Read Ninia Yali AYUB 13 Bible Online

AYUB 13 - Ninia Yali bible

AYUB 13

¹Mundoho etma re an nonggwareg nil hauihikdeg, nesanggo mel holdihik ale, ne ebe diroho ulug aire mun fubi deberihik.

²Hit henoluk deg ale etare an oho noluk deg neg, ne hiren boruk kwit nit neg nenoluk deg ma at de apeleg deg bouk fug.

³Famen de an den At Mun Along wereg on anyo fam nele uruk kahi; An de At il hanim eta an nawene deg ale ai nalong bal-damin ulug duruk kahi.

⁴Hit de henebe morue deg lahep ale anyo re seiale wene fam uruk kwit heraharuk kahepma re, hit de ap hein og-angge seiale on deg ale anyo nim de aham deg lahep fug.

⁵Ne, hiren henele airoho uruk kalep fugmen de hit de ap enggat henap belep.

⁶Aireg ma re hiren uruk kahep on ai fahet an den imin on su henesanggo holiek, ne an nonggwareg fahet nili og-damin on su furebeyek.

⁷Allah obahet uruk kahe ulug hiren laloho ehep halereg a? At obahetdoho ulug hiren henele seiale ehep halereg a?

⁸Hiren At Allah ibil atlug, At along balduk kwit hiren melalehep halereg a?

⁹At Allah en hit henebe fam kumu hesaman de, hit henebe fanoreg ma hesa alereg ane? Ap homi lal-enepuk hagdoho hiren Allah lalehep halereg a?

¹⁰Hiren we ling-long ulug Allah ibil ahep ha man de, At Allah hit unggum mun ilmu siagdoho henobam fouk alereg.

¹¹At Allah mun along wereg on ai en de henebe fam henakol henepuk fug a? Aren fulu-bolan ale duruk on etma re henendama henamelmel duruk fug a?

¹²Hiren henanggomo uruk kahep on etma re ul ahe mun siag on etmano hag deg; ne hiren henonggareg hinili og-dauk kahep on etma re kwenang dangge on hilinggig angge misiham luluhun duruk on hag deg.

¹³Ai halug de an nele imin on ai ambiangma keroho atmisi ai deg kweleg de, an nele imin anggere henele eleg angge welamek!

¹⁴An de[24] nebe mundoho waratmin behireg duruk kahi ai,

¹⁵An den nenda mundoho wat-dauk kwit de, airoho dimin behireg duruk kahi. Ne, At Allah en an binggi nowatmin boruk halug ohore nabukwag ulug embesemin, famen de an nobabut duruk katihik ale fahet de At il hanim etman oho nalong bal dahuk.

¹⁶Ap kwasikdoho duruk on de enambong seroho Allah il hanim inaik la fug alereg famen de, an nambong se ai en an nahap wendat-atmin lit deg.

¹⁷Ketiare an nele uruk kahi on su fanik-fanoroho holiyug, ne an den enegdoho ulug hweag-hesamin on aire furebeiyug.

¹⁸An nawene aire ikoho lit mun fouk deg lahimu re; hat siagdoho dehen ulug hweag-nom fug alereg ulug nendama boruk kahi!

¹⁹TUHAN nakni, hat siag dehen ulug wene nobam feik waharukmu halug de, an nele eleg angge bok wereg lit de nunggwe salim wararuhuk ulug nangno hauk karuhuk.

²⁰Famen de an Hat holohotma nambong seroho inaik waruhuk en de, wene indip biren fam heng hapuk kahi on eiya hol-nabin:

²¹An nobam anggin fanggin nobaharuk kwit neg welahen ale aire bale fein, Haren fulu laloho duruk kahen on etma fam an nobam feik wam fug!

²²Hele hweag-nitmihin mu re an den oho onggo hweag-hitmin, ite an nele imin mu re haren onggo hweag-numuk!

²³An den nasiag dirihik on mel, kwasikdoho dirihik on mel de nunggwe en hagdoho deg? An den Hat hele dahandoho dirihik halug de, Haren eke su eke su ulug imihin fano!

²⁴Hat de nunggwelug an ahaye naplug hamumu hihiloho lauk kahen? Indip de ke fam Haren an fahet haselei on hagdoho nobaharuk kahen?

²⁵An de hol fi ha laukmu e enggela loloho wamburuk on hag famen, Haren yuokap kwelap napuk kahen oma re! An de enggelangge iringgoho halolonggop deg on hag deg kweleg famen de nunggwelug Haren an sik naplug mug naplug neg duruk katmihin?

²⁶An nebe sauwe wereg li siag duruk katihik on omano fahet Haren onggo nobam foruk kahen, An nebe noluk welahi on su nambiangma aik lowag ulug de mun asig on foukdoho ferihin.

²⁷ An neyog de bosiemanggen fam Haren het noharihin, an nobabut duruk ale etano re Haren mundoho hil kwelap-nusug lahen. Neyog endangge en sobituk mu ohore, Hat hil famen oko lauk fug.

²⁸Ai fam de an anyo e mundoho filik atuk on hagdoho mun fubut ahi, sum kain mumlen en balduk mu hag an anyo mun fubut ahi.