Read Ninia Yali KELUARAN 37 Bible Online

KELUARAN 37 - Ninia Yali bible

KELUARAN 37

¹At Bezaleel en peti Sali wene wareg anyo e akasia fam witfag. Wituk kwit de yatdoho re 110 sentimeter, anggweroho nim lahabeg on nim de 66 sentimeter fam witfag.

²Ilonggo fil et dag fil et de emas buhun on fam neg dopno debebagdeg de dag kwe indip sebeloho re emas on fam neg maserebebag.

³Ai en e bearulug lauk on fahet de sehene emas on ohwan yiko peti ombandu ohwan etano fam de sehene biren de ombandu misig fam heheg kwelabeg latfag.

⁴E beahan de e akasia on en hilinggebagdeg de emas nim sapliroho buhun-debag

⁵Ai en de e beahan etano re peti anyo ombandu fil en kwelabe febag.

⁶Ai en aplit sebelduk on de emas mun ebe on fam yatdoho re 110 sentimeter on, anggweroho re 66 sentimeter on witfag.

⁷Iren de kerub [40] biren emas sahaleg on fam ilit debag,

⁸deg de aplit anyo ambiang foma eke foma eke febag. Kerub biren etare aplit sebeleg on anyo nim misig hundi febag.

⁹Ne, enebe enalukwe misigmuroho enahwerabul langdoho re e Peti Sali wene wareg anyo sebeleg lit enorohole peti ai aplit fam kwelaboho latfag.

¹⁰Bezaleel en de meja e akasia on fam wituk kwit, yatdoho re 88 sentimeter anggwerohore 44 sentimeter, ne lahabeg de 66 sentimeter witfag.

¹¹Meja ai ebe emas fano on nim sapliroho maseroho witfagdeg

¹²Airoho witfagdeg de Meja ai elan kwe anggweroho re, 7,5 sentimeter en hag witfag. Airoho wiri febagdeg deg ambiang kwe maseroho re emas on fam indip sebelfag

¹³E beahan fahet de sehene ohwan yiko re meja eyog ohwan etano unggut fil etma kwelapfag.

¹⁴Ne, e beahan ai seneg on fahet de meja anyo ombandu fil etma sehene hilinggi febag.

¹⁵E beahan aire e akasia fam hilinggoho re emas inim sapli debebag.

¹⁶Aren de nin piring mel, waruk cangkir mel ikwag mel anggur ahaik hwenanggoho foruk on mangkuk mel hilinggebag. Meja ai fam duruk angge ulug witfag on etma re emas mun ebe on fam witfag.

¹⁷Bezaleel en lampu ebe wutuk kwit, emas fano on fam witfag. Eyog nim enggik nim de emas sahaleg on fam witfag, Owil angge hwesesengge hagdoho hilinggig latfag on etma nim, anggen mumung deg on nim, etma re enenggik nim misigmu sebereg latfag.

¹⁸Enggik ai fam de folfalik en handohwaldoho deg ma re, ombandu foma-foma etma fam handohwal henahan heheg deg latfag.

¹⁹Handohwal etma fam domog de alili angge e badam on owil ohwan angge mumung deg latfag on mel abip mel ilit deg latfag.

²⁰Lampu owag hilinggig on etma no badam owil mumung deg on nim abip inim ohwan ilit deg latfag.

²¹Enggik etma hundomog apma re owil misig mumung deg latfag.

²²Lampu ebe ai abirangge mel, owag enggik hilinggig latfag on etma mel, owil wirilig latfag on etma mel, de emas ebe on misig kongdeg angge fam hilinggig latfag.

²³Lampu enggik ai fam de lampu ulog-duruk mu sabiren inim pelita ai andinbun hwalduk angge nim ulog angge nim de emas mun ebe on fam buhun-debag.

²⁴Lampu ebe anyo nim ai fam duruk angge abirangge etma wituk on fahet de emas mun ebe on wenako 35 kilogram fam witfag.

²⁵Bezaleel en de e akasia on fam obale dupa yaldukmu mezbah eke buhundoho witfag. Wituk kwit mezbah ebere unggut hilinggoho; yatdoho re 45 sentimeter ne lahabeg emberim de 90 sentimeter fam witfag. Unggut ohwan hilinggig on etano emberimmu re andimuk mezbah ebe nim seberoho hundig lamag ulug hilinggi febag.

²⁶Emberim fil ombandu ohwan ai ilitdoho nim ne andimuk etma nim de emas mun ebe on fam sapliroho hilinggi febagdeg de ebe maseroho re emas on fam indip sebeloho deg latfag.

²⁷Mezbah ebe ai bearulug laukmu e beahan ai ahoreg lamag ulug de emas on indip sebeloho hilinggig on ai apma fil sehene biren angge hilinggi febag.

²⁸Beahan aire e akasia on fam emas nim sapliroho wiri febag.

²⁹ Bezaleel en de wene kabog-duruk on fahet ahalue nim dupa amben ebe on ahalue amben angge hag nim witfag.