Read Ninia Yali KELUARAN 36 Bible Online

KELUARAN 36 - Ninia Yali bible

KELUARAN 36

¹Hun Bezaleel mel, Aholiab mel, it foma yabuk o wituk ale enoluk on TUHAN en enggat on og-eseheg, di on su on hilingguruk ale fahet enoluge feseheg, disi on etmano re, O TUHAN Obam Sabo anyo fahet wituk ale mun enoluk deg. Iren de di on su on At TUHAN en wene melaloho hweag-esasi aleroho neg wiruhup ulug hweag-esasi,” ulug hweag-esebag

²At Musa en de hun Bezaleel nim Aholiab mel, ap foma TUHAN en At obam wurukwag ulug enggarap enepfag on omano mel it enenda fano en let-enepuk katfag on etmano mel wol-enepfagdeg indip diek ulug mingming-enepfag.

³Airoho hweag-esebagdeg de at Musa en de ap Israel on en O Sabo TUHAN fahet ai wurukwag ulug kabog-dik watfag angge omano og-esebag. Famen de ap homi Israel on en di angge su angge etmano hubet hundig-hundig Musa akit kabog-dik waharuk katfag.

⁴Kabogdik waharukmu re it yabuk duruk enap omano en Musa fam hweag-irik lauk kwit de,

⁵“Di angge su angge ap homi en walug kabog-dik waharuk angge etma re, nit O TUHAN Obam Sabo wirukwag ulug on de higitdoho wereg famen iren alongdoho kabog-dik waharuk,” ulug hweag-etfag.

⁶Hweag-etfag ma Musa en o sabo wirig kwe etmano domog wene unduhuk foruk kwit de, O TUHAN Obam Sabo wituk on fahet de mundoho kabog-dik waharuhup; ulug hweag-esebag ma re it ap homi omano en walug waharuk ale bale febag.

⁷Munangge-manangge o wurukwag ulug kabog-dik watfag angge etma re mun dindikdoho febag ma yabuk ai mundoho debag.

⁸Airoho debagdeg it ap yabuk duruk ale enggat on etmano enesahalimu en ap eke mun oluk humon anyo en de TUHAN Obam Sabo ai witfag. O sabo aire kain lenan sako on numen kongdeg angge mel, wol il bohol on mel, ungu on mel, mebon mel, seberoho yihig angge fam wiri febagdeg de unuk kerub [38] ilitdeg inim sapliroho yihibag.

⁹Kongdeg angge etma re ambiang yatdeg ale higitdoho neg 12 meter ne, anggweroho re dua meter debebag.

¹⁰Kong foaben fam de misigmu ahundip heg sum anggwe on misig debebag ne foma foaben etano oho airoho neg debebag.

¹¹Sum anggwe on biren angge eta atog kwe re kain il bohol on fam sukni foruk angge ulug ilildil lebag.

¹²Sum ebe domog de lilduk angge obale aire 50 en heheg debebag ma re misig wutdeg on hag deg latfag.

¹³Aroho debebagdeg de kwandi ahundip sum eta birenet ahundip deberuk angge ulug emas on 50 en hilinggebag.

¹⁴Ai mundoho debelug de onggwa re kambing oruk fam kain nim 11 en yihibag

¹⁵Kong abirangge re higitdoho neg kong deg ma, yatdoho 13 meter, ne anggweroho re dua meter debebag.

¹⁶Kong baleg on eta foaben de sum anggwe on misig ahundip debeheg, ne nin folfalik en etano oho airoho ahundip debeheg debag.

¹⁷Ne, ahundip angge 50 en foma re sum esanggo foma fil kain keram on anyo fam ilili feheg, ne 50 foma re kain bireneg on fam ilili feheg, debag.

¹⁸Airoho debebagdeg de sum anggwe on biren etano misigapdoho O Sabo anyo onggwa sal-amag ulug de, no perunggu on ahundip angge 50 en hilinggebag.

¹⁹Ai mundoho debelug de O sabo anyo saleg angge fahet biren angge eke re domba yohombuk on ahap mep angge aroreg on fam, ne ekere ahap sako on fam seleben debag.

²⁰Ai mundoho debelug de iren o Sabo anyo lang owag hagdoho bekit on neg e akasia fam hilinggebag.

²¹E lang owag lahabeg on eta misig de 4 meter heheg ne, nunggulig on de 66 sentimeter heheg debebag.

²²E lahabeg on etma domog de e ahundip angge biren fam wutdoho debebag ma re e lahabeg on etma eke fam en de eke fam seneg latfag.

²³O Sabo ai selatan fil fahet de owag 20 en debebag,

²⁴ne doalangge re no perak on fam 40 en debebag, ne o owag etma apmane re biren heheg febag.

²⁵O Sabo anyo utara fil fahet de o owag 20 en debebag.

²⁶Ne doalangge re no perak on fam 40 en debebag, ne o owag etma domog apmane re biren heheg febag.

²⁷O sabo foma il barat fil etma re o owag folfalik en hilinggebag,

²⁸ne unggutmu fahet de e biren heheg lahapfag.

²⁹Dimi ahan lahabeg on etma indip men hunduko onggombimu etlema lahabeg latfag. Ne, e owag biren angge unggut hilinggig on eta oho re airoho neg debebag.

³⁰E owag eta abirangge re folfalik en ne apmane eareg on de no perak fam hilinggig angge 16 en deg ma re apma ne domog biren heheg febag.

³¹Airoho debebagdeg de iren e akasia on fam e nunggulig yingguruk on de 15 en hilinggebag, ne foaben de o Sabo ai ombandu misig fil fahet.

³²Ne, foaben de ombandu amu fil fahet, ne nin foaben eke re O Sabo anyo ambol barat fil fahet.

³³E owag bul nunggulig sobang duruk on aire e owag lahabeg on anyo apma hagdoho o Sabo anyo ambiang eke fam en de eke fam debebag.

³⁴O Sabo ai fahet e owag etma nim ne e nunggulig sobang duruk on ulug etma nim de emas fam sapli debebagdeg de e ebe hambukdoho seneg lamag ulug de sehene emas on yiko kwelapfag.

³⁵Iren de sok fahet de kain lenan il sako on mel wol il bohol on fam nim ungu on fam inim, mebon fam inim sapliroho yihig mu re emberimmu no kerub [39] ilitdoho yihibag.

³⁶Kain yihig angge ai suknoho belapuk on fahet de, e akasia on emas fam sapliroho wirig angge ohwan ne, apmane re perak on ohwan fam doaloho wirig angge hilinggebag.

³⁷Airoho debebagdeg de O Sabo ai sok latni fahet de kain lenan il sako on mel hekel wol bohol on nim ungu on nim ne mebon nim fam yihig angge ebene alili angge hekel soaleg dihinig on yihinig on fam boroho yihibag.

³⁸Sok latni sum kain ai fahet de e unduhuk on foaben hambo angge inim hundi foruk angge hilinggebag. E doung foaben eta ambiang kwe nim, hundi foruk kwit nim de emas fam sapliroho hilinggi febag, ne apmane doalangge foaben eta neg de perunggu on fam hilinggebag.