Read Ninia Yali KELUARAN 33 Bible Online

KELUARAN 33 - Ninia Yali bible

KELUARAN 33

¹ Ai en de TUHAN en Musa fam uruk kwit de, “O suma embeselug de it ap homi haren o Mesir en og-eneplug waharihin on au nim seberoho re o kwenang An den it Abraham, Ishak, Yakub mel, iren ondohoma on fahet mel og-hesahuk ulug abug hweag-esauihik mu etma lakin.

²An den de malaikat misig hit kwe hweag-hisil lauk kamag ulug mondorik waruhuk. An den de it ap homi enunggul unuk Kanaan on, Amori on, Het on, Feris on, Hewi on, Yebus on mel etma muko wilibi fesehuk.

³Hit henebe re kwenang munangge-manangge mundoho wereg ma, kwenang hesilig on fam etma fam lahup. Famen de An nebe re hit henunggul unuk su on de mun henunggul owag haroreg lahepma re, kweman hit binggi henowarihi ha no re hit hinim lahuk fug,” ulug hweag-etfag.

⁴Ai en At TUHAN en Musa fam ap homi Israel on hweag-esa lowag ulug mingming duruk kwit de, “Hit henunggul unuk su on de henunggul owag mun haroreg lahep. We il misig ninim lauldeg ulug An hit hinim lahala man de, dik-demdoho hit henebe mun elehap henobahaki ha alereg. Hit henebene henalili angge lahabeg lahep on etma nonggoloho foluhupmu re An den de hit henobam diroho duhuk ulug momale femin eheik, iyug,” ulug hweag-etfag. Airoho At TUHAN en bet-enepfag ale anyo enesanggo holfagdeg de ap fong watuk on en deg hag enenda mun hesilduk katfag. Airoho debagdeg de iren enalili angge etmano nonggolfag. Airoho debagdeg de it ap homi Israel on anyo Dom Sinai embeselug lebag huli anyo en de it enalili eke wan-duruk katfag.

⁷Hundig-hundig it ap homi Israel on enobam sabo wituk li em de at Musa re angge Kemah anyo hwelalug de it ap homi etma weregman il yatdoho hagdoho wit-dauk katfag. Ne, aren Kemah wituk katfag on aire unuk TUHAN Obam Sabo ai, ne ap sa en TUHAN enda boruk ale hweag-nomag ulug halug de etma neg lauk katfag.

⁸Ne, at Musa O TUHAN Obam Sabo wirigmu etma lauk li em de it ap homi Israel on etmano enobam sabo domog sokolma unduhuk lit inil furegman neg de at Musa ebe o anyo ilonggoma kwik lauk katfag.

⁹At Musa mundoho kwik laukmu re anggulog unduhuk on anyo wambik watlug de o Sabo sokolma etmano bok aik wambik waharuk katfag. Ne, anggulog ai fam en de At TUHAN en ele uruk katfag.

¹⁰Henanggulog unduhuk on anyo o Sabo sokolma bok aik wambik waharukmu it ap homi Israel on en inil halug de it ap homi anyo enebe mundoho inatlug de it enobam sabo sokole kwe domog enerohole belabeg sahaun-duruk katfag.

¹¹At TUHAN en de Musa inim enele matuk kwit de ap en enori nim enorohole kwelabeg enele matuk hag enele matuk katfag. Airoho ulug de at Musa ebe sombandoho o Sabo salegma etmano watfag. Famen de at Yosua hun Nun amloho ebe sauwe omalik Musa let-duruk katfag on anyo neg de wilibik wam fug angge O Sabo anyo ilonggoma etmano neg welatfag.

¹²Nukoho misig salim de at Musa en TUHAN fam uruk kwit de, “TUHAN, Haren de ap homi oma melaloho og-eneplug o An den abug og-hitihik mu etma lakin ulug an mingming-napihin. Famen de, ap hat let hapuk karuhu on de ebe su mondorik waruhuk ulug Haren hweag-nitihin fug. TUHAN nakni, Haren de an nebe holuk deg lahen, ne an nobam Henda hahayeg nobaharuk kahen.

¹³TUHAN, Aireg halug de Haren duhuk ulug boruk kahen ale etma an hweag-nimin, an den Hat hobahet yabuk deheg, ne hundig-handig Hat hendama hahayeg howag ulug neg deheg, duruk karuhuk anggere. Ne, eke re ap homi enunggul unuk su re Hat honggwareg hangge on ulug momaloho ferihin ale anyo ebet hakiyug,” ulug hweag-etfag.

¹⁴Airoho ebag ma At TUHAN en uruk kwit de, “Kwenang o lahupmu etma henenda hambukdoho welamuhup en de An den hit henalong baloho fahat-henusug laruhuk,” ulug hweag-etfag.

¹⁵Airoho hweag-etfag ma at Musa en onggo uruk kwit de, “Hat TUHAN hebe nit ninim lauk katmihin fug halug de, nit o suma embeselug lakiek ulug mingming-nenepuk eleg.

¹⁶Haren nit let-nenepuk katmihin fug halug de, Haren ap homi su fam inim an nobam inim Enda ahayeg enobam foruk ulug ap homi en keroho enoluk deg lamuhup? Hat hebe nit nenesahalimu wereg ai fam de ap homi enunggul unuk o kwenangma suma wereg on nim nit inim aham deg welamuhuk,” ulug hweag-etfag.

¹⁷Airoho ebag ma At TUHAN en Musa fam uruk kwit de, “An den hat hebe mun noluk deg lit hebe oho An nenda nahayeg husug lahimu re, haren Heng nabehen on An den hele hole fohuk,” ulug ebag.

¹⁸Airoho ebag ma at Musa en heng-uruk kwit de, “TUHAN, nakni Hat hebe haseleg enam aik waharuk kahen on ai unug-neakin,” ulug hweag-etfag.

¹⁹ Ai ebag ma TUHAN en onggo uruk kwit de, “An Nebe nanggilukdoho, An nunuk mun eneg horeg wereg on ai il hat horohole kwe lamin. TUHAN de An neg, ne An den de ap homi momal-enepihik on fam nenda fano en debeseruk kahi ale mel, nenda hundig enepuk kahi ale mel, unug-esahuk.

²⁰Ap homi en An nea fug alereg, ne it enebe enoluk welam fug alereg ma re, An norohole hat hobam unug-heamin fug.

²¹An welahimen foma fil suma re helep unggul eke wereg angge re; hat hebe etma unduhuk lamuk.

²²An nebe Naseleg enam aik waharuk kahi on anyo lauk li em de, hat hebe An den oko helep unggul wereg on ai honggolegma etma kwelabe hobahalug de An nenggik en mapnu-hisugmen neg de An nebe mundoho baloho lamin.

²³Airoho lalug neg haren An nebe nambol fil fu-neowag ulug An nonggwareg nenggik lisoho hwelamin, famen de An norohole re haren neehen ha fug alereg,” ulug hweag-etfag.