Read Ninia Yali KELUARAN 38 Bible Online

KELUARAN 38 - Ninia Yali bible

KELUARAN 38

¹Hun Bezaleel en de e akasia on fam de waroho indok yalduk mu eke witfag. Ai wituk kwit de yatdoho nim anggweroho nim de 2,2 meter ne lahabeg de lahabeg emberim de 1,3 meter en witfag.

²Unggut ohwan emberim fil etma re andimuk mezbah ebe nim hunduko wiri febagdeg de abirangge no perunggu fam sapli debebag.

³Aire no kuali mel sekop mel, mangkuk mel, ai en garpu mel, indok nonggwaldukmu obale mel, hilinggebag. Mundoho duruk angge ulug hilinggebag angge etma re no perunggu on fam sapliroho neg hilinggebag.

⁴Aren de kawat sehene hagdoho perunggu on fam yihibagdeg de mezbah apma fil bombale febag on aire mezbah ebe leho on anyo bul feneroho debebag.

⁵Ai en de unggutmu re e beahan fahet sehene ohwan angge yihig febag.

⁶E beahan aire e akasia on fam perunggu nim sapliroho hilinggi febag.

⁷Ai debelug de e beahan etano mezbah anyo ombandu foma eke foma eke kwelabe febag. Mezbah aire e kahaleg on fam witfag ne ilonggo fil de ahauk ele deg latfag.

⁸ Bezaleel en de perunggu on fam ik yenggele forukmu oholuk de perunggu on fam eyaroho hilinggebag. Perunggu etma re il apumag it homi O TUHAN Obam Saboma en sokolma yabuk duruk on en fam hilinggebag.

⁹Bezaleel en de O TUHAN Obam Sabo anyo sum kain lenan sako on anggweroho yihig angge fam de huliroho kwelapfag. Il apma selatan fil yatdoho re 44 meter en hilinggi febagdeg de,

¹⁰bepug e perunggu on dua puluh en belabeg angge, ebe domog de doal angge re perunggu on ne enggik sen angge re perak on fam het deg latfag.

¹¹Foma utara fil oho ai on higitdoho neg debebag.

¹²Foma barat fil ohore kain wiyog sum on yatdo hore 22 meter e unduhuk foruk on de numen, ne doalduk on numen kain ahundip duruk on de perak fam buhun-debag.

¹³Foma timur fil sok hilinggigmu aire sum anggwereg alere 22 meter fam hilinggebag.

¹⁴Sok ai en bekit fil mel hware fil mel de kain anggwe on 6,6 meter en ne e lahabeg on mel doalduk on mel de henahan fam febag.

¹⁶Sum anggwe on ambe lilimol fam abirangge etma maseroho boril lebag on ai kain lenan sako on fam boril lebag.

¹⁷E bepug lahabeg on indipmu etma perunggu on fam buhun-debag. Kwandi mel maseroho etma atelma mel de perak on fam wareg ma misig hundig latfag.

¹⁸Sok o sokole humon kwik laukmu huliroho lareg on ai sum de kain lenan wol on mel, il bohol on mel, ungu on mel, mebon mel fam yihig mu re alili angge sum enenggik en yihig on dopnoroho boreg latfag. Boreg latfag on etma yatdoho re 9 meter ne lahabeg on 2 meter en kain o ambe lilimol fam on anyo hagdoho deg latfag.

¹⁹Kain sok lareg on aire e ohwan lahabeg on etman ahoreg ma, indip mu doaleg on de perunggu ohwan en doaleg latfag. Enenggik sen angge mel, atelma sebeleg angge mel, hambo angge mel etma abirangge re perak on fam neg buhundeg latfag.

²⁰Famen de e bepug deleg angge etma re O Sabo fahet mel, elehet fahet mel etma re perunggu fam neg wirig latfag.

²¹TUHAN Obam Saboma helep biren angge fam Allah Wene Melaleg num en anyo baleg angge wereg ma anyo duruk katfag on unuk baleg de su. Unuk baleg aire at Musa en wene melaleg fam it ap Lewi on, hun Imam Harun amloho Itamar anyo en melal-enepuk kweleg duruk katfag on etmano en bale febag.

²²At Bezaleel, hun Uri amloho, Hur omba unggul unuk Yehuda on anyo en de TUHAN en di on su on melal-enepfag ale anyo mundoho debag.

²³At let duruk katfag on de Aholiab hun Ahisamakh amloho unggul unuk Dan ahun aire hwesesengge wauk ale mel, ne kain lenan il sako on mel, wol il bohol on mel, ungu on mel, mebon mel enggik en yihikeg, diroho yihul ulug ilit debeheg, duruk on welatfag.

²⁴Emas o TUHAN Obam ousa Niginama ai wituk on fahet ulug TUHAN og-etfag on eta wenako abirangge re 1.000 kilogram en, ebe re ilit angge TUHAN Obam Saboma etman ilit duruk on fam anggin ilit debag.

²⁵ No perak it ap homi Israel on inunuk baloho wenag enepuk kwit kabog-debag on de 3.430 kilogram en, ebe ilit angge re TUHAN Obam Saboma etman ilit duruk on fam anggin ilit debag.

²⁶ Mundoho kabog-debag on ai abirangge re it ap homi inunuk lisu balukwag ulug kabog-debag on ai inim higitdoho kabog-debag. It ap homi enebe domog de diroho kabog-duhup ulug huli-huli febag aleroho neg kabog-debagdeg de anggin ilit duruk on fam anggin ilit debag. Ap homi inunuk balfag on ai it enebe umur 20 tahun emberim fil deg on ap on neg de enebe 603.550 en balfag.

²⁷Perak etmano fam de 3.400 kilogram en fam de O TUHAN Obam Sabo anyo e lang owag lahabeg on indipmu hembit angge aire 100 en hilinggeheg, sok ebe hilinggeheg, debag. Indipmu hembit angge febag on etma hundomog angginde 34 kilogram en debebag.

²⁸Perak etmano dindik atfag on abirangge wenako re 30 kilogram en atfag ma, Bezaleel en de ahundip angge mel O Sabo anyo owag lahabeg on omano fam enenggik sen angge mel, e lahabeg on etmano atelma sebeleg angge mel, witfag.

²⁹Perunggu TUHAN og-etfag on ai abirangge wenako re 2.425 kilogram en.

³⁰Perunggu eta fam de TUHAN Obam Saboma sok indip anyo wireheg, mezbah perunggu on fam sehene yiko kwelabeheg, mezbah ai fam duruk angge fahet hilinggeheg,

³¹sum kain anggwe on anyo o ambe lilimol fam inim sokole humon kwik laukmu inim, o Sabo ai fam e bepug delduk on fahet nim, o lilimol maseroho inim fahet buhun-debag.