Read Ninia Yali KELUARAN 8 Bible Online

KELUARAN 8 - Ninia Yali bible

KELUARAN 8

¹Airoho debagdeg de Allah en Musa hweag-utuk kwit de, “Hat hebe raja akit lalug wene An den imin on su hweag-irik lakin: An nomaliki etman An nobam somban ik lowag ulug, haren lakiek hweag-esakin.

²Haren embeseruk neg halug de, An den hukuman o su fam yahaye en hoporoho femin.

³Ik Nil som etma yahaye en neg hopo uhureg, no ai ikman wilibik wamuhupdeg, hobam hebe welahenma mel, o ilonggoma hebe nohoruk kahen ma mel, nohoruk kahen angge fene mel, hautsi yabuk leho on wereg on enobam mel, it homi holduk on enobam mel, hangge siburu roti weratuk angge fene mel, waruk esetuk angge fene mel, fene kwik wamuhup.

⁴Yahaye etma hweik sologdoho re hat hebene nim, it hautsi enebe nim, ap homi holduk on enebe nim laharuk kamuhup, eheik ulug hweag-irik lag,” ulug hweag-etfag.

⁵TUHAN en Musa fam uruk kwit de, “Yahaye o Mesir fam suma mundoho enam atuk kwit hopo ukwagdoho at Harun en andomuk anyo ik wirig atuk on fene nim, ik kalog hwaleg on fene nim, ik sene yenggeleg on fene inim bil howagdoho mingming din,” ulug hweag-etfag.

⁶Airoho ebag ma re, at Harun en andomuk anyo ik fil etmano bil hauk men de yahaye hweik heheg wilibik waharuk kwit o kwenang etma fam mundoho hopo ebag.

⁷Airoho debag ma, it hwal enap en it duruk aleroho enohwal fam yahaye o etma kwik wamag ulug debag ma kwik watfag.

⁸At Raja en Musa, Harun inim wol-enepfagdeg hweag-esauk kwit de, “At TUHAN en yahaye oma elehap deboukwag ulug TUHAN fam somban iek, airoho duluhup halug de an den ap homi hit henunggul unuk on etma TUHAN obahet waroho yalik lakiek ulug hweag-hesamin,” ulug hweag-esebag.

⁹Airoho hweag-esebag ma Musa en onggo hweag-utuk kwit de, “An nenda nahayeg fam nowe hat hobahet somban ikohon lahi anggere haren nukoho di salim ulug momale fein, ai fam de an den nowe hat hobahet inim, ap hautsi yabuk leho on wereg on enobahet inim ap homi holduk on enobahet inim, somban imin. An airoho somban iminmu re yahaye ebe mundoho eleg aruhu ne we Ik Nil fam etma neg welaruhu, famen nowe hebe re yahaye etma fam en koloroho welaruhun,” ulug hweag-etfag.

¹⁰Hweag-etfag ma, at raja en onggo uruk kwit de, “An nobahet sono somban uhun,” ulug hweag-etfag. Airoho ebag ma, at Musa en uruk kwit de, “An de nowe haren heng-ehen ale ai higitdoho duhuk. Ai fam de nit nenakni TUHAN Allah ai hag on amu on de eke wereg fug ulug nowe hat holuk aruhu.

¹¹Aren neg nowe hat hebe inim it hautsi yabuk leho on wereg on inim it ap homi holduk on inim we Aren neg koloroho henobahaku. Ik Nil ahummu etma neg de yahaye welaruhu famen de o elekwe eke welaruhu fug,” ulug hweag-etfag.

¹²Airoho hweag-utlug de it Musa inim Harun inim etano raja embeselug wilibik lebag. Fobik en de At TUHAN en yahaye mondorik watfag on etmano eleho foukwag ulug Musa en somban ebag.

¹³Somban ebag ma At TUHAN esanggo holfagdeg yahaye o elekwe wereg on etmano mel, oluluk kwe wereg on mel, yabuk kwe wereg on mel, mundoho waratil lebag.

¹⁴It ap homi Mesir on en de yahaye wareg omano walug kabog-duruk men de kabog-kabog on lahapfag ma o kwenang etma fam amben mun siag on saha ebag.

¹⁵At raja en hauk men yahaye omano mundoho waratfag ma hebagdeg at unggul owag haro atfag. At TUHAN en ebag ale anyoroho re it Musa mel Harun mel en uruk on etmano raja en hole fouk fug angge welatfag.

¹⁶TUHAN en Musa hweag-utuk kwit de, “O Mesir abirangge fam kwenang ololo etma ininoho kolun neg amagdoho, Harum en andomuk anyo fam kwenang warukwag ulug hweag-imin,” ulug hweag-etfag.

¹⁷Airoho hweag-etfag ma re, Harun en domuk anyo kwenang fam etma fukdoho watuk katfag ma re, kwenang ololo o Mesir fam etmano kolun neg humdoho saha ebagdeg, ap homi fene inim wam fene inim kolun en neg hulilip deg welatfag.

¹⁸Airoho deg ma it ap hwal enap omano en iren enohwal aleroho kolun amag ulug wal-hebag famen de duk fug ale atfag. Di kwe su kwe kolun neg wereg,

¹⁹ atfag ma re it hwalenap omano en raja hweag-utuk kwit de, “Su re Allah en duruk,” ulug hweag-etfag. Famen de at raja unggul owag haro atfagdeg duruk kwit de TUHAN en ebag ale anyoroho re it Musa, Harun mel en hweag-utuk on etmano enele furebouk eleg angge duruk katfag.

²⁰TUHAN en Musa hweag-utuk kwit, “Sono hubetdoho at raja ik aegma wamburuk li eta lalug de hinim ambi amuhup deg An nele imin on su hweag-umuk: An nomaliki su lahupdeg an nobam somban ik lowag ulug laluhup fano hweag-esakin.

²¹Haren nele sahaloho embesehun halug An de hat hobam inim, it hautsi yabuk leho on wereg on fam inim, it homaliki holduk on fam inim, sobon mondorik waruhuk. Ap homi Mesir on enobam olekwe mundoho inim ne o Mesir bumbuk sili mundoho etma inim sobon en neg sahareg welaruhu.

²²Famen de o Gosyen An nomaliki wereg obam etma neg de, haren boruk kwit, At su ebe TUHAN en duruk, ulug holuk amagdoho re o etma sobon eke welaruhu fug.

²³An den An nomaliki fam inim Hat homaliki fam inim aham deg[8] welamag ulug debehuk. Ne, along on aire we o sono neg aruhu, eheik iyug,” ulug hweag-etfag.

²⁴Airoho hweag-etfagdeg At TUHAN en raja ebe wereg obam bumbuk it autsi apma yabuk duruk on enobam olekwe inim, sobon hum-hamdoho mondorik watfag. Mondorik watfag ma re o kwenang etma fam sobon hum-ham alereg ma anggolo hauk katfag.

²⁵Airoho debag ma at raja en Musa, Harun inim wol-enepfagdeg hweag-esauk kwit, “Laluhupdeg henakni Allah ai obahet waroho yal-irik laluhup famen de we o kwenang su on fam etma laluhup,” ulug hweag-esebag.

²⁶Airoho ebag ma, at Musa en onggo uruk kwit de, “Nit de airoho dul fug. Niren airoho dul men de nit duruk ale ai it ap homi Mesir on en inil nesalug de, enendama het beil lauk kwit, nit demdoho helep hwik nenowaruhupmu waramuhuk lit deg.

²⁷Aireg anggere nit de o nukoho henahanam lama hagdoho o leimu etma lahukdeg At TUHAN en nit nenobam melaloho hweag-nesasi higitdoho di angge su angge TUHAN Allah obahet waroho yalik lahuk,” ulug hweag-etfag.

²⁸Airoho hweag-etfag ma, at raja en uruk kwit de, “Aireg halug de hit o leimu etma henakni TUHAN Allah obahet waroho yalik laluhup fano, famen de il yatdoho lahup hayog. An nobahet oho somban yig-nabiyug!” ulug hweag-esebag.

²⁹Airoho ebag ma, Musa en onggo hweag-utuk kwit de, “An lamindeg de sobon etma nowe hat hebe welahenman inim, it hautsi pejabat weregman inim, ap homi holduk on weregman inim henobahalug wilibukwag ulug an den folo-folo TUHAN obam somban uhuk. Famen de haren nit ekenim lal-nenebuk fug, it ap homi enunggul unuk Israel on en TUHAN obahet wam waroho yal-irik la hag kwe baleg hag ale duk fug,” ulug hweag-etfag.

³⁰Airoho ebagdeg at Musa anyo raja embeselug lebagdeg TUHAN fam somban ebag.

³¹Ne At TUHAN en Musa en somban ebag on anyo holfagdeg ma, sobon omano ap pejabat weregma etmano en inim ap homi holduk on wereg ma etmano en inim murulug wilip atfag, dem misig ulug oho eke welatfag fug.

³²Airoho debag famen de li ai fam oho raja unggul owag haroreg lit deg ap homi Israel on etmano laluhup ulug hweag-esebag fug.