Read Ninia Yali KELUARAN 6 Bible Online

KELUARAN 6 - Ninia Yali bible

KELUARAN 6

¹ Allah en Musa fam uruk kwit de, “TUHAN Nebe re An.

²An den nebe Abraham, Ishak, Yakub, inim fam enolohotma Allah Mun Nomamne wereg ondoho enam atihik, famen de it enobam An nunuk yiko, TUHAN [7] ulug enolugap enepihik fug.

³An den it ninim sali wat-wat atuhuk neg. An den de o Kanaan it atam ap bohon atlug welatswa ma etma og-hesahuk ulug abug hweag-esauihik.

⁴An de it ap homi Israel on it ap homi Mesir on en anggin fam sebeloho feseruk mu nenek duruk kwit enele ngaruruk on de mundoho nesanggo holdihikdeg de, An den wene sali ninim wat-wat atuhuk on ai fam ebet hauk kahi.

⁵Anggere haren ap homi Israel on fam An den diroho eheik ulug wene unduhuk feik lag: TUHAN Nebe re An. It ap homi Mesir on enapma sebeloho fahat-henusug wereg ma ai en An den fiselaroho wilibi henobahakuk. An den it Mesir on fam unggum anggin humon enobam foruk kwit An Nomamne humon fam hit henahap wendat-henebuhuk ale unug-hahuk.

⁶Hit de An nomaliki on amuhupmu, An de hit henakni Allah aruhuk. Ai fam de hiren de “At sure TUHAN nit nenakni Allah ap homi Mesir on enapma en fiselaroho wilibi nenobahaik wahasi on anyo,” ulug henoluk amuhup.

⁷Hit de An den hun Abraham, Ishak, Yakub mel fam o kwenang hombuk baloho sali ninim wat-esauihik mu etma og-heneplug henobahaik lahuk; Kwenang aire An den hit og-heauihik mu hit henonggwareg henangge on aruhu. An de Nebe TUHAN,” ulug hweag-etfag.

⁸Airoho hweag-etfag ma re At TUHAN en ebag ale etmano mundoho at Musa en it ap homi Israel on fam hweag-esa lebag, famen de it enobam ilmu siagdoho anggin-fanggin feseruk katfag ai fam enenda siag atfagdeg de at Musa en uruk on anyo hole fouk fug angge neg duruk katfag.

⁹Ai en TUHAN en Musa fam hweag-utuk kwit,

¹⁰Hun raja Mesir on wereg ma akit kwik lamihin deg hweag-utuk kwit de, “Ap homi Israel on hat hanggwenangma suma en embeselug wilibik lowagdoho fano lakiek ulug hweag-esakin, ukwagdoho ulug hweag-irik lakin,” ulug hweag-etfag.

¹¹Famen de at Musa en onggo uruk kwit de, “Ap homi Israel on en famen oho re an nele holduk fug. Ne, at raja Mesir on ai en de an hag on nele uruk ale et kauk deg lahi on sure nele holuk alereg a?” ulug ebag.

¹²Airoho TUHAN en Musa, Harun nim en ap homi Israel on fam inim ne raja Mesir on fam inim, “Nit de TUHAN ap homi Israel on o Mesir en melaloho og-eneplug wilibukwag ulug mon-nenebik waha,” ik lowag ulug TUHAN en mon-enepfag.

¹³Musa nim Harun en enombasi endag-ail lebag on de su: Yakub amloho wandeba on de Ruben, ne aren omaliki ap ohwan angge welatfag on enebe re: Henokh, Palu, Hezron, Karmi nim. It etare ap homi enunggul unuk Ruben fam on enambu-enombasi welatfag.

¹⁴Simeon omaliki ap angge enebe folfalik en welatfag, enebe re: Yemuel, Yamin, Ohad, Yakhin, Zohar, inim. Ne, at ohwe Kanaan on ai inim de Saul endetfag. It etare ap homi enunggul unuk Simeon fam on enambu-enombasi welatfag.

¹⁵At Lewi re omaliki ap enebe henahan angge welatfag. Enebe re Gersom, Kehat, Merari inim; It etare ap homi enunggul unuk Lewi fam on enambu-enombasi welatfag. At Lewi ebe re umur 137 tahun huli welatfag.

¹⁶ Gersom omaliki ap enebe biren angge welatfag. Enebe re Libni inim Simei inim; Ap homi iren ondohoma on enambiangma hum-hamdoho welatfag.

¹⁷Kehat omaliki ap enebe ohwan angge welatfag. Enebe re Amram, Yizhar, Hebron, Uziel inim. At Kehat ebere umur 133 tahun huli welatfag.

¹⁸Merari omaliki ap enebe biren angge welatfag. Enebe re Mahli nim Musi inim. It ap enunggul unuk Lewi on anyo fam enunggul unuk domog-domog it enambiangma endag-atuk on nim airoho welatfag.

¹⁹At Amram de ohwe akni aut hwele Yokhebed hwelebag, ne it enomaliki re Harun nim Musa nim. Amram ebere umur 137 tahun huli welatfag.

²⁰Yizhar omaliki ap enebe henahan angge welatfag. Enebe re: Korah, Nefeg, Zikhri.

²¹At Uziel oho re omaliki ap enebe henahan angge welatfag. Enebe re: Misael, Elsafan, Sitri nim.

²²At Harun de ohwe hun Aminadab ahaloho hwele Eliseba anyo hwelebag; Hwe Eliseba ebe re at Nahason erek. At Eliseba en de Nadab inim, Abihu inim, Eleazar, inim Itamar inim endag-enepfag.

²³Korah omaliki ap enebe henahan angge welatfag. Enebe re: Asir, Elkana, Abiasaf inim. It etare ap homi enunggul unuk Korah on enambu-enombasi welatfag.

²⁴Eleazar hun Harun amloho anyo re hwe hun Putiel ahaloho misig eke nim hwelebag, ne it enomalik de Pinehas endetfag. It enunggul unuk Lewi on fam en it enowesi kepala suku welatfag on nim kepala o ilonggo domog-domog welatfag on de ai.

²⁵Harun, Musa nim eta en ap homi Israel on o Mesir en og-eneplug wilibik wamag ulug TUHAN en mingming-enepfag.

²⁶At raja Mesir on en ap homi Israel on loloho wilibi fesoukwag ulug it biren etan raja weregma kwik lebag.

²⁷At TUHAN o Mesir en Musa inim ele matuk kwit anyo,

²⁸TUHAN en uruk kwit de, “TUHAN nebe re An. An den di ale su ale hweag-hirihi on aire mundoho at raja Mesir on fam hweag-umug,” ulug hweag-etfag.

²⁹Famen de at Musa en onggo TUHAN fam uruk kwit de, “Hat de, an den nele uruk ale mun kaukdeg lahi ale aire Hat oho holukdeg. At raja en de an nele hol-nabuk alereg ulug a?” ulug hweag-etfag.