Read Ninia Yali KELUARAN 34 Bible Online

KELUARAN 34 - Ninia Yali bible

KELUARAN 34

¹Ai en TUHAN en Musa fam uruk kwit, “Helep biren atam on etano hagdoho louk fam kahalin. Helep eta fam de atam wene balegma haren erap dirihin on etano hagdoho neg An den bale femin anggere.

²Hat de de o sono hubet-habet An nakit Dom Sinai fam lahaik waruhundeg dom funumu etma An nakit waruhun en de fik-fouk diyug.

³Ap eke misig ulug oho dom ai fam hat hinim lahakup fug, ne dom ai alukwe amu fil etma welamul ulug oho eke welamuhup fug. Ne, domba, sapi mel oho re dom indip kwe etma enggelangge nowag ulug fotog-esa fug,” ulug hweag-etfag.

⁴Airoho hweag-etfag ma re at Musa en helep biren louk fam kahale folug, At TUHAN en wene melaloho Musa hweag-etfag higitdoho re hubet-habet walug Dom Sinai fam lahaik lebag.

⁵Lahabag ma re, At TUHAN [35] hena eke anggelegma wambik watfagdeg, etano Musa inim unduhuk lit de At unuk mun eneg horeg on TUHAN anyo ebag.

⁶ Airoho ebagdeg At TUHAN ebe Musa olohotma lauk kwit ele diroho ebag, “An TUHAN aire Allah mun nenda kain deg laheg, ne nenda hundig enebeheg, duruk kahi on. An den nenda hundig-enepuk kahi on aire mun bulel-baleldoho enepuk kwit dipdoho neg debeseheg, folo-folo nolok enobam fouk fug angge welaheg duruk kahi on.

⁷An den de ap homi hum-hamdoho ambiangma endag-amuhup on[36] etma nenda hundig-enepuk kwit, it enesiag inim, kwasikdoho duruk on nim napelehapdoho feseruk karuhuk; famen de it ap siag duruk on de unggum fam en lil atuk kamuhup fug, ne An den de it enomaliki inim enomba-enambusi inim, enemulik endag-atil henahan ohwan huli endag-amuhup on nim it enaknisi siag duhup ai fam unggum enobam fesehuk,” ulug hweag-etfag.

⁸Airoho hweag-etfag ma at Musa en etano li em neg ebe alukwe belabeg kwenangma sahaun ulug mot-duruk kwit,

⁹ele diroho ebag, “Tuhan Hat demdoho henda hahayeg neauk kahen halug, nakni Hat hebe nit ninim laul en an den heng hapuk kahi. Ap homi enunggul unuk aure enunggul owag mun haroreg ai, famen de niren kwasikdoho duruhuk on nim nenesiag inim hapelehapdoho nenobahalug, nit nenebe honggwareg homaliki on apdoho og-nenebin,” ulug hweag-etfag.

¹⁰TUHAN ele Musa fam uruk kwit de, “Ketia An den sali ap homi Israel on nim watuk kahi. It enelohotma en An den along on ap homi enunggul unuk amu on o kwenangma suma wereg on inil hanim oho eke duruk kahi fug on duhuk. An nebe TUHAN en along on mun fulu bolan ale hit henobahet duhukmu it ap di enunggul unuk su enunggul unuk en inil hahup.

¹¹Wene melaleg duruk kamuhup ale ulug yoho su An den hweag-hesauk kahi on ai furoho duruk kamuk. Hit henebe laukmu re An den it ap enunggul unuk Amori on, Kanaan on, Het on, Hewi on, Feris on, Yebus on muko wilip-enebuhuk.

¹²Hiren ap homi o kwenang it wereg ma kwik lahup on etma nim, hinim sali waruk fug, hiren airoho duhup fam de henonggwareg en sabu yep dahup fam ambiang ma henowaruk.

¹³ Aireg ma re hiren airoho duk fug, ite iren mezbah wirig angge etma dukom eseheg, ousa angge ulug wirig on etma lilibug eseheg, it enengge Asyera etma inim, kembu wirig on inim muko embeseheg, diyug.

¹⁴An TUHAN Allah aire amu angge nim ilit napuk ale aire nerim deg ma re, hiren kembu ilah amu on mot-duruk kam fug.

¹⁵Hiren de it ap homi enunggul unuk o kwenang ai on nim henele sali waruk fug. It enenggembu motdoho obahet waroho og-ereheg duruk kwit, iren hit nim dukohon ulug mingming henepukmu hiren it mug-eneplug lauk kamuhup anggere.

¹⁶Hit henomaliki en homi bog on etma hwelahup halug de, iren mingming-enepuk kwit it enenggembu mot-dukohon urukmu mot-duruk kwit An fotog neahup anggere.

¹⁷ Kembu ilah anyo uang owag on hag angge fam wireheg, mot-deheg, duk fug.

¹⁸ Soni roti fituk angge eleg on esetuk kwit mot-napuk kamuhup. Bigalem Abib ai fam de hit henebe o Mesir embeselug wilibik waharuhupmu re, wene An den hit melal-henepihik ale higitdoho nukoho sabiren fam roti fituk angge eleg on nauk kamuhup.

¹⁹ Omalik ap angge wandeba on abirangge nim, wam omalik keram endetuk on nim, aire An nonggwareg nangge on.

²⁰ Famen de hit en keledai keram endag-atuk on ai alulumnoroho domba omalik misig eke fohup. Hiren keledai ai onggo balduk ale henerim halug de keledai ai anggolop somboroho besehup. Hit henomalik ap omalik wandeba on hundomog enonggo baluhup. Ap eke An nobahet foruk on walug wam fug angge en de An nakit wamuhup fug.

²¹ Nukoho Folfalik en aire yabuk wutuk kamuhup ulug wereg; nukoho sabit salim aire yabuk wituk ale seneg lit en oho, ne anggen balduk kwit en oho re yabuk duruk kamuhup fug.

²² Hiren henangge gandum anggen keram on balduk li em de Nukoho Anggen balduk salim ulug mot-duruk kamuhup. Ne, tahun o fotog ik lauk li em hiren di anggen su anggen balduk li em oho re Soni O Sabo anyo esetuk kamuhup.

²³Tahun misig on fam de henenggik henahanam it ap on neg An it ap homi Israel on enakni TUHAN Allah anyo mot-nabik waharuk kamuhup.

²⁴An den hit henelohotma en ap homi enunggul unuk domog omano muko wilip-enebuhuk deg hit henebe welamuhupmu inim heale henobahakukmu re, hiren Soni Roti fituk angge eleg on fahet nim, Soni Anggen balduk on fahet inim, Soni O Sabo fahet inim esetuk kwit mot-dul ulug laukmu re ap homi eke en enambong seroho delik kuhup fug.

²⁵ Hit en wam omalik waroho yal-nutuk kwit etare hiren di angge su angge fituk angge wereg on de og-nom fug. Soni Paskah fam wam watuk on aire hup ai salim neg mundoho nahup; ando lohon fohupmu likia sekandoho wereg laruhu re fug.

²⁶ Tahun hundig-hundig de hiren henanggwenang fam en keram on anggen balduk angge etma re henakni TUHAN Allah obam walug waharuk kamuhup. Domba omalik ino oho kambing omalik ino oho re isinga ahowe fam eseruhup fug,” ulug hweag-etfag.

²⁷TUHAN ele Musa fam uruk kwit de, “Wene hweag-hirihi ale eta nele higitdoho neg An den hat hebe hinim ne it ap homi Israel on nim sali wat-wat amuhuk angge re nele ihi on eta mundoho balin,” ulug hweag-etfag.

²⁸Nukoho empat puluh en hup inim empat puluh en fam at Musa ebe domma etma TUHAN inim wereg lit de, nukoho hup etma fam de siburu na fug, ik na fug angge wereg latfag. Wene sali wene wareg, ite Wene Allah en Melaleg Numen aire aren helep kahaleg biren etano fam bale febag.

²⁹ At Musa Dom Sinai fam en Wene Melaleg Num en anyo walug wambik waharuk mu re, at ebe TUHAN inim ele matuk katfag ma atlug de orohole mun seleg ombagbagdeg latfag. Famen de at orohole airoho ombagbagdeg ale aire at Musa apeleg deg latfag.

³⁰It Harun mel ap homi abirangge nim en Musa orohole seleg atfag ma hebagdeg akit horogma lauk ale enakol atfag.

³¹Famen, Musa en it wol-enepfag ma re, Harun nim it enowesi melal-enepuk on omano nim at akit horogma watfag ma, at Musa en ele mag-esebag.

³²It inim ele mundoho ebagdeg de it ap homi Israel on abirangge anyo at maseroho kabog-dik lebag. Kabog dik lebagdeg it masereg wereg kweleg de at Musa en Wene melaleg TUHAN en Dom Sinai emberimmu en og-etfag ma walug wambik watfag on anyo it mundoho fam hweag-esebag.

³³It nim ele mundoho maho folug de Musa orohole sum kain fam hulilip debag.

³⁴Musa hundig-hundig TUHAN Obam Sabo salegma TUHAN nim ele marikoho kuruk kwit de kain ai fungguli folug kuruk katlug, wilibik watlug de nikangge hulilip duruk katfag. Aren wene At TUHAN diroho diyug suroho diyug ulug hweag-etfag ale anyo mundoho it ap homi Israel on fam hweag-esebagdeg de,

³⁵at Musa orohole ombagbag durukmu iren inil hebag. Airoho deg ale en de nikangge orohole hulilip debagdeg nin fobik TUHAN nim ele marikoho neg nonggolfag.