Read Ninia Yali AYUB 11 Bible Online

AYUB 11 - Ninia Yali bible

AYUB 11

¹Airoho ebag ma at Zofar en uruk kwit de, “Ap wene ebe hwaleg eleg angge obahareroho neg uruk on ai fam onggo hweag-om alereg a? Ite ap su ele hum ale matuk en ulug ap ebe onap debouk alereg a? Mun eleg.

³Ayub ao, haren boruk kwit de, iren onggo uk fug alereg behen deg uruk kahen a? Haren halitno nenepukmu etma re it enembilik sop-sopdoho welamlusa ulug duruk kahen a?

⁴Haren boruk kwit de, an nele ihi on etma re siag ale eke ihi fug behen, ne haren de an Allah il hanim ap mun fano on welahi behen.

⁵Famen de, we At Allah amu en neg ele ukwag!

⁶Ne, enggatdoho wenggelduk on aire indip humdoho deg ma re ap homi en mundoho furebouk fug alereg ulug, At Allah en neg hweag-homag. Ai fam de hat hape enggat dalug de, an unggum og-nom on de mun hum-ham deg kweleg de, ouk-bouk hauk kahi on aure log deg fug ulug holuk amag.

⁷Haren de At Allah ebe indip wereg ale anyo fubi debehen halereg a? Ite At mun along wereg ale anyo mun holuk ahen halereg a? Mun eleg.

⁸At Allah Omamne aire o bohol koloma wereg on ai horog apma sebeleg kweleg de mun leho wereg ma re, haren huli-hulimu ha lahen fug halereg. At Allah Omamne aire ap homi waratlug laukmu etma re horog emberim fam deg kweleg de mun ilonggoma yatma erahamu deg ma re, haren diroho deg ulug fubi debehen fug halereg.

⁹Allah Omamne aire kwenang wereg on au onggog deg kweleg mun wiriloho yatdeg, ik yenggeloho diahan deg on au onggog deg famen de mun anggwereg.

¹⁰At Allah en hat seneko og-haplug Aren awene kong-duruk on fam og-haplug laman de, ap sa hag angge en ambong seroho Aren durukmu ai kwe baluk alereg? Mun eleg.

¹¹At Allah en de it ap homi enambilik fam en seiale uruk on oluk deg, At il fam en de ap siag duruk on lil am fug alereg.

¹²Wam keledai maro on isinga en omalik il kuluk on enderuk men neg de, ap morue on oho enggat am alereg.

¹³Ayub ahwi, hat hendama buhun dobahat dalug, nambiken ahi bein! Airoho debelug Allah fam somban iyug!

¹⁴Hat hendama etma siag wereg on ai elehap debeseheg, hat hobam etman kwasikdoho duruk on ai yatma embeseheg, din!

¹⁵Airoho dimihin halug neg de, hakol eleg angge hambong seroho holuk wereg laruhun; ne hebe henda firoho yehelik mel duk eleg angge hambukdoho welaruhun,

¹⁶ne ouk-bouk hauk kahen on etma fahet wenggel-hahun fug angge, ik fu waharuhuk on mundoho dot atuk mu ap homi enapeleg atuk hagdoho hapeleg aruhun.

¹⁷Hat hebe holuk welaruhun li etma re mo ombagbag anyo maben hag deg kweleg mun alongdoho deg laruhu, ne ketia hat hebe holuk welahen li em o hupdeg ma hag hauk kahen on etare mo hubet asinandi kwelabik waharuk anyo hag deg laruhun.

¹⁸Hat hebe hambukdoho wereg lit henda ebereg neg welaruhun; Ne, At Allah en de hat hwal-hapukmu re hat hakol eleg angge hobam fanoroho neg welaruhun.

¹⁹It ap homi haselei on fam de hakol enepuk karuhun fug, it ap homi humdoho en haren let-nenebukwag ulug heng hapuk kamuhup.

²⁰Famen de ap siag duruk on de, it fahet let esa on eke wereg fug mu re, enenda sug sagdoho wereg lit kumu heauk kamuhup. Ite we folo-folo warala aho, ulug we misig ai fahet neg nangno hauk kwit welamuhup,” ulug ebag.