Read Ninia Yali KELUARAN 9 Bible Online

KELUARAN 9 - Ninia Yali bible

KELUARAN 9

¹TUHAN en Musa hweag-utuk kwit de, “At raja anyo wereg ma lamihindeg de, ap homi Ibrani on enakni TUHAN Allah anyo en de diroho eheik ulug hweag-irik lag: An nomaliki etma An nobam somban ik lowag ulug fotog-esakin.

²Haren An it ai fotog-esauk eleg halug de,

³An den de ouk mun namel-mel on hat howam kuda, keledai, unta, sapi, domba, kambing mel mundoho fam mondorik waruhuk.

⁴An den it ap homi Israel enowam nim, ap Mesir on enowam inim aham debehukmu re, it ap homi Israel on enowam de misig oho eke wararuhu fug.

⁵An TUHAN en wene ai sono duhuk en mundoho wep debehi, eheik iyug,” ulug hweag-etfag.

⁶Hubet sekandoho re TUHAN en ebag ale anyo higitdoho debag ma re it ap homi Mesir on enowam de mundoho wat-heheg lebag, famen de it ap homi Israel on enowam de misig oho eke waratfag fug.

⁷Airoho debag ma at raja en atfag ale anyo fahet hein og-enepuk men de, it ap homi Israel on enowam de we misig oho eke waraha fug ulug hweag-etfag. Famen de at raja anyo unggul owag haro atfagdeg de ap homi anyo lowag ulug fotog-esebag fug.

⁸At TUHAN en Musa, Harun inim fam hweag-esauk kwit de, “Di angge su angge yaldukmu etman ul henenggik biren, henahan en hagdoho yinggiloho walug de, at Musa en de raja olohotman etman kolokwe hwik-esowag.

⁹Airoho hwik-esamisimu re ul anyo o Mesir kwenang fam etma mundoho saha uhu. Saha uruk kwit de ul ai en wam fam inim ap homi fam inim bot humon yihikureg sogdoho muluna wilibik waharuk on deg laruhu,” ulug hweag-etfag.

¹⁰ Airoho ebag ma at Musa inim Harun inim en ul anyo walug de raja wereg ma lebag. At Musa en de ul anyo koloma hwik-esebag ma re ul anyo en ap homi enobam inim wam enobam inim bot muluna sogdoho yebil atuk on yig-enepfag.

¹¹Airoho debag ma re it hwalenap omano re it ap homi Mesir on foma etmano hagdoho bot enebene abirangge yig-enepfag ma re iren Musa wereg ma la fug ale atfag.

¹²Famen de TUHAN en hun raja anyo unggul owag haro debebag ma re, At TUHAN en hweag-esebag ale higitdoho at raja en de it Musa, Harun mel en uruk on etmano hole fouk fug angge duruk katfag.

¹³TUHAN en Musa hweag-utuk kwit de, “O sono hubetdoho re raja weregma lahundeg it ap homi Ibrani on enakni TUHAN Allah anyo en eheik ale re diroho ulug hweag-umuk: An nomaliki etma An nobam somban ik lowag ulug fotog-esakin.

¹⁴Li su on fam de An den anggin hum ale eke mondorik waruhuk on aire it hautsi hapma yabuk duruk on mel ap homi holduk on mel, enobam neg de fug, ite o kwenangma suman An nim ilit duk on eke wereg fug ulug hat holuk amag ulug hat hebe fam inim mondorik waruhuk.

¹⁵An den hat hebe inim hat homaliki holduk on nim henobam hukum henobahamin ulug duruk kwit en de hit henebe mundoho eleg alep.

¹⁶ Famen de An den hit henoluk lili henobaharihik aire, An nebe nalong welahe ale anyo hit henobam ename fohukmu An nunuk o kwenangma suma bogdeg welamag ulug dirihik.

¹⁷Airoho dirihik ai deg kweleg, hat henda leho wereg lit, An nomaliki wilibukwag ulug oho fano uruk kahen fug.

¹⁸O sono hubet de ketia eiya hag li em, An den osit lumbiag mun al hondoreg on o Mesir fam suma endam en inim ketia inim waharuk eleg on mondorik waruhuk.

¹⁹Aireg anggere hat howam inim hangge amu on dagma wereg on inim obale fano hwaloho fein. Ap homi dagma welamuhup on nim di angge su angge along baleg elegma welamuhup on nim de osit lumbiag wamburuk kwit enowaruhu, Eheik iyug,” ulug hweag-etfag.

²⁰Airoho ebag ma it ap yabuk leho on duruk enap fomane TUHAN en ebag on anyo fam enakol atfagdeg iren enamingming angge inim enowam inim osit en enowaruk no ulug og-eneplug olma kwelap-enepfag.

²¹Famen de it foma en wene ebag on anyo furebouk fug angge re it enamingming angge mel enowam mel dagma embesebag.

²²Airoho debagdeg At TUHAN en Musa hweag-utuk kwit, “Hat henggik lahabe femihin mu re osit lumbiag o Mesir fam abirangge wambik watmisi. Osit ai wambik waharuk kwit de ap homi enebe inim, wam fene inim, yabuk yaho kwe o Mesir fam etma osit en warikohoreg,” ulug hweag-etfag.

²³Airoho hweag-etfag ma Musa en domuk lahabe foruk kweleg, TUHAN en osit lumbiag nim ululu nim belabik watfag, ne oweal en de lepengdoho kwenang salduk katfag. TUHAN en

²⁴ osit lumbiag mun fulu bolan on belabik waharuk kwit oweal lepengdoho dahan-dahan atuk katfag. It ap homi Mesir on welatfag lien angge re keram ai osit fulu bolan on wambik watfag ai.

²⁵Osit lumbiag ai en de o Mesir fam abirangge etmano eneyabuk yaho elehap deberuk kwit de, enowam mel, ap homi enebe mel, elehap debebag. Yabuk yaho mundoho elehap deberuk kwit de e wilibig on mundoho unggul waroho febag.

²⁶O Gosyen it ap homi Israel on welatfag ma etma neg de, osit lumbiag wambebag fug.

²⁷Airoho debag ma at raja en Musa, Harun nim wol-enepfagdeg hweag-esauk kwit de, “An siag dirihik. We At TUHAN amu neg de demdoho on wereg. An nim an nomaliki hwal-enepuk kahi on nim en mun kwasikdoho duruhuk.

²⁸Nit de osit inim ululu nim ai en mun ouk anggoloroho hehereg de, nit nenobahet TUHAN fam somban iek. Hit de suma welamluhup fug, an de hit henebe fotog hesaminmu laluhup,” ulug hweag-esebag.

²⁹Airoho hweag-esebag ma at Musa en raja fam uruk kwit de, “An nebe o kota elehet dag fil aik lamindeg de, an nenggik lahabe folug TUHAN fam somban ikohon lahi. An den airoho diminmu re ululu bale feheg, osit lumbiag dereng eheg, dimisi fam kwenang sure TUHAN onggwareg en on ulug nowe hat holuk atmisi.

³⁰Famen de, nowe hat mel hautsi hapma yabuk duruk on en mel TUHAN Allah fam henakol boruk kahep fug ale aire an mun noluk deg,” ulug hweag-etfag.

³¹Rami owisig yaho on mel, jelai mel mundoho waratswa aire rami re owil owan mungmung duruk li atlug ne jelai re owan anggin kwelapuk li atlug.

³²Famen de gandum anggen mel angge wereg on mel elehap disi fug aire ebe anggen yihig li owan deg ma atlug.

³³Airoho ulug de, at Musa anyo raja weregman kota dag fil wilibik lebag. Etman de aren enggik lahabe febagdeg TUHAN fam somban ebag ma, at airoho duruk li em etano ululu anyo bal aheg, lumbiag inim osit inim anyo dereng eheg, debag.

³⁴Airoho debag ale anyo at raja en hebagdeg aren siag ekenim debag. At mel it autsi apma yabuk duruk on mel eneitogdoho enenggul owag haro atfagdeg welatfag.

³⁵TUHAN en Musa fene en hweag-etfag ale higitdoho re at raja en it ap homi Israel en wilibukwag ulug, lakiek hweag-esa fug angge welatfag.