Read Ninia Yali AYUB 14 Bible Online

AYUB 14 - Ninia Yali bible

AYUB 14

¹Ap homi re enebe endag-atuk li en angge re enomamne wereg fug lit di on su on duk ale nong-hong deg; Anggilik-anggoloroho neg hauk kwit enoluk welatlug enebe anunuroho welam fug angge waratuk.

²E ahanuk wilipuk hagdoho lahalug en de, e owil yihig halo uruk hagdoho eleg atuk; Ap homi enapumag baloho eleg aik lauk hagdoho eleg aik lauk.

³Nakni Allah o, an ap aireg on ai fam Hat hil nealug, oko Haren wene katukdoho biling-enepuk kahenma etmano nobahaik lauk kahen oma abi!

⁴Ap homi mun siag duruk on en eke enebe fam en fano ale eke ename feik wam alereg a? Mun eleg.

⁵Ap homi enoluk welamuhup ale di en welamuhup ulug umur Haren neg wenako ferihin; Bigalem detan welamuhup ulug de Haren neg fubi deberihin. It enoluk welamag ulug de Haren mundoho huli-huli ferihin mu re, Ap en eke dahandoho la fug alereg.

⁶Aireg ma re at ai kel watauk kamagdoho re, at ying duruk eleg; at airoho wereg lit oluk welaruhu on eta fam di on su on duruk katlug at eyabuk duruk on ai mun aik lahu en.

⁷E muhuk foruk on halug aire, fobik asimit wilibuhureg enggik doaluhu bouk alereg.

⁸Kwenang fam omanggen omano mundoho fubut dulug, ne eratma mundoho filikdoho siag am alereg,

⁹famen de ik en watlug de nin wilibuk alereg; di angge su angge ket yaho forukmu ahanuk laharuk hag asimit sipukdoho nikangge wilibuk alereg.

¹⁰Famen de ap homi waratuk halug de at oluk wereg lit duruk ale anyo mundoho fotog aik lauk, At ebe waratlug etma kema lauk behep?

¹¹Ik sene yenggeleg on fam en ahe laharuk hag, ne ik wirig atuk on mun firitog-firitog ik ebe eleg atuk hag,

¹²it ap homi waratuk on aire airoho atuk mu re; at anyo nikangge oluk inam fug alereg. O bohol owan eleg am fug kweleg de at ebe oluk atlug welam fug alereg, ne at nohorukmu etman de oluk aruhu fug.

¹³Hat holok nobam foruk kahen on ai bale fohun en de; it ap homi waratlug laukmu etma heraho nobahaik lalug hwal-napuk kamin. Famen de an airoho wereg ma henda ebet neahun on fahet de; li di fam ulug enegdoho fein.

¹⁴Ap homi waratlug de enoluk nikangge inam alereg a? Di nukoho su nukoho etano hundig nangno hauk men neg, nebe fam asig anggoloroho hauk kahi on su eleg-aik lahu.

¹⁵Airoho aruhu mu neg de Haren an wol neahunmu, an den oho su welahi ulug nele uhuk. An Haren wal-napihin on deg ma re, Haren henda neahun lit deg.

¹⁶Airoho bohundeg de an den duruk ale etmano mundoho Haren hil og-napil noruk karuhun, famen de an nasiag fahet de Haren fureberuk karuhun fug.

¹⁷An nasiag de Haren hapelehapdoho folug oko amumu embeseik lahun. An den o endam kwasikdoho dirihik on etmano Haren elehapdoho nobahakun.

¹⁸Fobik en dom-dom somboruruk kwit erapdoho naleg-haleg uhu, ne dom helep mun omamneroho unduhuk wereg on etma obalma en hekipdoho lauk karuhu.

¹⁹Helep wereg on etmano re ik il omamneroho wirig atuk kwit seng dulug wirig atuk karuhu; kwenang de osit humon waharuk kwit feleleng dulug lauk karuhu, Airoho duruk ai fam ap homi en enenda ebereg wereg on etmano siahapdoho foruk karuhun.

²⁰Li mundoho-mundoho fahet Haren at along elehapdoho folug; Haren at fam hangge lakin ulug monde folug, haren neg orohole munini fohun.

²¹At omaliki etmano ap yain-kain amuhup famen it airoho atswa ulug at apeleg angge welaruhu, Ne, it enebe ap siag on hag atlug welamuhup famen, It airoho atswareg wereg ulug ap en oho eke hweag-umuhup fug.

²²We ahap fam fatoruruk on neg ouk hauk karuhu; ne we endama hesilduk on neg ouk hauk karuhu,” ulug ebag.