Read Ninia Yali KELUARAN 39 Bible Online

KELUARAN 39 - Ninia Yali bible

KELUARAN 39

¹It Bezaleel inim Aholiab inim en de sum wene kabog-duruk kwit wan-duruk on eke hekel il wol il bohol on nim ungu on nim mebon nim fam yihibag, on et,a re imam enebe Ambe Enegma anyo kulug yabuk duruk kwit wan-duruk on fahet yihibag. Sum Imam en wan-duruk on at Harun fahet de TUHAN en wene melaloho Musa hweag-etfag higitdoho witfag.

²No efod de kain lenan sako on mel, wol il bohol on mel, ungu on mel, mebon mel, hekel emas on fam mel, seleben debag.

³Iren de emas on al sahalduk men neg mun kuk debebagdeg de kong-kong de hekel mun maben on debebagdeg de kain lenan sako on nim, wol il bohol on nim ungu on nim mebon nim fam seberoho yihibag.

⁴Ai mundoho debelug de no efod anyo unum mu lilduk angge fahet biren angge ombandu mu seleben debebag.

⁵Ombahaluk oho re hekel il fanoroho soaleg on fam ebe indip misig angge fam soaleg on fam witfagdeg de no efod anyo fam seleben debebag ma re, TUHAN en wene melaloho Musa hweag-etfag ale higitdoho misig on fam hundig latfag.

⁶Iren de helep delima on matfagdeg de emas unggut hilinggoho deg angge fam henahabag. Iren de enenggik we mun buhun-bahandoho helep etmano fene re at hun Yakub omaliki nesanggo en eta inunuk hwesesengge webag.

⁷Airoho debelug de TUHAN wene melaloho Musa hweag-etfag ale higitdoho re it ap homi enunggul unuk nesanggo en ai enenda ebereg welamag ulug de helep etmano re hekel unum mu efod het duruk on anyo fam dopno debebag.

⁸Bezaleel mel, Aholiab mel, en de amig mu saleg angge fahet de sum efod witfag on anyo fam ne hekel sum enenggik en yihig on oho re indip misig angge on fam witfag.

⁹Ebe obabut de unggut ohwan hilinggig angge bul biren siroho, anggweroho inim yatdoho nim en amu-amu re 22 sentimeter en heheg witfag.

¹⁰Amigmu saleg angge ai fam de helep permata on asiog ohwan debebag. Siog keram on fam de helep delima, topas, baiduri sepah inim dopnorebebag.

¹¹Asiog bireneg on fam de Zamrud, helep nilam intan mel dopnorebebag.

¹²Ne, asiog henahaneg on fam de helep lazuardi, akik mel, helep kecubung mel.

¹³Asiog ohwaneg on fam de helep pirus, yakut, ratna cempaka mel. Helep nesanggo en etare no emas fam het debebag.

¹⁴Helep permata eta domog fam de hun Yakub omaliki nesanggo en etano misig on inunuk eke it ap homi enunggul unuk Israel on enenda ebet angge ulug bale febag.

¹⁵Ai en de bosiemanggen emas mun ebe on fam bombaleg angge biren elang debag.

¹⁶Ai en de sehene emas on amig saleg etano ambiangma lilig angge fahet emberim fil biren hilinggebag.

¹⁷Ai en bosiemanggen emas on biren angge etano sehene elelekwe kwelabe febag,

¹⁸ne ambiang foma fil de amig saleg unggut hilinggig angge etano ambiang foma fil kwelabe febag ma re no efod anyo sabu lilig on nim hundig latfag.

¹⁹Ai debelug de sehene bohap emas on biren eke yiko re amig saleg anyo fam bug debebag, ne atog apma fil erahamu en ilonggo fil etma re no efod anyo bal-hauk katfag.

²⁰Ai mundoho debelug de sehene emas on biren angge yiko re efod anyo ahale biren angge alukwe fil en, apma fil hagdoho yihig on ahundip degman bahaluk hekel mun sako on anyo fam yihig angge emberim fil etma bug debebag.

²¹TUHAN en wene melaloho Musa hweag-etfag ale omano muko, sehene amig saleg aire hekel il bohol on fam sehene efod fam ai inim hundig latfag, ai fam de amig saleg aire bahaluk anyo emberimmu wereg ma re loloho la fug alereg latfag.

²²Sum jubah efod emberimmu wan-duruk katfag on aire abirangge hekel wol il bohol on fam neg seleben deg latfag.

²³Enanggolop ele re hebelelak duk no ulug de pita buhun on fam omamneroho seleben debag.

²⁴Ebene apma fil etma maseroho re, alili angge e delima anggen kain lenan sako on mel wol il bohol on mel, ungu mel, mebon mel fam seleben debebagdeg de sahali kwe re emas on aplohok leng-leng angge At TUHAN en wene melaloho Musa hweag-etfag higitdoho hilinggebag.

²⁷Iren de sum kemeja Harun nim omaliki nim enobahet seleben debag,

²⁸enunggul asum bombaloho wan-duruk on mel enunggul asum hobog duruk on mel, il maben on mel, sum celana baleg on hekel lenan fam yihig on mel,

²⁹bahaluk kain lenan sako on mel, wol il bohol on mel, ungu mel, mebon mel, fam ilit debebagdeg de At TUHAN wene melaloho Musa hweag-etfag ale higitdoho re alili angge hekel enenggik en yihig on fam hilinggebag.

³⁰Ai en it enebe TUHAN en eneko fesesi ulug eneg deg welamag ulug de alili angge emas on hilinggebag. Enalili angge ai fam de ele diroho baleg latfag, “TUHAN obahet eneko fahat dasi,” ulug baleg latfag.

³¹Enalili angge aire At TUHAN en wene melaloho Musa hweag-etfag aleroho enunggul asum anyo alukwe fil het debebag.

³²Airoho debagdeg de yabuk At TUHAN Obam Sabo anyo mundoho witfag. Ne, it ap homi Israel on de at TUHAN en wene diroho diyug suroho diyug ulug Musa fene en wene melaloho hweag-esebag on anyo higitdoho neg debag.

³³Iren de O Sabo anyo nim o ai fam duruk angge inim, enggik sen angge nim, e nunggulig on nim, e lahabeg on nim, doal angge nim,

³⁴dum sebeleg angge no kambing yohombuk on ahap mebon areroho hilinggebag on anyo mel, ahap sako on fam yihig angge sebelduk angge ulug anyo mel, kain sebel angge anyo mel, walug Musa akit watfag.

³⁵E Peti sali wene wareg fam helep biren yohwareg angge anyo mel, e beahan mel, emberim sebeleg angge mel,

³⁶e meja mel, di on su on emberimmu etman duruk angge mundoho mel, ne roti weraho angge mel,

³⁷lampu eyog emas buhun on fam hilinggig angge anyo mel, lampu ebe abirangge mel, ai duruk angge mel, minyak lampu ai fahet on mel,

³⁸mezbah emas on fam buhundeg angge anyo mel, ap unduhuk feseruk kwit ahalue hilili feseruk on anyo mel, amben fano angge anyo mel, sok O Saboma huliroho ulug boreg angge anyo mel,

³⁹mezbah perunggu on fam hilinggig angge, ne no perunggu on fam mendaho angge mel, e beahan mel, di on su on ai fahet duruk on mel, ik enenggik eneyog omatuk mu obale ik yenggelduk angge doal angge mel,

⁴⁰kain anggwe on ambe lilimol anyo fahet on mel, e lahabeg on mel doal angge on mel, sum anggwe on sok humon ambe lilimol kwik waharukmu anyo fahet on mel, di sabu su sabu mel, O Sabo fahet bepug delduk on mel, di on su on O Sabo ai fam duruk on fahet mel,

⁴¹sum imam on it TUHAN Obam Saboma Ambe Enegma anyo yabuk duruk kwit wan-duruk on mel, ne sum at Harun nim at omaliki inim enobahet eneko wirig on mel, walug Musa wereg ma watfag.

⁴²TUHAN en wene melaloho Musa hweag-etfag ale higitdoho it ap homi Israel on en yabuk etma abirangge debag.

⁴³Musa en de iren yabuk debag on anyo il hil lebagman de, TUHAN en diyug ulug melale fesebag ale etano higitdoho neg debag. Airoho debagdeg at Musa en it ap homi anyo enobam fanoap debesebag.