Read Ninia Yali KELUARAN 40 Bible Online

KELUARAN 40 - Ninia Yali bible

KELUARAN 40

¹TUHAN ele Musa fam hweag-utuk kwit,

²“Nobam Sabo ai bigalem sehelet misig on fam tanggal oho satu fam wiruhun.

³Peti sali wene wareg ai wene melaleg numen anyo baleg wereg angge ilonggoma kwelabe feiyug. Kwelabe folug de, sum huliroho sok lariyug.

⁴Meja mel etman duruk angge mel feiyug, ne esahe lampu eyog anyo oho kwelabe folug de lampu ebe esahe ulog debeiyug.

⁵Mezbah emas on amben fano angge yalduk on aire Peti sali wareg wene yohwareg wereg on ai olohotma fil etma hwerie folug de, O Sabo anyo sokolma re sok hwilireg on borebeiyug.

⁶Mezbah foruk angge waroho yalduk mu aire O Sabo sokolma kurukmu etma feiyug.

⁷Ik yenggelduk angge obale aire O Sabo dulug mezbah dulug bul etma feiyug. Folug de ik hwenangge feiyug.

⁸Ai en de kain anggwe on de O Sabo ambe lilimol olohotma maseroho etma boril lalug de, sok lohon ai fam huliroho re sum sok latni boril lakiyug.

⁹O sabo mel olekwe duruk angge abirangge etma mundoho An nobahet neg foruk kwit de, ahalue hilili folug nobahakup, ai fam de An nobahet eneg on welaruhu.

¹⁰Abirangge dugdoho etma An nobahet fohupmu An namu nangge welamag ulug de mezbah inim di angge su angge etma nim An neg og-numuk.

¹¹Ik yenggelduk angge obale mel, anggulu eareg angge mel oho airoho neg diyug.

¹²Ai mundoho debelug de Harun nim omaliki nim enebe abirangge o Sabo sokolma etma watlug enebe ho dowag.

¹³Sum Imam en wan-duruk on anyo at Harun fam lahabe folug de, at ebe An nobahet eneg wereg lit yabuk imam on duruk kamagdoho re ahalue hilili feiyug.

¹⁴Ai mundoho debelug de at omaliki ai horogma wamag ulug hweag-esalug wahail lauk emde it enebe enesum kemeja wan-debeseiyug.

¹⁵Airoho debeselug de iren enebe Imam An nobahet wereg lit yabuk duruk kamagdoho re, it enakni debehup anyo hagdoho it enebene ahalue hilili feseiyug. Airoho ahalue hilili fesehup ai fam de it enunggul unuk on aire li eke lahaik-wahaik duruk li etma yabuk imam on fahet seneg lamuhup,” ulug hweag-etfag.

¹⁶Airoho hweag-etfag ma re at Musa en de TUHAN en abit hweag-etfag ale omano higitdoho neg debag.

¹⁷Ai fam de tahun bireneg on tanggal satu bulan satu on fam ap homi Israel o Mesir embeselug wilibik watfagdeg anyo, TUHAN Obam Sabo anyo salfag.

¹⁸Musa en indip oboule doaleg on etmano feil lebagdeg de, owag inditil laheg, e nunggulig on yinggeheg, owag lahabeg on etmano wirikap debeheg, debag.

¹⁹Airoho debelug de At TUHAN wene melaloho hweag-etfag ale higitdoho re O Sabo anyo onggwa saleg angge re dag fil on mapnuroho salfag.

²⁰Ai en de helep biren angge etano Peti sali wene wareg anyo fam kwelabe febag. Kwelabe febagdeg de at Musa en Peti anyo aplit ware folug de, sehene yihig elekwe anyo e beahan fare febag.

²¹Ai debelug, Peti Sali wene anyo o saboma omano hwerie febagdeg, sok huli angge kain sebeleg on sambuni febag. TUHAN en wene melaloho obam febag aleroho debag.

²²Ai debelug, Musa en de meja anyo O Sabo ilonggoma kain anyo en dag fil utara fil etma febag.

²³Airoho debagdeg de meja anyo fam de roti werako unuk wareg febag.

²⁴Lampu eyog anyo re o Sabo wirigmu olma etmano selatan fil meja anyo nim alukwe misigmuroho febag.

²⁵Febagdeg de lampu omano TUHAN il hanim etma ulogdoho febag.

²⁶Mezbah emas on fam wirig angge O Sabo ilonggoma febag angge anyo re kain alukwema etma febagdeg de,

²⁷At TUHAN en Musa fam wene melal-etfag aleroho yalduk angge amben fano on yalfag.

²⁸At Musa en de sok lareg angge tirai O Sabo fam anyo sukni febag,

²⁹ne sok ai olohotma etma re waroho yaldukmu obale anyo hwerie febag. Mezbah ai emberimmu re waroho yalduk angge mel, werako foruk on mel febag.

³⁰Ik yenggele foruk angge obale aire O Sabo dulug mezbah dulug etano febagdeg de ik hwenanggoho yohware febag.

³¹Airoho febagdeg de it Musa mel Harun mel at omaliki mel enenggik, eneyog etma omatuk katfag.

³²Iren hindik-hundig TUHAN Obam Sabo saleg ma kuruk kwit oho ne, mezbah horogma etma lauk kwit airoho neg duruk katfag.

³³O Sabo ai mel mezbah ai mel maseroho etma re Musa en kain wirilig on ilildil lebagdeg de aren sokole lohon olohotma lauk on fahet sukni febag. Airoho debebag ma re yabuk duruk on anyo mundoho debag.

³⁴ Ai en de Hena anyo wambik watfagdeg O TUHAN Obam Sabo wirigmu etmano salik wambik watfag ma re, O Sabo anyo fam At TUHAN ebe watlug wereg ma ombagbag seleg en neg hoporeg latfag.

³⁵Ai fam de at Musa en O Sabo ai ilonggoma etma kuruk katfag fug.

³⁶Hundig-hundig hena ai O Sabo wirig mu anyo en lehelug laharuk halug neg de it ap homi Israel on anyo enebe o ekema oko lakoho lit it enobam sabo omano meiyalduk katfag.

³⁷Famen de hena ai laharuk eleg halug de it oho etman la fug angge welatfag.

³⁸Ap homi Israel on enebe leil watil lauk kweleg etma re TUHAN ebe O Sabo ai fam wereg lit nukoho halug anggulog fam, ne hup anggo re indok ambulbul fam welatfag.