Read Ninia Yali KELUARAN 35 Bible Online

KELUARAN 35 - Ninia Yali bible

KELUARAN 35

¹Musa en ap homi Israel on abirangge kabog-debeselug hweag-esauk kwit, “TUHAN en wene hit fahet melale feheik on de su:

² Nukoho folfalik en ai re yabuk wutuk on fahet wereg, famen nukoho sabit angge aire kel watuk on fahet wereg ma, nukoho humon aire TUHAN fahet wereg laruhu. Ap homi eke en nukoho Sabat salim yabuk duruk halug de ebe binggi waruhup.

³Nukoho ai salim de henobam olma indok oho nonggwaluk fug, eheik,” ulug hweag-esebag.

⁴Musa en ap homi Israel on abirangge hweag-esauk kwit, “TUHAN en wene melaleg eheik on de su:

⁵TUHAN fahet foruk angge walug feik waharuk kamek. Feik waharuk kwit de, ap eke endama leberurukmu emas, perak, perunggu;

⁶kain lenan sako on kain wol il bohol on, ungu on, mebon, kain kambing oruk fam yihig on;

⁷Domba yohombuk on ahap bolu baleg on, ahap sako on, e akasia,

⁸ahalue lampu fahet on mel, amben angge ahalue wene kabog-duruk kwit duruk on mel, amben angge dupa amben fano on fahet mel;

⁹permata delima mel, permata mel, etma sum ap Imam Agung wan-duruk baju efod mel amigmu saniog boruruk on mel fahet hilinggukwag ulug walug feik wamuhup, eheik,” ulug hweag-esebag.

¹⁰Ekenim uruk kwit, “It ap di angge su angge hilingguruk ale enggatdoho wituk on henesahalimen wamuhup deg TUHAN en melal-nenepsi aleroho wiruhup angge re su:

¹¹O sabo mel, onggwa saleg on enggik sen angge owag lahabeg on mel, e nunggulig senggelduk on mel, doalduk on mel,

¹²Peti Sali wene wareg anyo beahan nim, aplit lareg angge mel, kain sebeleg angge mel,

¹³meja mel, beahan abirangge mel, roti werako foruk angge mel,

¹⁴lampu seleg duruk kamag ulug eyog mel, ai fahet on abirangge mel, lampu ebe mel, ahalue kwelapuk on mel,

¹⁵amben fano angge yaldukmu mezbah ebe mel, e beahan walug lauk on mel, wene kabog-duruk kwit duruk on fahet ahalue mel, dupa amben mun ebe on mel, o Sabo anyo fam sum huliroho boreg on fahet ulug mel,

¹⁶Mezbah di angge su angge waroho indok yalduk on mel, di angge su angge ai fahet duruk no perunggu fam hilinggig on mel, e beahan abit angge mundoho etma mel, ik yenggele folug horurukmu doal angge mel,

¹⁷kain o sokole lilimol balegma fahet on mel, e unduhuk foruk on doalduk on mel sokole humon anyo sili lilimol fam anyo kwik laukmu sum boreg on mel,

¹⁸e bepug delduk on mel, sabu-sabu O Sabo ai mel, sili lilimol fam anyo mel fam het duruk on fahet mel;

¹⁹It imam o Ambe Enegma anyo yabuk dukoho kuruk kwit wan-duruk on fahet enesum mel, ne sum eke yugdoho at Imam Harun mel, at omaliki mel fahet mel, hilingguhup,” ulug hweag-esebag.

²⁰Ai debelug de it ap homi Israel on abirangge kabog-debag on anyo buhulfagdeg,

²¹ap sa en eke endama leberuruk halug, TUHAN Obam Sabo ai fahet wiruhup on ulug di angge su angge walug feik watfag. Ai foma iren wene kabog-duruk kwit duruk angge fahet ulug nim it imam enesum wituk on fahet ulug nim walug kabog-dik watfag.

²²Ap en oho homi en oho enendan bolug de enalili angge boruruk on fahet peniti mel, enesanggo hukom mel, helep sehene mel, siong mel, enalili angge amu on humdoho emas on fam hilinggig angge TUHAN obahet foruk on ulug mel, kabog-debag.

²³Ne, it ap homi foma en sum lenan il sako on wereg halug mel, kain wol on mel, il bohol on mel, ungu on mel, mebon mel, sum kambing oruk fam yihig on mel, domba yohombuk on ahap fam wirig on il mebon fam aroreg angge mel, ite ahap sako on mel, mundoho etma feik watfag.

²⁴Ne, it ap homi eke en de perak ane perunggu ane wereg on TUHAN obahet walug watfag. Ai higitdoho re it ap homi foma en enahan akasia wereg halug de yabuk ai obahet duruk on ulug walug watfag.

²⁵It homi sum seleben duruk ale enggat deg on en de hekel lenan il sako on mel, wol il bohol on mel, ungu mel, mebon mel, iren seleben debag.

²⁶Foma re iren wam kambing oruk fam hekel yihibag.

²⁷It enowesi melal-enepuk on en de no permata delima mel, permata amu on sum efod nim enemigmu saniog boruruk on anyo fahet nim menahaukwag ulug walug watfag.

²⁸Iren oho re amben angge di angge su angge mel, ahalue lampu ulog duruk on fahet mel, ahalue amben mun ebe on mel walug watfag.

²⁹Ap homi Israel on enenda fano on abirangge en di angge su angge TUHAN en wene melaleg Musa fene en hweag-esebag ale anyo higitdoho TUHAN obahet kabog-dik waharuk katfag.

³⁰Ai debelug Musa e ap homi Israel on fam uruk kwit de, “TUHAN en de ap Bezaleel hun Uri amloho Hur omba unggul unuk Yehuda on anyo eneko fesireg de,

³¹At along[37] anyo obam louk debesesi. At Allah en de wenggeloho duruk on og-ereheg, di ale su ale enggik buhundoho wituk on og-ereheg, di on su on hwal halug buhun-dukwag ulug og-ereheg,

³²di ale su ale enggatdoho wenggele folug dukwag ulug on awene lenggalduk on og-ereheg, ne di on su on emas, perak, perunggu on fam en hilinggi folug wituk on og-ereheg,

³³helep permata maho folug unggut hwal-hwal wirukwag ulug debeheg, e hwesesengge og-heheg mel, di on su on amu on mundoho hwesesengge og-heheg wirukwag ulug mel, og-ereheg disi.

³⁴It hun Bezaleel nim, Aholiab hun Ahisamakh amloho unggul unuk Dan on anyo nim fam de TUHAN en eneluk enggaron o yabuk ai duruk on fahet ap amu on melal-enebukwag ulug enggaron og-esasi.

³⁵It enobam de ap helep e mel dilong fololduk ale enoluk on en duruk ale on mel, it kain il sako on mel, wol il bohol on mel, ungu on mel, mebon mel, kain amu on mel fam sum wirukwag ulug wene melaleheg, wireheg, duruk on og-eseheg, disi. It enebe re di ale su ale dukwag ulug wenggelduk enap, di yabuk su yabuk duk alereg on neg wereg.