Read Ninia Yali AYUB 1 Bible Online

AYUB 1 - Ninia Yali bible

AYUB 1

¹O Us[1] kwenang fam etma re ap misig eke unuk Ayub ai welatfag. At ebe enda mel, obabut mel, mun fano ahun wereg lit de siag ulug oho mun dit-dorangge mel duk fug angge wereg lit de, aren Allah apne weheg, obam dipdoho deheg, duruk kwit welatfag.

²At omaliki re ap on enebe sabiren angge, ne hwelani enebe henahan angge welatfag.

³Hun ebere it ap homi o Timur fil etma welatfag on en de at neg de mun enggik wereg dung ahun welatfag. Airoho deg lit atlug de, at amingming angge eyabuk duruk on humdoho mel, owam domba 7.000 en mel, unta ebe 3.000 en mel, sapi re 1.000 en, keledai re 500 en airoho fahat dalug latfag.

⁴Airoho deg ma re at Ayub omaliki etma re eneitogdoho re soni pesta eke obam esereheg, eke obam esereheg, duruk katfag ma re iren soni esetuk kwit omano re at Ayub ahwelani enebe henahan etano oho hondog esalug de, it ininim seberoho enasiburu nenggeg, enahaik nenggeg duruk katfag.

⁵It omaliki etmano hundig soni osoko nalug durukmu etmano re, at Ayub anyo hubetdoho neg inatlug wenggel-hauk kwit de, “Iren soni osoko nenggesa on ai fam de siag duruk kwit Allah unuk sebeloho fehesa lam alereg,” ulug de, it omaliki omano TUHAN en enesiag elehapdoho fesoukwag ulug wam omaliki enebe domog fahet waroho yalduk katfag.

⁶ Nukoho misig salim de it bohol fam etma enoluk wereg[2] omano TUHAN horogma aik lebag ma re, at Ap enda kahalni[3] anyo oho it etma enesahalimu welatfag.

⁷Wereg ma re TUHAN en at anyo fam hein og-hauk kwit de, “Hat de hebe keman?” Ebag ma re ap enda kahalni anyo en uruk kwit de, “An hamingming angge re o di kwe su kwe omano dag watil laheg, o kwenangma etmano wilip am kuk dil noruk kahireg,” ebag.

⁸Ai ebag ma TUHAN en hein og-hauk kwit de, “An namingming angge Ayub aire fubi debehen a? At aire An napne wauk kwit, siag mel, duruk eleg on ai. O kwenangma etma abirangge re ap ai en enda An nobam dipdoho neg duruk kwit enda mun fanoreg ai hagdoho eke wereg fug,” ulug hweag-etfag.

⁹ Ai ebag ma at ap enda kahalni anyo en uruk kwit de, “At Ayub en Hat hapne wauk aire at ambiangma hwelauk ale ai wereg ma re duk ale neg duruk.

¹⁰At aire ebe ahain elekwe mel, angge di angge su angge wereg on mel, mundoho Haren hwalduk kahen. Eyabuk duruk on Haren fanoap deberuk kahen, Haren neg at owam endag-dauk on ulug humdoho, o etma abirangge hoporeberuk on og-utuk kahenma etma.

¹¹Famen de angge di angge su angge etma ambi Haren oko wehen ha man a, demdoho Hat wip hobahauk alereg!” ulug ebag.

¹²Ai ebag ma re TUHAN en ap enda kahalni anyo fam uruk kwit de, “At Ayub ai angge di angge su angge ai fam nangginig ale aire haren debeiyug neg, famen de at ebe neg de obam oukap kwelabuk fug!” ulug ebag ma re, at ap enda kahalni anyo TUHAN olohotma etano en wiliplug lebag.

¹³Li eke welatfagdeg en de it Ayub omaliki etmano soni it enowe wandeba on anyo obam esetfag.

¹⁴It airoho esetfagdeg duruk men de fetagdoho etano ap yonggo walug misig buroho Ayub obam olma watfagdeg hweag-utuk kwit de, “Nowe, nit de wam sapi omano kwenang moholdil laukmu, wam keledai omano aluluk kwe enggelangge naukmu weregman de, it ap Syeba[4] enap omano nit nenowarukoho wahesareg de, iren wam omano deldeheg, nowe hamingming angge etma wereg on omano mundoho enowareheg, dehesa. An hamingming angge su neg de lil atlug wilibik wahireg de nowe hakit holuge feik waharuk kahi,” ulug hweag-etfag.

¹⁶Ai ulug at anyo owan ele matuk kweleg de, at amingming angge bireneg on eke watfagdeg, uruk kwit de, “Nowe howam domba omano mel, it hwalduk on gembala omano mel, de oeal lepengdoho sebel-enebeheikma mundoho warahesa. We an hamingming angge neg de lil atlug wilibik wahireg de nowe hakit holuge feik waharuk kahi,” ulug hweag-etfag.

¹⁷Ai ulug hweag-utuk kwit at anyo ele fotogdoho uk fugmen de, at amingming angge henahaneg on anyo watfagdeg hweag-utuk kwit de, “It ap homi Kasdim enap[5] enenda handohal omano enebe esan henahan wahesareg de, nowe haren howam unta omano del-dauk kwit de, hamingming angge etmano mundoho binggi enowarehesa. We an hamingming angge neg lil atlug wilibik wahireg de nowe hakit holuge feik waharuk kahi,” ulug hweag-etfag.

¹⁸Airoho hweag-utuk kwit at anyo ele fotogdoho uk fugmen de at amingming angge amu on eke wene walug waharuk kwit de, “Nowe hat homaliki omano re enowe wandeba on anyo obam soni pesta esetuk men de,

¹⁹fetagdoho etano hol sielu o bini lei fil etmano en fiha waharuk kwit de, o anyo fam warik waha ma re o anyo sunururuk kwit de nowe hat homaliki omano mundoho sebel-enebeheik. We an hamingming angge namu neg de lil atlug wilibik wahireg de nowe hakit holuge feik waharuk kahi,” ulug hweag-etfag.

²⁰Airoho ebag ma re at Ayub anyo inatfagdeg enda mun hesilduk en de asum dilip-dalapdoho embeseheg, oruk hweroho embeseheg, debesireg elenggen dimirebelug,

²¹uruk kwit de, “An de nebe endag napswa ohore di angge eleg su angge eleg endag napswa, ne wararuhuk ale ohore koloroho neg wararuhuk. We TUHAN en neg og-nitsireg en, At TUHAN neg weheikma, At unuk motdeg neg welamag!” ulug ebag.

²²At Ayub fam obam anggin airoho atuk katfag famen de aren siag duk fug angge, Allah mel siaho fouk fug angge welatfag.