Read Ninia Yali AYUB 10 Bible Online

AYUB 10 - Ninia Yali bible

AYUB 10

¹An noluk welahi ale au fahet de mun welatihik mu ulug koroho nabeheg, nahummu aldoroho nabeheg, durukmu re, nebe fam asig on hauk kahi ale eta mundoho hililoho foruk kahi.

²Nakni Allah o, Haren an de siahapdoho nobahauk fug; Ite indip su fahet hat hinim kahaleg lit duruk kahi ulug enamegdoho hweag-nimin.

³Haren an mun anggolo diroho nobaharuk kahen on au fam de ambiangma nangginig on hwelehen halereg? Ne, Hat henggik fam en neg wal-deberihin deg en nunggwelug hwik-esauk kahen? It ap siag duruk on en wene melalug durukmu, Haren let-enepuk kahen etma re, ai duruk fam de ambiangma nangginig on amag ulug, duruk kahen?

⁴Haren hil nesauk kahen ale aire nit ap homi en ninil-esauk kahe hagdoho deg lahen fug.

⁵Ne Hat holuk welahen ale re it ap homi enoluk umur wereg horog deg anyo hag deg lahen fug.

⁶Aireg famen de, nunggwelug an nasiag fahet Haren mun longgoroho heraruruk kahen? An den kwasikdoho duruk kahi on etma domog muko feik lauk kwit feik waharuk kwit duruk kahen?

⁷An demdoho siag dirihik fug ale aire Haren de mundoho holuk-boluk deg lit enggat hahun en airoho napuk kahen. Ap misig eke en an Hat henggikmu en de nahap wendare nobahauk fug alereg anyo re Hat oho holuk deg.

⁸An sure Hat henggik en nahut wal-nobaharihin deg en, ketia Haren[21] an elehapdoho nobahaikoho neg duruk katmihin a?

⁹An de kwenang dangge[22] apuhuno on fam en wal-napihin ale anyo wenggel-hakin! Airoho nobaharihindeg en famen, ketia Haren an nikangge kwenang ahe amag ulug napuk kahen a?

¹⁰Nebe abirangge aure Haren nowag lale-nobahalug nomanggen fam wiri nobaharihin; nowag anyo fam de Haren nino feheg, hwililip deg lamag ulug nahap dopno-debeheg, dirihin.

¹¹Haren neg an nakni en endag nabukwag ulug deberihin ne Haren neg an nisinga ahummu en lohap napihin.

¹²Airoho nobahalug Haren noluk og-nitihindeg, henda hundig napuk kahen, An nebe noluk anyo re Haren furoho kahal nusug wereg lit hwal-napuk kahen.

¹³Famen de, Haren airoho wal-napuk kwit etma ling-long ‘At ebe alema re fohuk’ ulug wenggeldihin ale anyo ketia an noluk atuk.

¹⁴Airoho deberihin deg atlug de, an siag duruk kamu nealug, at asiag elehapdoho femin fug ulug Hat hil kwelap nusug lit welahen.

¹⁵An siag dirihik halug de an nebe welahi ale aire nambiangma mun alemat aruhuk. Famen de an den siag ale eke dirihik fug famen oho re at ap siag debag on boruk. An mundoho ap siag on deg lit nenda mun hesildukmu[23] re, nunggul nambong seroho leg hihi fug alereg.

¹⁶An den dirihik on fam ambiangma fano atsi on, wenako we dorangge hag famen de, an de wam singa hagdoho Haren mug neauk kahen. Ne, an nakolap kwelapuk kwit de, Hat hebe halong welahen ale anyo ename foruk kahen.

¹⁷Hat holok an nobam mun anggolo hum ale foruk kwit de, it ap homi an siag durukmu inil hausa on an ninim wene ukwag ulug uruk kahenma an ninim wene uruk kahe. Haren ap sehen foroho on esan keron lohwaloho an nowarik wamag ulug enayonggo foruk kahen.

¹⁸Haren nunggwelug an o kwenangma suma endag-amag ulug nobaharihin? Ap homi inil en nea fug kweleg waraleman de fano ahi!

¹⁹Airoho deleman de an nisinga ahumen bekit sale nobahaik lelepma re, an de ap o kwenang suma endag-atihik fug on hag deg lale.

²⁰We horog il misig welatlug wararuhukmu deg ma re, an namu neg welaikohon nobahayek, li ambiangma wereg on eiya fam fano-banoroho welaikohon.

²¹Il misig welatlug de an nebe mundoho lahukmu re, nikangge nambol sombandoho waruhuk fug, o kwenang mum deg lit heik koruag deg ma etma lahuk.

²²o heik anggolo deg ma mun nong-hong deg ma etma, o seleg wereg famen de seleg anyo mum hag deg ma etma lahuk,” ulug uruk katsi.