Read Ninia Yali KELUARAN 7 Bible Online

KELUARAN 7 - Ninia Yali bible

KELUARAN 7

¹Airoho ebag ma TUHAN en Musa fam uruk kwit de, “At raja olohotman de An den hat hebe Allah hagdoho hobahakuk, ne hat howe Harun en de hat hobalma nabi hagdoho atlug at fam wene uhu.

²An den wene mundoho melale hobahaki on aire mundoho Harun hweag-umuk. Haren Harun hweag-utuk kwit de, ap raja ai en ap homi Israel on o Mesir embeselug wilibik lowagdoho fano in, ukwag ulug hweag-irik lowagdoho mingming diyug.

³ Famen de An den at raja ai unggul owag haro debehuk lit deg. Ne, An den anggin-fanggin o Mesir fam feseik waruhuk famen de, aren hat hele esanggo holuhu fug.

⁴Ai fam de An den ap homi Mesir on fam unggum anggolo on enobam fesehukdeg, An den nomaliki enunggul unuk Israel on o kwenang ai fam en og-eneplug wilibik waruhuk.

⁵Ne, An den unggum enobam folug Israel on og-eneplug wilibik waharuk li em eta, it ap homi Mesir on en, An sure nebe TUHAN, anyo enoluk amuhup,” ulug hweag-etfag.

⁶Airoho hweag-etfag ma Musa nim Harun inim en At TUHAN en melale fesebag ale anyo higitdoho debag.

⁷It enebe re Musa umur 80 tahun ne Harun umur 83 tahun deg li hun raja Mesir on weregma kwik lebag.

⁸TUHAN en Musa, Harun inim fam hweag-esauk kwit de,

⁹“At raja en lahe hit henobam uruk kwit eneg ale along on eke diek ulug, hweag-hesauk halug de, at Harun en domuk anyo oko kwenangma raja olohotma etano hwik howag ulug hweag-umuk. Ne, domuk ai hwik-hauk men de ininoho kisu aruhu anggere,” ulug hweag-esebag.

¹⁰Airoho hweag-isil lauk alere Musa, Harun inim etano raja weregma kwik lebagdeg At Allah en melale fesebag ale etmano debag. At Harun en de domuk anyo hun raja inim autsi pegawai inim enolohotma kwenangma etano hwik hauk men de, domuk anyo ininoho re kisu atfag.

¹¹Airoho atfag ai fam de at raja en oho ap autsi hwalon mel indip ale eneluk enap mel, wol-enepfag ma iren oho airoho enehwal ale fam debag.

¹²Iren oho enandomuk omano kwenangma hwik-hebag ma, domuk omano ininoho kisu atfag. Famen de Harun andomuk anyo en de it enandomuk omano nil lebag.

¹³Airoho duruk kweleg famen de, TUHAN en ebag ale anyo higitdoho re at raja ai mundoho unggul owag haro atfagdeg Musa mel Harun mel enele uruk ale omano furoho holuk fug angge welatfag.

¹⁴Ai en TUHAN en Musa hweag-utuk kwit de, “Raja aire unggul owag mun haroreg lit it ap homi Israel on lowag ulug hweag-esauk fug.

¹⁵Anggere hit laluhupdeg de o hubetdoho at ebe Ik Nil aegma wambik waharuk li em eta hinim ambi aik lakiyug. Hiren de domuk ininoho kisu am alereg angge anyo walug lalug de at ebe waharuk on nangno-hauk kwit, ik aegma etma wereg lamuk.

¹⁶Haren hun raja ai fam uruk kwit de, ap homi Ibrani on enakni TUHAN Allah anyo en de, An nomaliki etma o leimu An nobam somban ik lowagdoho fotog-esowagdoho hweag-irik lakin, ulug an mon-nabik waha ma wahi. Famen de ketia hulien angge nowe haren holuk eleg angge welahen.

¹⁷ Ai fam de, TUHAN en diroho isi, An den fobik eke duhuk ale ai fam neg de haren, At ai ebere TUHAN, holuk aruhun. Domuk su fam de an den ik wirig atuk on su emberim fam biat haminmu re, ik ebe il ininoho mep aikohoreg.

¹⁸Ikan-ikan mundoho waramlusa, ne ik su amben siag on atmisi mu ap homi enunggul unuk Mesir on en ik ebe na fug ale atmisi, ulug, hweag-irik lakin,” ebag ma, hweag-etfag.

¹⁹TUHAN en Musa hweag-utuk kwit, “Harun en andomuk anyo walug ik wirig-atuk on mundoho fam inim, ik kalog kwe inim, ik sene o Mesir kwe wereg on fene inim bil hil lowagdoho hweag-imin. Ik ebe il mep atmisi mu, o etma abirangge re mep neg aikohoreg, ne e ahauk elma yenggeleg on mel, ikwag e on fam mel ikwag helep on fam mel elma hwenanggeg on etma oho mep neg aikohoreg,” ulug hweag-etfag.

²⁰Airoho hweag-etfag ma re it Musa, Harun inim en de TUHAN en hweag-esebag ale etano higitdoho debag. At raja mel autsi pegawai mel, inil hanim etano at Harun en andomuk anyo oko Ik Nil anyo emberim fam biat hauk men de ik anyo ininoho il mep atfag.

²¹Ikan-ikan ik ai ilmu wereg on omano mundoho waratuk kwit mun filikdoho amben sang-fang urukmu re ap homi Mesir on en ik anyo na fug alereg latfag. O Mesir kwenang fam etma abirangge mep neg saha ebag.

²²Aireg famen de it Mesir enap hwal ale duruk on en de it enohwal ale fam higitdoho debag, ai fam de at raja anyo unggul owag haroreg lit neg welatfag. At TUHAN en Musa nim Harun nim hweag-esebag aleroho re at raja en it Musa Harun enele uruk on anyo enele holuk eleg angge welatfag.

²³Airoho wereg lit de along on debag ale etmano fahet we dorangge oho lohon ebet ha fug angge embeselug obam olma lebag.

²⁴Ik wirig-atuk on etmano na fug alereg en de ap homi Mesir on mundoho en ik aeg kwe etmano ik sene habuloho heraruruk katfag.

²⁵At TUHAN en Ik Nil wip-debebag huli en de nukoho sabiren lebag.