Read Ninia Yali KELUARAN 5 Bible Online

KELUARAN 5 - Ninia Yali bible

KELUARAN 5

¹Airoho dulug de it Musa, Harun nim etano raja Mesir on anyo akit kwik lebagdeg hweag-utuk kwit de, “Ap homi Israel on enakni TUHAN Allah anyo en diroho wene isi, It ap homi An nomaliki etma An nobam o leimu en somban ik lowag ulug, haren lakiek hweag-esakin isi,” ulug hweag-etfag.

²Airoho hweag-etfag man de hun raja anyo en hein og-esauk kwit de, “TUHAN aire ebe sa? Nunggwe ulug an den At ele holoho ap homi Israel on su wilibik laluhup fano ulug hweag-esamin? TUHAN ai an de napeleg, ne ap homi Israel on oho re fano laluhup ulug hweag-esamin fug,” ulug hweag-esebag.

³Airoho ebag ma it Musa, Harun nim en uruk kwit de, “Nit de Allah ap homi Ibrani on enakni ai nenolohotma enam atsi. Anggere nit wilibi nenobahakun mu lekma etma nukoho henahanam lama etma lahukdeg, nit nenakni TUHAN Allah obahet waroho yal-irik lahuk. Ne, niren airoho duhuk fugmen de Aren nit nenebe ouk fam inim weim ambiangman inim binggi nenowaruhu lit deg,” ulug hweag-etfag.

⁴Airoho hweag-etfag man de at raja anyo en Musa nim Harun nim fam uruk kwit de, “Nunggwe ulug hiren ap homi ai en yabuk duk on etmano bale fouk ale duruk kahep? Henamingming angge etma re yabuk dukwag ulug hweag-esakiek!

⁵Ap homi etma re enebe hum-hamdoho atswa, ne, ketiare it ai en yabuk duruk ale embesoukwag behepdeg uruk kahep au a!” ulug hweag-esebag.

⁶Nukoho anyo salim neg it Mesir on en ap yabuk durukmu inil kahal-enusug wereg on etmano mel, ne it Israel on en yabuk kepala wereg on etmano mel, raja en wene melal-enepuk kwit de,

⁷“It ap homi enunggul unuk ai on de helep kwenang dangge on fam wurukwag ulug siag-siag angge bug on omano og-esa fug. It enemu en herarik lowag ulug embeseiyug.

⁸Famen de it ap homi aire helep wituk kwit ebe atam wutuk katswa eta hagdoho wiruhup en hweag-esakiyug. Ite ko-ko ale eta neg duruk kamul ulug, ai fam, Nit Allah obahet waroho yalik laul en, fano ukwag aho, ulug enele mul-mul neg uruk kwit neg wereg ai.

⁹Ap homi etma re henomamne fam yabuk kwelap-enebuhupmu yabuk fahet duruk kwit de wene seiale wene ai holduk on fahet eke koloreg laruhu fug anggere,” ulug hweag-esebag.

¹⁰Airoho hweag-esebag ma re, ap Mesir on en yabuk durukmu inil wereg on etmano nim it Israel on en yabuk kepala etmano inim wilibik lebagdeg it ap homi Israel on etmano hweag-esauk kwit de, “Raja en de it enggelangge og-esauk kamuhup fug eheik.

¹¹We hit henemu en henendan bolug herara lauk kamuhup, famen de hiren helep dangge fam wituk kahep on etma re atam wituk katuhup etano hagdoho neg wituk kamuhup ne eke dahandoho apma fil wiruhup hayog eheik,” ulug hweag-esebag.

¹²Airoho hweag-esebag ma re it ap homi Israel on anyo o Mesir kwenang fam mundoho omano lebagdeg de enggelangge kabog-dik lebag.

¹³It ap Mesir yabuk durukmu inil welamag ulug unduhuk fesebag on etmano en de, “Enggelangge og-hesaukmu helep wituk katuhup etano hagdoho neg wituk kamek,” ulug enele ningdoho neg hweag-esauk katfag.

¹⁴It ap inil kwelap-enusug on etmano en de it Israel on yabuk kepala unduhuk welatfag on etmano yeik enowatuk kwit de, “Nunggwelug ap homi hit henunggul unuk on en helep atam humdoho wituk katswa higitdoho humdoho wituk fug?” ulug hein og-enepuk kwit enowatuk katfag.

¹⁵Airoho duruk ale en de it Israel on en yabuk kepala wereg on omano raja anyo akit lebagdeg hweag-utuk kwit de, “Nunggwe ulug nenakni haren airoho nenobaharuk kahen?

¹⁶Nit enggelangge og-nesauk eleg lit en famen de helep wiriek ulug hele omamne fam hweag-nesauk kahen! Ne, ketia it hautsi yabuk durukmu inil wereg on oma iren at siag duruk kwit en nit yeik obahatman nenowatuk!” ulug hweag-etfag.

¹⁷Airoho ebagman hun raja anyo en uruk kwit de, “Demdoho hit de mun ko on deg lit yabuk duruk ale henerim en, henakni TUHAN obahet waroho yalik laul en fano lakiek in ulug mingming napuk kwit neg welahep.

¹⁸Yabuk ekenim dik lakiek. Enggelangge re og-hesahup fug famen de helep de atam logdoho wituk katuhup ale higitdoho neg wituk kamluhup,” ulug hweag-esebag.

¹⁹It Yabuk kepala wereg on omano hauk men de it ap homi Israel on de helep atam wituk katfag aleroho wituk kamluhup ulug hweag-esebag ale anyo hebagdeg nit de mun anggin-fanggin on hauk kahe bebag.

²⁰It anyo raja obam en wilip aik waharuk men de Musa, Harun nim etano it nangno-enepukmu enekit wilibik watfag.

²¹Wilibik watfagdeg it yabuk kepala etmano en uruk kwit de, “Hiren duruk kahep ale At TUHAN en henobabut mundoho oluk deg! Aren neg hit unggum og-hesahu! Hiren duruhup fam nit anyo at raja inim autsi pegawai inim en enerim nenebeheg, duruk kwit iren nenebe binggi nenowatul ulug duruk,” ulug hweag-esebag.

²²Airoho ebag ma at Musa nikangge TUHAN akit lebagdeg hweag-utuk kwit de, “Tuhan nakni, Haren ap homi Israel on enobam mun anggolo siag ale aire nunggwe ulug debeseruk kahen? Nunggwelug Haren an suma mon-nabik waharihin?

²³An de at raja weregma kwik lauihikdeg Hat hunuk fam wene hweag-itihik li anyo en angge, aren ap homi oma ilik-malikdoho debeseruk kwit wereg. Airoho debeserukmu Haren it let-enepuk kwit ulug eke duruk kahen fug oma,” ulug hweag-etfag.

²⁴Airoho hweag-etfag ma TUHAN en Musa fam uruk kwit de, “Ketia re an den raja fam nunggwe ale on durukmu neamihin e. Aren An nomaliki ai fotog-esowag ulug nele abiroho hweag-irikohon lahi. Airoho diminmu re, demdoho aren nomaliki o su en muko wilip-enebukwag ulug nabiroho dikoho lahi,” ulug hweag-etfag.