam o Mesir en enahap wendat-enepihin omano hwi?

¹²Haren it enebe elehap debesemihin men de, it ap homi Mesir on en uruk kwit de, Aren ap homi o Mesir suman og-eneplug lasi anyo re o domma etman enebe mundoho binggi enowarikoho ne enebe mundoho elehapdoho feseikoho og-eneplug lasi, ulug airoho uhup. TUHAN nakni, airoho fug anggere Haren ap homi enunggul unuk ai on alema re fesouk fug, Hendaman dimin behen ale ai aham din.

¹³ Haren hamingming angge Abraham, Ishak, Yakub mel etano ebet esakin. Haren it fam sali wat-esauk kwit, henomaliki sohwalanggen bohol fam ililig hag saha uhup, ne eke kwenang Haren abug og-esauk kwit it enombawi og-esahukmu li mundoho-mundoho etma it enengge aruhu ulug hombuk baloho hweag-esauihin ale anyo ebet hakin,” ulug hweag-etfag.

¹⁴airoho hweag-etfag ma re, At TUHAN en it ap homi anyo fam siahap debesehuk ulug enda ahe lahabag on anyo enobam feseruk ale embesebagdeg Enda aham debag.

¹⁵At Musa domman sombandoho Allah wene melaleg helep kahaleg biren angge fam fomat-fomat baleg angge etano walug wambik watfag.

¹⁶Allah amu en helep ai buhun-debebagdeg At awene melaleg anyo lisu helep eta fam baloho febag.

¹⁷Owan kwema wambik waharuk kwit Yosua en hol-hauk men de ap homi Israel on omano enele ya-ngai angge duruk katfag. Duruk katfag ma re, aren Musa fam uruk kwit de, “Enele ya-ngai angge weim amitmit hagdoho o sabo wirigmu etmano en uruk,” ulug hweag-etfag.

¹⁸Hweag-etfag ma at Musa en uruk kwit de, “Enele aire enowatuk mu nga duruk hag oho, ne enalong atlug hag oho re uruk fug; aire ap homi en suni uruk on deg,” ulug hweag-etfag.

¹⁹At Musa ebe o sabo wirig on horogma etano wambik watfagdeg hauk men de, sapi emas anyo wereg ma re ap homi en mot-duruk kwit yunggulduk mu esebagdeg de at mun olok humon atfag. Airoho atfagdeg de Dom indipmu etano en helep at Musa en walug wambik watfag angge anyo fulambe esebag ma re mun luluhun-luluhun debebag.

²⁰Airoho debebagdeg de, sapi emas on it ap homi Israel on en witfag on anyo webagdeg, indok fam lopdoho re helep en sihil-sahaldoho ul hagdoho debebagdeg de ik inim hahambik debebagdeg de ap homi Israel on etmano nakiek ulug hweag-esebag.

²¹Aren Harun fam hweag-utuk kwit de, “Iren hat hobam nunggwe ale duruk en haren it fotog-esehen ma siag humale su duruk kahesa?” ulug hweag-etfag.

²²Hweag-etfag ma, Harun en onggo uruk kwit de, “An bet-nabuk fug; it ap homi au en siag dukoho lit duruk ale re hat holuk deg anyo.

²³Iren an hweag-nutuk kwit de, Nite hun Musa o Mesir en og-neneplug wilibik wahasi ahun anyo ambi keroho atsi e nit nenapeleg deg; angge re nit og-neneplug lauk on fahet ilah eke wit-nesakin, ulug uruk en.

²⁴An den de it enelili angge emas on etma walug wamag ulug hweag-esauihik mu iren an nakit walug wahausa. Enelili angge abirangge anyo an den oko wauihik deg, indokma kwelabe ferihik mu sapi au atsi!” ulug hweag-etfag.

²⁵At Musa en boruk kwit de, Harun en it ap homi Israel en airoho dukwag ulug embesebag on aire wam kuda obam en hesangge wilibi feserukmu hag debesesimu ap homi enaselei on en unda yag-enepuk on debesehup au, bebag.

²⁶Ai fam de at ebe o sabo sokolma inatlug ele hwiruruk kwit de, “Ap sa en TUHAN ibil atmin behen on halug de folo manik!” ulug hweag-esebag ma re it enunggul unuk Lewi on neg Musa ebe walinggoho kabog-dik watfag.

²⁷Watfag ma aren it hweag-esauk kwit, “TUHAN Allah Israel on en hit melal-henepuk kwit de diroho eheik: Hit henebe domog en de henenggarog lisoho waluhupdeg de henebe o sabo wirig kwe oma, o sokole su fam en de o sokole eke on fam etma, hiren henamepsi mel, henori mel, it henobam sokole nikama on mel mundoho binggi enowatil lakiek eheik,” ulug hweag-esebag.

²⁸Airoho hweag-esebag ma re it enunggul unuk Lewi on anyo en de wene melaleg ai higitdoho dil lebag ma re nukoho ai salim ap enowatfag ma waratfag on de 3.000 en enowatfag.

²⁹At Musa en it enunggul unuk Lewi on fam uruk kwit de, “Yoho su salim de hit henebe TUHAN obahet eneko fahat dehepdeg[34] imam unduhuk welamul ulug de TUHAN obahetdoho hiren henomaliki mel, henori mel, enowarehepma re TUHAN en hit henobam fanoap henobahakeik,” ulug hweag-esebag.

³⁰Likia re Musa en it ap homi etmano fam uruk kwit de, “Hit mundoho siag humon duruhup. Famen de ketia eke nim an dom ai fam lahamin deg TUHAN olohotma aik lahamin; anggere hit henesiag ai fahet olok nobahamisi hayog,” ulug hweag-esebag.

³¹Airoho ulug de Musa anyo dom fam TUHAN wereg ma lahabagdeg ele uruk kwit de, “Ap homi anyo en de siag mun humon duswa. Iren de kembu ilah emas wutswa.

³² Ai halug de nakni henda fano en it enesiag hapelehapdoho fein; ne airoho dimihin fug halug de an nunuk buku ap homi enoluk mundoho welamuhup on enenuk baleg on anyo fam en ho-esakin,” ulug hweag-etfag.

³³Airoho ebag ma TUHAN en onggo hweag-utuk kwit de, “We it ap homi siag duswa on ai enenuk neg de buku ai fam An den ho-esamin.

³⁴Ketiare lamihindeg An den obale hweag-hitihik mu etmano og-eneplug lakin. An nayonggo noruk on malaikat en hat hondog-haplug lauk kamlusa, famen de li aik waruhu on fam etma ap homi ai it enesiag onggo An den unggum enobam fesehuk,” ulug hweag-etfag.

³⁵Airoho hweag-etfagdeg de it ap homi anyo en Harun fam sapi emas on ahut wit-nesakin ulug mingming debag ai fam de At TUHAN en enobam anggin on fesebag.