Read Ninia Yali KELUARAN 4 Bible Online

KELUARAN 4 - Ninia Yali bible

KELUARAN 4

¹Airoho hweag-etfag ma at Musa en onggo TUHAN fam uruk kwit, “Ai famen de it ap homi Israel on en an nele hweag-esauk on ai furebouk fug angge wereg lit demdoho uruk bouk eleg angge duruk halug nangginoho dihi ha alereg e? Ne, iren lahe uruk kwit, TUHAN ebe hat hakit enam atsi fug, ulug uruk halug de an den keroho dihi ha alereg?” ulug hweag-etfag.

²Airoho hweag-etfag ma At TUHAN en Musa hweag-utuk kwit de, “Hat henggikmu aire nunggwangge?” ulug ebag ma at Musa en onggo uruk kwit de, “Domuk,” ulug hweag-etfag.

³Airoho ebag ma TUHAN en hweag-utuk kwit de, “Ai kwenangma fotog-esakin.” Ebag ma fotog-esauk men de domuk anyo ininoho kisu atfag ma Musa akolen yatdoho hekip aik lebag.

⁴Airoho lebag ma At TUHAN en Musa fam uruk kwit, “Kisu ai horogma watlug ahaema senerin,” ulug hweag-etfag ma at Musa ebe kisu anyo horogma aik watfagdeg sen-hauk men de folo-folo etano neg Musa enggikmu etano en ininoho domuk atfag.

⁵At TUHAN en uruk kwit de, “Haren airoho duhunmu re it ap homi Israel on en An TUHAN, nebe it enambu-enombasi enakni Allah anyo nobam enenda dip-nobahakeg, ne it Abraham, Ishak, Yakub mel enakni Allah anyo hat holohotma mundoho enam atsi ulug beheg, duhup,” ulug hweag-etfag.

⁶Airoho ebagdeg TUHAN en ekenim Musa hweag-utuk kwit, “Henggik hasum elekwe kwelabe fein,” ebag ma enggik sum elekwe kwelabe folug lit-hauk men enggik mun kut atfagdeg yebil ahap fam namelmel on atfag.

⁷Airoho atfag ma TUHAN en uruk kwit de, “Nikangge henggik hasum elma kwelabe fein,” ebag ma kwelabe febagdeg lit-hauk men Musa enggik anyo mundoho fano angge lisi febag.

⁸TUHAN en uruk kwit de, “Haren along on keram ai duhun mu iren hahupdeg en lahe hat hobam demdoho boruk eleg halug de along on su duhun fam neg de it enenda demdoho bouk ale duhup.

⁹Haren along on biren eta duhunmu inil hahupdeg en lahe hat fam enenda dip hobahauk eleg angge welaheg, ne hat hele mel fu-hobahauk eleg angge welaheg, duruk halug de haren Ik Nil anyo dorangge lohon walug kwenangma belabe feiyug. Airoho belabe fohunmu re ik anyo ininoho mep aruhu lit deg,” ulug hweag-etfag.

¹⁰Airoho hweag-etfag man Musa en TUHAN hweag-utuk kwit de, “Tuhan nakni an de o endam en angge ketia huli TUHAN en hele an nobam hweag-nitihin li en angge re an nele furoho matuk kahi fug. An de nambilik anggen anggin deg ma re nele we andomog deg lit nele mem-mem anggeroho uruk kahi,” ulug hweag-etfag.

¹¹Airoho ebag ma TUHAN en at hweag-utuk kwit, “San ap homi enembilik og-esauk? San ap ai ele hobu lare feheg, esanggo dahom debeheg duruk? Ap san at ai il hupni feheg fenggene feheg duruk? An TUHAN nebe en de fug a?

¹²Ketiare folo-folo lakin, An den neg hat hele ukwag ulug let-habeheg, ne wene ebe, Su on in, ulug hweag-hereheg duhuk anggere,” ulug hweag-etfag.

¹³Airoho hweag-etfag man at Musa en onggo hweag-utuk kwit de, “Tuhan nakni, an de mon-napuk eleg, ite ap amu on eke mon-enebin,” ulug hweag-etfag.

¹⁴Airoho hweag-etfag ma TUHAN en Musa fam olok hebagdeg bet-duruk kwit de, “Hat hare unuk Harun wereg fug no a? At de ele matuk ale mun enggatdeg ale An mundoho noluk deg. At ebe re suma watmin ulug waharuk angge re watlug hat nim ambi amluhupdeg at mun ahayeg harohoreg.

¹⁵At hinim ambi amluhupdeg de aren wene uruk ale fahet, Diroho uhun, ulug haren hweag-umuk. Hit de hebene birenet de henele uhup ale fahet mel ne duhup ale fahet mel, An den neg let-henepuk karuhuk.

¹⁶It ap homi inil hanim etma, wene aren uruk kwit de hat hunuk fam ukwag. Hat de Allah en uk hagdoho haren diroho in ulug hweag-utuk mu, aren hele walug it hweag-esauk karuhu.

¹⁷Domuk ai fam de haren along ale etma duruk karuhun anggere domuk ai walug lakin,” ulug hweag-etfag.

¹⁸Anyo mundoho hweag-etfag ma re at Musa anyo o eyamal Yitro obam lebagdeg hweag-utuk kwit de, “An o Mesir etma nori nerekwi etmano enoluk wereg ane, ulug nil esa lahuk en de, haren Fano lakin, ulug hweag-nimin,” ulug hweag-etfag ma re at Yitro en Musa fam uruk kwit de, “Hebe koloroho neg lakiyug,” ulug hweag-etfag.

¹⁹At Musa ebe o Midian kwenang fam etma wereg li em TUHAN en hweag-utuk kwit de, “Ap hat hebe howaruhuk ulug abug uruk katswa on etmano re mundoho waratswa anggere, o Mesir nikangge sombandoho lakin,” ulug hweag-etfag.

²⁰Airoho hweag-etfag ma re at Musa en ohwe mel omaliki mel hondog-esalug de wam keledai fam lahabe fesebagdeg de inim seberoho o Mesir lebag. Airoho lauk kwit TUHAN ele melaleg fam de at Musa en andomuk anyo et walug lebag.

²¹TUHAN en Musa hweag-utuk kwit de, “Haren along on dukwag ulug An den omamne og-hitihik. Anggere hat hebe o Mesir mundoho lahundeg de along on etma abirangge at raja Mesir on ai il hanim diyug. Aireg famen de An den ap ai unggul owag omamne debehukmu, aren ap homi etma lalusa fug ulug alele og-enebuhu.

²²Ai en raja ai fam uruk kwit de At TUHAN en diroho isi iyug: Israel aire an nomalik wandeba on,

²³ An den hat hobam mingming-hapuk kwit, An nomalik ai An nobam somban ik lowag ulug wilibi fein irihik famen de, haren holoho embeserihin mu re ketia An den oho homalik wandeba on watmin, Eheik iyug,” ulug hweag-etfag.

²⁴At Musa anyo kwema lauk kwit ekema o sabo sum fam saloho nohoruk men de, TUHAN watfagdeg, Musa warikoho debag.

²⁵Warikoho debag ma, Musa ohwe Zipora anyo en helep eke olok on oko amloho ahap bale febagdeg, Musa eyogma[6] doung debeik lebag. Airoho debebagdeg at Zipora en uruk kwit de, “Hat de nahun hamep an nobahet welahen,” ulug hweag-etfag.

²⁶Hwe ai en wene airoho ebag aire enahap balduk ale ai fahet ebag. Ai fam de, TUHAN en Musa watuk ale embesebag.

²⁷Airoho dulug etano TUHAN en Harun fam hweag-utuk kwit de, “Musa hinim ambi amluhup en o leimu etma lakin,” ulug hweag-etfag. Airoho hweag-etfag ma at Harun anyo lebagdeg aut Musa inim o dom ousa on fam etma ambi atfagdeg aut orohole kwe dop-dop dang-debag.

²⁸Airoho dang-dang atlug de at Musa en de TUHAN en o Mesir lakin ulug mingming duruk kwit hweag-etfag ale etmano mel ne along on mundoho aren duhup ale ulug on omano mel dindiloho hweag-etfag.

²⁹Hweag-etfag ma re Musa nim Harun nim etano o Mesir lebagdeg de it Israel on enowesi mundoho kabog-enepfag.

³⁰Kabog-enepfagdeg de at Harun en TUHAN en Musa fam hweag-etfag ale etmano hweag-esebag, ne at Musa en de along on it ap omano inil hanim en debag.

³¹Airoho debag ai fam de it mundoho demdoho bebag. Ne, it holduk men de “TUHAN en de it ap homi Israel on anyo fubi-henobahasi, ne hit anggin-fanggin hauk kahep ale ai Aren il hesauk,” ulug urukmu enesanggo holfagdeg de iren enerohole belabeg sahaun ulug TUHAN mot-debag.