Read Ninia Yali AYUB 12 Bible Online

AYUB 12 - Ninia Yali bible

AYUB 12

¹Airoho ebag ma re at Ayub en onggo uruk kwit de, “Demdoho hit de ap homi enobalmangge hit wahep, famen de hit henebe waramuhup halug de, henunggul owag enggatdoho wenggelduk kahep on ai oho waruhu lit deg.

³An oho re ap nenda wereg nahun deg ma, hiren mundoho ehep on etma an den oho mundoho furebehi. Ne, etma re sa eke apeleg en ulug uruk kahep? We nenoluk neg. Aireg ma re hiren boruk kwit, at de maben hag ne nit de leho lahe bolug uk fug!

⁴An de ap demdoho neg duruk kwit, kwasikdoho on eke duruk kahi fug famen de, it nori en mel, nahap leiyesi en mel, unda yag napuk. Endam de Allah en let-nabukwag ulug an den heng urukmu re, At Allah en esanggo holduk katsi.

⁵Hit de henebe mun finik-fanoroho wereg lit de, ap alemat atuk on anyo siahapdoho feseruk kahep; ne ap enebe waroho ying-am on anyo hiren eke nim yeik angge ware feseruk kahep.

⁶Famen de ap heraharuk on de enebe airoho ap en enabug uruk kweleg wereg fug, it ap enakol eleg angge enambong seroho Allah ele sahalduk on omano en, iren kembu dewa fam dip-debelug enonggwareg enomamne fam wereg famen ohore, enebe mun fani-fanoroho wereg.

⁷Hiren suwe mel, bak di angge su angge mel fam hein og-esakiyug, iren wene diroho ulug mamul-hesahup ano.

⁸Oluk-oluk angge kwenangma suma wereg on mel ik fam wereg on mel fam keroho ulug hein og-enebiyug, iren ai diroho ulug enegdoho hweag-hesahup.

⁹It enebe mundoho etma enesahalimu en de san eke, nit mundoho oma At Allah en neg wal-nenepsi fug bolug duruk on eke wereg e?

¹⁰Aren neg it di angge su angge enoluk wereg on etma fahet hwale-feseruk, Ap homi nenebe nenoluk welahe on aire At omamne apma neg welahe.

¹¹An nambilik anggen en nauk angge unduk kain on neg hauk hagdoho re, an nesanggo fam en enele uruk on oho airoho hole boruk kahi.

¹²Ap en uruk kwit de enggatdoho wenggelduk on aire ap enebe umur yatdoho deg on fam wereg uruk, famen de enomamne wereg ale nim enggat on nim de we At Allah fam neg wereg. Ap en uruk kwit de wenggeloho neg duruk on etma re ap mun sobal atswa on fam wereg uruk, famen de wenggeloho duruk on nim an den neg dimin ulug duruk on nim de we At Allah fam neg wereg.

¹⁴Aren meiyalduk angge aire obalma wiruk fug alereg, ne Aren ap homi hele waroho feseruk on aire loloho wilibi fesouk fug alereg.

¹⁵Aren ik helahe baloho lare forukmu re mun firitog atlug iring neg atuk, Aren ik anyo wirig atuk kamag ulug husi forukmu re, ik fu waharuk!

¹⁶At Allah aire mun omamne deg lit along balongdoho wereg! Ap seiale lal-enepuk on mel, it laloho feseruk on mel de mundoho At omamne apma neg wereg.

¹⁷Aren de enalong wereg on mel, Pemerintah mel enenda enggatdoho wenggelduk on omano oko weheg, ne it enowesi melal-enepuk on etmano ap homi unda yag-enepuk on debeseheg, duruk.

¹⁸Aren de it anyo eneyabuk sebele feseheg, it enebe hele ware feseheg,

¹⁹it imam mel, it ap enowesi log-lohon etmano mel sebele feseheg, duruk.

²⁰Ap enele mun senggeroho neg uruk on omano enambilik dopno debeseheg, it ap sobal on en enggatdoho wenggelduk on omano oko embeseheg, duruk.

²¹Ap enowesi yain-kain anyo Aren enenggaliap debeseheg, It enebe enalong wereg lit enomamneroho melal-enepuk on anyo lisoho weheg duruk.

²²Aren de obale mun heik deg kwe omano selehap debeheg, apumag heikdoho sing deg on etma ombagbag debeheg, duruk.

²³It ap homi di enunggul unuk su enunggul unuk wereg on etmano re Aren enebe humdoho saha eheg, enengge di angge su angge kabogdoho neg og-eseheg, debelug Aren it enebe mun luluhun-lalahandoho elehap debeseruk.

²⁴It ap enowesi melal-enepuk on etmano re enenda nong-hong debeserukmu re, iren o dima lauk kahem mel hwaleg angge hesangge leil watil noruk.

²⁵O mum deg ma omano re iren fag-fag angge dil lauk kwit de, ap ik siomo duruk on nalug duruk omano hagdoho dal-dal anggeril lauk.